Dimanya Didi Difuma Kudi Nzambi Didi Diandamuna Ku Nkonko Mivule

 ¹ Bangabanga ne kupeta dimanya dijalame dia bulelela, tuvua pamu’apa tudiela nkonko mivule pa muoyo, katuyi ne mushindu wa kuyandamuna. Ndisankapu kayi, mpindieu, dia kupeta mandamuna mashila pa Bible! Lelu’eu, tudi ne mushindu wa kuambuluisha bakuabu bua kupeta mandamuna amue-amue aa. (Tangila 2 Timote 2:⁠2.) Tudi mua kuabanyangana nabu dimanya dia Nzambi didi difikisha ku muoyo wa kashidi. (Yone 17:⁠3) Kadi mmunyi mutudi mua kuambuluisha muntu bua kuanyisha mushinga wa dimanya edi? Anu pa kuela meji patupu ku mandamuna atuvua tuetu bine bapete ku diambuluisha dia bulelela. Bikale ne lungenyi elu mu mutu, nebitupepelele bua kufila mukanda wa Dimanya didi difikisha ku muoyo wa kashidi. Mibelu mifila kuinshi eku neyikale mua kutuambuluisha bua tuetu kudilongolola bua buambi mu Kashipu.

 ² Bu mudi bantu ba bungi badiebeja bua tshinyi kudi makenga a bungi nunku pa buloba, ngenzelu udi ulonda eu udi mua kujula ngandamuinu misankishi:

◼ “Padi tshipupu kampanda tshienzeka anyi padi bienzedi bia tshinyangu ne dibundangana bivulangana, bantu batu badikonka misangu mivule mudi malu a mushindu’eu mua kuenzeka. Ndiumvuija kayi diudi mua kufila?” Teleja diandamuna ne ntema, pashishe bulula mukanda wa Dimanya mu nshapita wa 8 ne leja tshidi tshiamba mu tshikoso 2. Jadika ne: mukanda eu udi ufila diumvuija dia mu Bible pa bidi bitangila dikalaku dia bubi, ne sakidila ne: “Biwanjadikila bua kuubala, nensanke bua kukushilawu.” Biandamuna muntu bimpe, mupeshe mukanda ku dipa dia pa tshibidilu.

 ³ Pawakumbula tshiakabidi muntu uuvua mushile mukanda wa “Dimanya,” newikale mua kuamba ne:

◼ “Nensanke bua kumanya nkomenu uudi mupete pa kabingila ka mudi makenga matambe kutangalaka pa buloba nunku. Udiku muitabe diandamuna didi Bible ufila ne didi dileja mu mukanda eu anyi?” Lekela muntu andamune. Bala tshikoso 17 mu dibeji dia 77 dia mukanda wa Dimanya ne mulombe bua abale Lomo 9:14 mu Bible wende yeye. Pashishe wamba ne: “Lumu luimpe, ludi ne: Yehowa kêna utukebela dikenga nansha dimue dikena dia buakane. Mmulaye bua kutupesha muoyo wa kashidi mu ditalala ne diakalenga. Nshapita wa kumpala wa mukanda eu udi ne tshiena-bualu tshia: ‘Udi mua kupeta diakalenga bua matuku atshilualua!’ Nensanke kukumvuija mushindu udibi mua kuenzeka buebe wewe ne bua baudi munange.” Angata nshapita 1 ne leja mushindu wetu wa dilonga. Longayi bungi kampanda bua bikoso bia nshapita eu bilondeshile tshikondo tshiamueneka.

 ⁴ Pamu’apa neusungule bua kutumika ne mbuelelu udi mu dibeji dia 14 dia mu mukanda wa “Comment raisonner” muinshi mua tshiena-bualu tshia “Vieillesse/Mort”:

◼ “Kutuku muanji kudiebeja bua tshinyi tudi tukulakaja ne tufua anyi? [Lekela muntu akule.] Mifundu idi yandamuna ku nkonko yonso itudi mua kudiela pa bualu ebu. [Bala Muambi 9:​5, 10.] Idi ileja kabidi ne: kudi ditekemena dilelela bua aba badi baleja ditabuja. [Angata tshikoso tshia 13 mu dibeji dia 84 dia mukanda wa Dimanya; bala ne umvuija mêyi a Yezu adi mu Yone 11:25.] Nshapita mujima udi ne tshipatshila tshia kuandamuna ku lukonko lua: ‘Ntshinyi tshidi tshifikila banangibue betu badi bafue?’ Biwasua kuubala, ndi mua kukushila kopi eu.” Ambila muntu dipa dia pa tshibidilu.

 ⁵ Mu dikumbulula diebe, udi mua kulamakaja diyuki, pashishe kuamba ne:

◼ “Dituku adi, tuvua bakule bua tshidi tshifikila muntu ku lufu. Bantu ba bungi batu bela meji ne: bikalaku muoyo kunyima kua lufu, bidi pamu’apa mu diulu, peshi mu inferno. Kadi ukadiku muele meji a kumona bafue bapingana panu’apa, pa buloba anyi? [Lekela muntu akule.] Bilondeshile Bible, babishiibue nebikale munkatshi mua badipuekeshi bapiana buloba. [Bala Musambu 37:​11, 29, pashishe umvuija tshikoso tshia 20 mu dibeji dia 88 dia mukanda wa Dimanya.] Ditekemena edi ndisulakaje miliyo ya bantu bavua mu buôwa bua lufu. Mukanda eu neukuambuluishe bua kumvua bimpe lukonko elu. Udiku wanyisha bua nkuleje anyi?”

 ⁶ Biwasungula dileja ditambe kupepela, newikale mua kuteta edi:

◼ “Ndi musue kukuleja tshimfuanyi kampanda tshia mu mukanda eu, Dimanya didi difikisha ku muoyo wa kashidi. Kuenaku umona se: ntshimfuanyi tshilenga anyi?” Bulula mukanda bua muntu amone mu mabeji 4 ne 5. Umulekele andamune, pashishe ubale mu kazubu ka mu dibeji 5. Komesha nunku: “Ndi mua kukushila mukanda eu bua wewe kudibadilawu.” Ambila muntu dipa dia pa tshibidilu. Bikala muntu muleje disankidila, muebeje dituku diudi mua kumukumbula tshiakabidi.

 ⁷ Tudi ne dimanya didi difuma kudi Nzambi, edi didi diandamuna ku nkonko mivule ya mushinga idi ilenga muoyo wetu. Tudilongolole biakane ne Yehowa neabeneshe madikolela atuenza bua kumanyisha mukenji eu wa muoyo kudi bantu badi bakeba bulelela.