Lulamatu Lutu Lufutshibua
1 Mu Ebelu 11:6, tudi tubala ne: Nzambi “udi mufutshi wa badi bamukeba.” Utu nangananga ufuta basadidi bende badifile badi ‘ne lulamatu mu bintu bikese’ pa ‘kubateka pa mutu pa bintu bia bungi.’ (Mat. 25:23) Mu miaku mikuabu, bua kufuta Bantemu bende bena lulamatu bua mudimu wabu mulenga, Yehowa utu misangu mivule ubapesha masanka a mudimu mapiamapia.
2 Bu difutu bua lulamatu luende, mupostolo Paulo wakapeshibua mudimu wakamufikisha ku ditambakana mu bimenga ne mu misoko ya ku Mputu ne ya mu Azi Minere. (1 Tim. 1:12) Nansha bu yeye ne bua kuenza madikolela mavule bua kukumbaja tshishiki mudimu’eu, Paulo uvua wangata ne mushinga mukole disanka dia mudimu divuaye mupete. (Lomo 11:13; Kolos. 1:25) Ku mudimu wende muenza ne lukunukunu, mmuleje patoke ne: uvua wenza malu bilondeshile ditabuja diende. Tshilejilu tshiende tshidi tshitukankamija bua kuangata masanka etu a mudimu ne mushinga mukole.
3 Yehowa mmutuomekele mudimu: Mmunyi mututu tuleja ne: tudi tuangata difutu edi, disanka edi, mu mushindu wa muomumue ne Paulo? Pa kukebulula mishindu ya kudiundisha diditua dietu mu mudimu’eu. Pa kubabidila mpunga yonso ya kufila bumanyishi mu mpukapuka ne ku nzubu ne ku nzubu. Pa kualukila ku nzubu ya bantu batuvua katuyi basangane ne kukumbulula bavua baleje disankidila. Kabidi, pa kunemeka dîyi-dipunga bua kulombola malonga a Bible.
4 Pavuaye wakula bua mudimu, Paulo wakafila mubelu eu: “Nanukila kubambila.” (2 Tim. 4:2) Badi bumvuija dinanukila bu diela kashonyi pa bualu kampanda. Tutuku tuela kashonyi pa mudimu wetu pa kuuteka pa muaba wa kumpala mu nsombelu wetu anyi? Tshilejilu, katuakuanyisha bua kulekela ditanaja ne midimu mikuabu yetu nkayetu ya ku ndekelu kua lumingu yangata dîba divule ditudi ne bua kufila mu buambi nansha. Bu mutudi batuishibue ne: nshikidilu wa ndongoluelu’eu wa malu udi usemena lukasalukasa, tudi kabidi bamanye se: diyisha dia lumu luimpe lua Bukalenge mmudimu udi mutambe mushinga utudi mua kuenza.
5 Lulamatu luetu kudi Nzambi ludi lumuenekela kabidi bu mudi ku dienza dietu dia pa tshibidilu dia mudimu udiye mutupeshe. Tukumbajayi tshishiki mudimu wetu ne Yehowa neafute bivule lulamatu luetu.