Tuyishayi Miaba Idi Bantu

¹ Mu dijingulula mudimu mukuata kudi spiritu wa Nzambi mu mudimu wende, mupostolo Paulo wakamba ne: “Nzambi wakabidiundisha.” Wakitabuja kabidi ne: “Tudi benze[j]anganyi ba mudimu ne Nzambi.” (1 Kol. 3:5-9) Ndisanka dia mpatshi. Mmunyi mutudi mua kuleja patoke ne: tudi tuanyisha bunême bua kuikala benzejanganyi ba mudimu ne Nzambi? Mu dimanyisha lumu luimpe kudi bantu bonso batudi tupetangana nabu mu bumanyishi bua ku nzubu ne ku nzubu ne miaba mikuabu yonso.

² Tudi bapete bukenji bua ‘kuenza bayidi.’ (Mat. 28:19) Bituikala tuakula anu ne bantu bakese tshianana patudi tupatuka mu buambi, tudi bafuane kupungila lukasa ne kuela meji ne: katuena ne bua nsongo butudi tuenza. Kadi, patudi tufika ku dipeta bantu bavule ne kuyukila nabu, tudi tupeta disanka divule dia mudimu wetu. Abi bidi bitulomba madikolela, bualu bidi bitukengela kuangata dipangadika dia kuya miaba idi bantu bua kumona mua kuyukila nabu.

³ Bilejilu biambuluishi: Tudi mua kufila bumanyishi mu tshisalu, mu mpangu ya nyama ne mu miaba ya dindila mashinyi a diambula bantu. Patutu tubuela mu mashinyi a diambula bantu, tutuku badilongolole bua kufila bumanyishi mu njila anyi? Mu bise kampanda uvua mûle tente, Bantemu babidi bavua baya mu tshisangilu tshia mudimu wa buambi bakatuadija kuela nseka pa tshimfuanyi tshia mu mukanda wa Dimanya tshidi tshileja Mparadizu ne kuyukidilangana pa malaya a Nzambi bua matuku atshilualua. Anu muvuabu babitekemene, nsonga kampanda uvua ku luseke luabu wakaditua mu muyuki wabu. Malu avuaye mumvue akamusankisha, ne pakutulukaye mu bise wakitaba mukanda kampanda ne kulombaye bua kumukumbulabu kumbelu.

⁴ Bamanyishi bavule batu bapeta disanka mu bumanyishi bua mu mpukapuka. Mu mêba kampanda a mu mapingaja, muanetu wa bakaji kansanga wakaya mu kartié ka bungenda ne kutuadijaye kuyukila ne bantu bakavua bajikije midimu yabu kadi kabayi bamueneka bikale lukasalukasa bua kualukila ku mabu. Wakabanya mikanda yonso ivuaye nayi mu tshibuta tshiende. Muntu kampanda uvua mu mashinyi ende mimanyika wakitaba ne disanka dionso bibejibeji bivuaye mumuleje. Muntu eu uvua mubuele mu bisangilu matuku a kale ne muyuki wabu wakasonsola dijinga diende dia kumanya bivule.

⁵ Kutumbisha dîna dia Yehowa ndisanka. Pa kuikala ne lukunukunu bua buambi, tudi tuleja ne: katuena bapangile tshipatshila tshia bulenga bukena butuakanyine bua Nzambi butuleja. “Katataka ntshikondo tshimpe” tshia kuambuluisha bakuabu; nenku tuyayi miaba idi bantu ne tubapeshe bumanyishi pa bidi bitangila ‘dituku dia lupandu.’​—⁠2 Kol. 6:1, 2.