“Bantu Bonso Nebananganganaku Anyi?”

¹ Mu katupa kîpi emu, nebamanyishe pa buloba bujima, mu miakulu 169, mukenji mutambe buimpe udi usonsola ne ukankamija. Udi wamba tshinyi? Nebaumanyishe mushindu kayi?

² Mmukenji udi utangila dinangangana. Udi mu Ngumu ya Bukalenge No. 35 idi ne mutu wa bualu eu: “Bantu bonso nebananganganaku anyi?” Ngumu ya Bukalenge eyi idi ileja mu tshikoso nsombelu wa pa buloba ne idi yumvuija ne: dipanga dinanga munkatshi mua bantu ke muji wa ntatu ne makenga mavule. Idi kabidi ileja bua tshinyi, nangananga lelu’eu, dinanga dia muntu netu didi dikepela ne tshidibi biumvuija bua matuku atshilualua.

³ Kabidi, Ngumu ya Bukalenge No. 35 idi isokolola ne: dinanga dilelela dia muntu netu didi munkatshi mua miliyo ya bantu badiku lelu’eu pa buloba. Idi ileja bantu badi bapingaje Buena-nkristo bua kumpala, ntendelelu uvuaku mu siekele wa kumpala uvua uleja dinanga dia muntu netu muakadilongesha Yezu Kristo.​—⁠Luka 10:25-37.

⁴ Ngumu ya Bukalenge No. 35 idi ikomesha mu diumvuija mushindu wikala bukua-bantu buonso mua kuleja, mu katupa kîpi emu, dinanga dia muntu netu muinshi mua bukokeshi bua Bukalenge bua Nzambi buambika Kristo. Bantu babala mukenji eu mbalombibue bua kupetabu broshire wa Ntshinyi tshidi Nzambi utulomba ne bua kumona mushindu wa kupetela masanka ku ndongoluelu eyi miûle tente ne dinanga.

⁵ Nnganyi wamuangalaja mukenji eu? Mu ngondo wa Kasuabanga ne wa Tshisua-munene, Bantemu ba Yehowa ba pa buloba bujima nebamanyishe mukenji eu wa dinanga dia muntu netu kudi bamanyangana nabu, kudi bena mutumba nabu ne kudi balela babu. Bonso badi bakumbaja malu-malomba mbalombibue bua kuabanya Ngumu ya Bukalenge No. 35.

⁶ Tshipatshila tshia kampanye aka ntshia kusonsola ntema ya bantu bua dilonga dia Bible ku diambuluisha dia broshire wa Utulomba peshi dia mukanda wa Dimanya. Kabidi, madikolela ikala yonso wa ku basadidi ba Yehowa muenze ne muoyo mujima neafile bumanyishi bunene kudi Nzambi wa dinanga, Yehowa, ne kudi Muanende, Yezu Kristo.