Tutu Tuenza Tshinyi Padi Bantu Baleja Kalèngù?
1 Kalèngù ntshikadilu tshia muntu udi kayi umvua nyanji anyi mpampakenu, udi kayi uleja disankidila anyi diditatshisha. Ng’umue wa ku mmuenenu mitambe kutangalaka lelu’eu ne mitambe kukola bua kutshimuna mu mudimu wetu. Tutu tuenza tshinyi padi bantu baleja kalèngù? Tutu tutekesha mudimu wetu bua bualu ebu anyi? Mmunyi mutudi mua kutshimuna kalèngù kadi bantu baleja bua kubamanyisha mukenji wa Bukalenge?
2 Tshia kumpala, tujadike kabingila kadi bantu ba mu teritware wetu balejila kalèngù. Mbualu mbatekeshibue mu maboko kudi bamfumu ba tshididi ne ba bitendelelu anyi? Mbadimone kabayi ne mushindu nansha umue wa kujikija ntatu yabu anyi? Malaya a bualu kampanda butambe buimpe adi abashiya mu diela mpata anyi? Batu babenga kushindamena pa malu a mu nyuma padibu kabayi bamona bipeta bimueneke ne bidi bisankisha diakamue anyi?
3 Tuzangike mushinga wa ditekemena dia Bukalenge: Kakuena tshilumbu nansha tshimue tshiapangila Bukalenge kujikija. Nenku, patudi ne mushindu, tudi ne bua kutela malaya a Bukalenge ku diambuluisha dia mêyi-manene a mu Bible, nansha bikalaku kakuyi mushindu peshi kabiyi biakanyine bua kuleja mvese wa mu Bible. (Eb. 4:12) Bamane kuamba nanku, mmunyi mutudi mua kufika ne diyuki ku tshipatshila atshi?
4 Mbia mushinga bua bantu kumanyabu tshipatshila tshia makumbula etu. Bidi bikengela kubumvuija ne: dinanga dia muntu netu ne ditabalela ditudi tuleja bakuabu ke bidi bitusaka bua kulua kubamona. Tudi mua kubela lukonko luakanyine bu mudi elu: “Buebe wewe, ntshinyi tshidi mua kujikija [tela bualu bumue budi busakuke mu kartié]?” Bikala mbuelelu umue kayi ukumbana, tutete mukuabu.
5 Mu kartié kampanda muvua bena kantu ku bianza bavua baleja kalèngù ku mukenji wa Bukalenge, bamanyishi bakadienzeja bua kupeta mbuelelu uvua mua kujula ntema. Bua kuleja mukanda wa Dimanya, muanetu wa balume kampanda ne mukajende bakateta mbuelelu eu: “Udi wela meji ne: bidi ne mushinga bua kuikala bapete ndongeshilu muimpe bua kulubuluka pa buloba lelu’eu anyi? Udiku wanyisha bua kuamba ne: dimanya-mukanda dionso didi dikonga too ne dimanya dia Bible anyi?” Mu mapingaja, bakashiya mikanda isatu, umue kudi mukaji kampanda wakalua kuamba panyima pa matuku ne: ukavua mubale mukanda wa Dimanya wonso mujima ne wakitaba bua kulonga Bible.
6 Patudi tutuilangana ne kalèngù, tutete mbuelelu mishilashilangane, tuele nkonko idi yelesha meji ne tushindamene pa bukokeshi bua Dîyi dia Nzambi. Pamu’apa netuikale ne mushindu wa kuambuluisha bantu bakuabu bua kuitaba ditekemena dilenga dia Bukalenge.