Tuakule bua Yehowa dituku dionso
1 Bantu batu basue kulonda malu adi mu mutshima, bualu mukana mutu muamba anu malu adi matambe kuvulangana mu mutshima. (Luka 6:45b, NW) Kadi tuetu, ntshinyi tshidi mu mutshima wetu? Mufundi wa misambu wakafunda ne: “Ludimi luanyi neluambile bantu bua buakane buebe ne bua butumbi buebe dinda to[o] ne ku dilolo.” (Mus. 35:28) Uvua ne dianyisha diondoke bua Yehowa ne uvua umona kuakula bua Nzambi ne kujukula butumbi buende dîba dionso bu disanka dia mudimu dilelela. Mufundi wa misambu uvua ne tubingila tuvule tua kutshionkomokela bualu uvua mumanye Yehowa bimpe menemene. (Mus. 35:9) Mmunyi mutudi mua kuidikija tshilejilu tshiende tshilenga?
2 Tuakule bua Yehowa kumbelu: Yehowa udi ne bua kuikala tshiena-bualu tshia mayuki etu a dituku dionso mu dîku. Baledi badi ne dinanga dikole bua Yehowa nebakule pa tshibidilu bua bualu buende mu midimu yabu yonso. (Dut. 6:5-7) Nunku, bana nebamone se: tatuabu ne mamuabu badi ne nsombelu wa ditabuja ne mbanange bikole mikenji ya Nzambi. Nanku bana nebangate dilonga dia Bible dia mu dîku bu mushindu mulelela udi baledi babu baleja bulamate buabu kudi Nzambi.—2 Pet. 3:11.
3 Tuakule ne bana betu bua Yehowa: Midimu ya teokrasi ya ku lumingu luonso idi itupetesha bikondo bivule bia kudiisha mu nyuma tshieledi tshietu tshia lungenyi ne mutshima wetu. Misangu yonso, kutu malu mimpe atudi mua kuyukila. (Luka 6:45a, NW) Mu dilonga diebe dia pa nkayebe peshi mu dibala dia Bible dia ku lumingu, udiku mubambishe lungenyi kampanda luudi mutambe kuanyisha anyi? Wakulepu ne bana benu ba balume ne ba bakaji, ne neubambuluishe bua kudiundisha dinanga diabu bua Yehowa.—Mus. 35:18; Eb. 10:24.
4 Tuakule bua Yehowa muaba utudi: Mu mayuki a matuku onso ne bantu netu, ku mudimu, mu kalasa anyi ne bena mu dîku dietu badi kabayi bitabuja malongesha etu, bidi ne bua kumueneka patoke ne: diditatshisha dia kumpalampala dia dikalaku dietu ndia kufila bumanyishi bua Yehowa. Pamutu pa kuikala ne ngakuilu wa tshikama ne wa bukoya wa mu bulongolodi ebu, tudi ne bua kutumbisha Nzambi mu ngakuilu wetu. Dituku dionso, mu dîba kayi dionso, tuakule bua lumu luimpe ludibu batupe mudimu wa kulumanyisha.—Bien. 5:42; Kolos. 4:6.
5 Bu mutudi batendeledi balelela ba Yehowa, netubabidile bikondo bidi bimueneka dituku dionso bua kuakula bua Nzambi wetu Yehowa ukena kuelekeja.—Mus. 106:47.