Dipumbisha diebe didi dimueneka!
1 Bitu bitufikila pamu’apa bua kupumbisha ku misangu tshisangilu tshimue anyi bia bungi bia mu tshisumbu tuamba ne: “Kabiena ne tshidibi bienza; kakuena mene muntu watentekela ne: tshienaku.” Ki mbulelela to! Bonso tudi ne mudimu kampanda wa mushinga mu dikalaku dia tshisumbu, anu bu mutubi bua bitupa bia mubidi. (1 Kol. 12:12) Dipumbisha dietu mu tshisangilu kampanda tshia ku lumingu didi mua kuikala ne buenzeji bubi pa dikala-bimpe dia mu nyuma dia badimu. Biwikala kuyimu, umanye bimpe ne: dipumbisha diebe didi dimueneka!
2 Mudimu munene wa muntu yonso: Paulo uvua ne muoyo kulukulu bua kudisangisha ne bana babu. Bua tshinyi? Udi umvuija mu Bena Roma 1:11, 12 (MMM) ne: “Bua . . . mpeteku mushindu wa kunumanyisha dimue dipa dia muoyo, . . . bua tuetu kukoleshangana ku muoyo mu ditaba dia muomumue ditudi nadio bonso, nuenu ne meme.” Bia muomumue, mu difila dietu dia mumvuija, dienza midimu ne dikalamu mene dietu, tudi tuibakangana bamue ne bakuabu ne tukankamijangana bua kushala ne lulamatu.—1 Tes. 5:11.
3 Kutu ne muoyo kulukulu bua kupetangana ne balunda bebe bena nkristo mu bisangilu bia tshisumbu anyi? Udi uteleja ne ntema mudibu bela nseka yabu ne wanyisha mushindu udibu baleja ditabuja diabu. Mapa abu a mu nyuma adi ambuluisha bua kukuibaka. Bu bikala bakuabu bapumbishe, uvua mua kumvua bu ne: nkupangike tshintu kampanda tshia mushinga. Ke mutu bana benu ba balume ne ba bakaji bumvua pautu kuyiku.
4 Mudimu wa mushinga mukole wa bisangilu: Bua bidi bitangila mushinga wa bisangilu bua bumuntu buetu bua mu nyuma, Tshibumba tshia Nsentedi kampanda tshiakamba ne: “Mu bulongolodi ebu bubi ne busasuluja kudi ndululu kabukabu, tshisumbu tshia bena nkristo ntshipengaminu tshia mu nyuma tshilelela . . . , tshia ditalala ne dinanga. Nenku, [tubuele] ku musangu ne ku musangu mu bisangilu biatshi bionso.” (w93 15/8 11) Dituku dionso, tudi tutuilangana ne nsombelu idi iteka bumuntu buetu bua mu nyuma mu ditetshibua dikole. Bituapanga kudileja badimuke, tudi mua kudiina mu tunyinganyinga tuetu nkayetu ne kufika ku dilengulula malu a mu nyuma, adi a mushinga mukole. Bonso tudi ne dijinga dia bakuabu ne buobu pabu badi netu dijinga bua kupeta makankamija adi akengedibua ne kushala mu buobumue ne lukunukunu mu mudimu wa Nzambi.—Eb. 10:24, 25.
5 Bidi ne mushinga bua tuikale tubuela mu bisangilu. Disama anyi bualu bua mu mpukapuka bidi imue misangu mua kutupumbisha bua kuikalamu, kadi mu bikondo bikuabu bionso, tuikale bapangadije bua kuikala misangu yonso munkatshi mua misumba midisangishe idi isamuna Yehowa!—Mus. 26:12.