Bansonga—Babidilayi tshikondo tshinudi mu tulasa
1 Udi wela meji kayi bua dipingana mu kalasa kunyima kua diikisha dinene? Udiku ne dijinga dikole dia kupetela masanka ku tshidimu tshipiatshipia tshia kalasa anyi? Neubabidile bikondo bidi kalasa kakupetesha bua kuyisha bulelela kudi balongi nebe ne kudi balongeshi bebe anyi? Tudi batuishibue se: udi musue kuenza muebe muonso mu kalasa.
2 Ikala mulongi muimpe: Biwikala mudilongolole bimpe paudi uya mu kalasa ne uteya ntema mikole, neupete masanka a mutantshi mule. Wikale ne tshisumi mu dienza midimu ya kuenzela kumbelu, kadi kulekedi midimu yebe ya mu kalasa itshiamakana kumpala kua midimu ya teokrasi to.—Filip. 1:10.
3 Tuadija tshidimu tshipiatshipia tshia tulasa pa kubala broshire wa Les Témoins de Jéhovah et l’instruction. Pashishe, baledi bebe anyi wewe muine udi mua kupesha yonso wa ku balongeshi bebe broshire umue. Ubamanyishe se: nebapete mandamuna ku nkonko yonso idibu mua kuikala nayi. Kuenza nunku nekubambuluishe bua kumvua bilenga mêyi-maludiki audi nawu ne mitabuja ebe ne kukukuatshisha paudi ulonda malu adibu bakulongesha. Nekujadikile kabidi balongeshi bebe se: wewe ne baledi bebe nudi ne dijinga dia kueleshangana nabu diboko padibu bakuambuluisha bua kupeta dimanya-mukanda dia mushinga.
4 Ikala Ntemu muimpe: Bua tshinyi kubenga kuangata tshilongelu bu webe teritware bua kufila bumanyishi bua mu mpukapuka? Mu bule bua tshidimu tshia tulasa etshi newikale ne bikondo bia pa buabi bua kufila bumanyishi. Udi ne dimanya dilengele dia mu nyuma didi mua ‘kukupandisha wewe muine ne badi bakuteleja’ paudi udilongesha bakuabu. (1 Tim. 4:16, MMM) Mu dilama bikadilu bilenga bia muena nkristo ne mu difila bumanyishi dîba dionso didi diakanyine kuenza nunku, neupete disanka wewe muine ne bakuabu kabidi.
5 Muanetu nsonga kampanda wakafila bumanyishi bua mu mpukapuka kudi balongi nende mu tshilongelu tshiende. Ku aba bakandamuna bilenga kuvua muena Katolike, muvidi wa dikalaku dia Nzambi uvua ne tshibidilu tshia kuseka aba bavua bitabuja Nzambi, ne nsongalume mukuabu uvua unua makanya kayi wikisha ne mukuatshiki wa maluvu. Bonso basanga, muanetu nsonga eu wakambuluisha binende 15 bua kufikabu ku didilambula ne ku batismo!
6 Nenku bansonga, dienzejayi bua kulonga bimpe ne bua kutumika mu teritware wenu wa pa buende bua kufila bumanyishi. Apu nenupetele disanka dipite bunene ku tshikondo tshinudi nuya mu tulasa.