Nekuikaleku bualu bua tshikuma mu ngondo wa Kabitende anyi?

¹ Tshidimu tshia 1963 tshivua ne bualu bua tshikuma mu miyuki ya bantu ba Yehowa. Udiku mumanye ne: mbua tshinyi anyi? Tshidimu atshi, bungi bua bamanyishi mu buloba bujima buakafika ku muliyo umue. Bu wewe mu bulelela tshikondo atshi, udi mua kuvuluka mushindu utuakasanka bikole pa kumona bamanyishi bungi nunku bayisha mukenji wa Bukalenge! Tshilejilu lelu’eu, dimue dia ku matunga adi menze teritware wetu didi diodi nkayadi ne bamanyishi bapite pa bantu 108 000. Kadi, ngondo yonso, bantu bu 10 374 ba kudibu kabatu bafila luapolo lua mudimu wabu wa buambi to.

² Tuakamayi lutatu elu: Mu Kabitende, biafila yonso wa kutudi luapolo luende, netufike ku bungi bua katshia ne katshia bua bamanyishi badi mu teritware wetu mujima. Bialubuluka madikolela etu, bushuwa ngondo eu neikale ne bualu bua tshikuma! Tudi mua kufika ku tshipatshila etshi bienza muntu yonso tshiende tshitupa.

³ Aba badi balongolole bua kuya mu diikisha badi mua kupitshisha ndambu wa dîba mu buambi kumpala kua kuya. Nuangate trakte, broshire anyi bibejibeji bua numone mua kufila bumanyishi kudi bantu banudi nupetangana nabu. Kabidi, ku muaba unudi nuya bua diikisha, nudi mua kupatuka mu buambi pamue ne bamanyishi ba muaba au.

⁴ Biwikala kuyi mua kunyunga bua kabingila kampanda, udi anu ne mushindu wa kudifila mu buambi. Udi mua kufila bumanyishi kudi ba-minganga, buondapi anyi bakumbudi. Pamu’apa udi mua kufila bumanyishi ku diambuluisha dia mikanda iudi mua kufunda anyi dia telefone.

⁵ Bushuwa bamue nebanyishe bua kupeta diambuluisha bua bamone mua kudifila mu mudimu wa budimi mu Kabitende. Bakulu, basadidi ba mudimu ne balombodi ba malonga a mukanda badi ne bua kulongolola bua se: badi dijinga ne diambuluisha edi badipete. Mu mishindu yonso, kupu muoyo bua kufila luapolo luebe lua mudimu pa lukasa ku ndekelu kua ngondo bua kukubalabu bu mumanyishi mu Kabitende.

⁶ Tuanyishe bikole diakalenga edi: Mudimu wetu udi ‘tshiuma tshilenga.’ (2 Tim. 1:14, Mukanda wa Mvidi Mukulu) Tudi tuanyisha diakalenga ditupesha dia kuyisha lumu luimpe. (1 Tes. 2:4) Patudi tuela meji pa bionso bidi Yehowa mutuenzele, tudi ne bua kusakibua bua kudifila mu mudimu eu wa mushinga mutambe bukole mu bule bua tshidimu tshijima. Katuena ne bua kulekela tshintu nansha tshimue tshitupangisha bua kuyisha pa tshibidilu. Tuenzayi bua ngondo eu wa Kabitende ikale ne bualu bua tshikuma mu mudimu wa Yehowa, ne tupangadijayi bua kufila bumanyishi bua bualu buende mu ngondo yonso itshidi ilua!​—Mus. 34:1.