Utu uyisha Bukalenge pa tshibidilu anyi?

¹ Tuakasanka bonso patuakumvua ne: mu Congo-Kinshasa bamanyishi mbafike ku bungi butuvua katuyi banji kupeta bua 114 071 mu Kabitende 1999. Bushuwa, bidi bileja patoke buobumue mu madikolela avua bonso benze ne muoyo umue! Kadi mu ngondo ivua ilonda, bamue ba kudibu bakapeta lutatu lua kumanyisha Bukalenge pa tshibidilu, bimuenekele amu ku bungi buabu buakapueka kufika pabuipi ne 105 600. Bualu ebu budi buleja ne: mumanyishi 1 pa 13 ki mmudilongolole bua kupatuka mu buambi ku ngondo yonso to. Tudi batekemene se: malu adi alonda aa adi mua kutuambuluisha bua kujikija muanda eu bualu adi akankamija.

² Ikala ne dianyisha bua mudimu eu: Tudi ne bua kuikala ne dianyisha dikole bua mudimu eu mutupesha wa kumanyisha lumu luimpe lua Bukalenge kudi bakuabu. Mudimu eu udi usankisha Yehowa ne wambuluisha kabidi bantu badi basue bulelela bua kumanyabu njila udi ufikisha ku muoyo. (Nsu. 27:11; 1 Tim. 4:16) Tuetu tupatuka mu buambi pa tshibidilu, netumanye kuyisha bimpe ne netupete disanka patudi tuenza mudimu eu.

³ Fila luapolo luebe lua mudimu: Bamue bana betu batu bapua muoyo bua kufila luapolo luabu lua mudimu pa dîba. Katuedi meji ne: madikolela atuvua benze kaena ne mushinga bua kuafidila luapolo to. (Tangila Mâko 12:41-44.) Kadi tufilayi anu kufila luapolo lua mudimu utudi benze. Kuenza malu, bu mudi kuikala ne kalandriye bua kufunda bungi bua mêba atudi benze mu buambi nekuikale bu tshintu tshidi tshituvuluija ne tshituambuluisha bua kufila diakamue luapolo lujalame ku ndekelu kua ngondo yonso.

⁴ Ambuluishayi badi dijinga ne diambuluisha: Longololayi bimpe malu mu tshisumbu tshienu bua kukuatshisha aba badi dijinga ne diambuluisha bua bikale bapatuka mu buambi pa tshibidilu. Sekretere ne balombodi ba dilonga dia mukanda badi ne bua kulongolola bua bamanyishi bapiluke kukuatshishabu bakuabu mu muanda eu. Biwikala ne bana anyi balongi bakuabu ba Bible bakadi bamanyishi badi kabayi banji kutambula, baleja mua kufunda ne kufila luapolo luabu lua mudimu ku ngondo yonso.

⁵ Vuluka tshiena-bualu tshia malu a mu nsombelu tshia: “Ndi ne dianyisha bua matuku a bungi mu mudimu wa Yehowa,” tshidi mu Tshibumba tshia Nsentedi tshia dia 1 Kasuamansense 1997. Muanetu wa bakaji Ottilie Mydland wa mu Norvège wakatuadija kuyisha pa tshibidilu lumu luimpe kumpala mene kua kutambulaye mu 1921. Bidimu 76 kunyima (pakavuaye nabi 99), wakamba ne: “Ndi nsanka bua mundi anu ne mushindu wa kuikala mumanyishi wa pa tshibidilu.” Etshi ntshilejilu tshimpe tshitambe tshidi basadidi ba Yehowa bonso mua kuidikija!