Utuku ufila luapolo lujalame anyi?

¹ Miyuki mivule ya mu Bible idi itela bishiferi kampanda bisunguluke, ke tshidi tshiambuluisha bikole bua kupeta tshimfuanyi tshilelela tshia malu avua menzeke. Tshilejilu, Gideona wakatshimuna bena Midiyana anu ne balume 300 patupu. (Bal. 7:7) Muanjelo wa Yehowa wakashipa basalayi ba bena Ashû 185 000. (2 Bak. 19:35) Ku Pentekoste wa mu 33 B.B., bantu batue ku 3 000 bakatambula ne katupa kîpi pashishe bungi bua bena kuitabuja buakavula kulua 5 000. (Bien. 2:41; 4:4) Bidi bimueneka mu malu aa ne: basadidi ba Nzambi ba pa kale bavua benza muabu muonso bua kubadika ne kusangisha malu a kumanyisha mu mushindu mujalame.

² Lelu’eu bulongolodi bua Yehowa budi butulomba bua kuikala kufila luapolo lua mudimu wetu wa buambi ngondo yonso. Kutumikila ne lulamatu malu aa kudi kuambuluisha bua kulondesha bimpe mudi luendu lua mudimu wetu wa buambi. Luapolo itudi tufila idi mua kuleja tshitupa kampanda tshia mudimu wetu wa buambi tshidi tshikengela kutabalela anyi ituleja ne: bidi bikengela kuvudija benji ba mudimu muaba kansanga. Mu tshisumbu, luapolo lua mudimu ludi luambuluisha bakulu bua kujadikabu bana betu badi ne mushindu wa mua kuvudija mudimu wabu, bamanya kabidi ne bakuabu badibu ne bua kuambuluisha. Luapolo lua mushindu udi mudimu wa dimanyisha Bukalenge bua Nzambi wenda uya kumpala lutu lukankamija bena Kristo netu bonso. Utuku wenza pebe muebe muonso bua luapolo luafidibua kuikalalu lujalame anyi?

³ Bujitu bua muntu ne muntu: Bitu bikukolela ku ndekelu kua ngondo bua kuvuluka tshiuvua muenze mu buambi anyi? Pikalabi nanku, bua tshinyi kubenga kufunda bungi bua mêba audi wenza mu buambi misangu yonso iudi uyisha? Bamue batu ne kalandriye anyi kayé ta karné ka difundila. Bakuabu batu benda ne kabeji ka munda mutupu katutu tuwuja bua luapolo lua ku ngondo bua kufundapu bidibu benza misangu yonso idibu bayisha. Ku ndekelu kua ngondo ufile diakamue luapolo luebe kudi mutangidi wa kasumbu ka dilonga dia mukanda diutu ubuela. Anyi paudi musue, udi mua kuela kabeji kebe ka luapolo mu kashete ka ku Nzubu wa Bukalenge. Wewe mupue muoyo bua kufila luapolo luebe, wenze bua kuya kumonangana ne mutangidi wa dilonga dia mukanda bua kulufila pamutu pa kuindila ne: yeye alue kukulombalu. Paudi ufila luapolo luebe lujalame bidi bileja ne: udi utumikila mushindu udi Yehowa mulongolole ende malu ne kabidi udi unemeka bana betu badibu bapeshe bujitu ebu bua kuikala kusangisha ne kufunda luapolo.​—Luka 16:10.

⁴ Mudimu wa Mutangidi wa dilonga dia mukanda: Bu mudiye mulami mukazamuke ne wa ntema mivule, mutangidi wa dilonga dia mukanda udi utabalela mudimu udi kasumbu konso kajima kenza munkatshi mua ngondo mujima. (Nsu. 27:23) Mmumanye mumanyishi yonso udi wenza mudimu wa nsongo ne disanka ngondo yonso, ne mmudiakaje bua kuambuluisha mumanyishi yonso udi kayi mupatuke mu buambi ngondo au mujima. Mêyi makese a kukolesha nau muntu ku muoyo, mibelu miakanyine ta kulomba muntu bua kupatuka nende mu buambi ke tshionso tshidiye ne bua kuikala wenza misangu yonso.

⁵ Ku ndekelu kua ngondo, mutangidi wa dilonga dia mukanda udi ne bua kukeba bua kujadika bikala mumanyishi yonso wa mu kasumbu kabu mmufile luapolo luende lua mudimu bua sekretere kumonaye mua kutuma luapolo lujalame lua tshisumbu tshijima ku biro bia filiale mu dia matuku asambombo a ngondo udi ulonda. Padi ndekelu wa ngondo usemena pabuipi, mbimpe avuluije bena mu kasumbu ne ikale ne tubeji tua luapolo pabuipi muaba utubu benzela dilonga dia mukanda. Pikalaku bana betu batu batamba kupua muoyo bua kufila luapolo, udi mua kubavuluija ne kubakankamija.

⁶ Kufila luapolo lua mudimu wetu wa buambi pa lukasa kudi kuambuluisha bua kuenza luapolo lujalame ludi luleja mudimu wonso anu mushindu uvuawu muenzeke mu budimi. Newenzeku muebe muonso bua kufila pa lukasa luapolo luebe lua mudimu wa buambi lua ngondo yonso anyi?