Mandamuna Ku Nkonko Yenu

◼ Bua tshinyi tudi ne bua kufila luapolo lua mudimu ngondo yonso kakuyi dinengesha?

Buonso buetu tutu tusanka patutu tumvua bipeta bimpe bipatula mu bumanyishi bua mukenji wa Bukalenge. (Tangila Nsumuinu 25:25.) Bienzedi 2:41 (NW) udi umanyisha ne: dituku dia Pentekoste, panyima pa muyuki wa luya wa Petelo, “anyima binunu bu bisatu yakasakidibua.” Kunyima kakese, bungi ebu buakabanda ku ‘binunu bu bitanu.’ (Bienz. 4:⁠4) Mmunyipu muvua bena nkristo ba mu siekele wa kumpala ne bua kuikala basanke pa kumvua bualu ebu! Lelu’eu tutu tuandamuna bia muomumue patutu tupeta luapolo mikankamiji. Tutu tumvua disanka divule patudi tumvua ngumu ya bipeta bimpe bidi bana betu ba pa buloba bujima bapatula mu buambi bua lumu luimpe.

Bidi bikengela dîba dia bungi ne madikolela mavule bua kubadika luapolo ya mushindu’eu, nenku dieleshangana maboko dia mumanyishi wa Bukalenge yonso didi ne mushinga. Tudiku bamanye dikengedibua dia kufila luapolo luetu ngondo yonso kakuyi dinengesha anyi?

Didiunda didibu batumanyisha didi ditupetesha disanka divule. Kupita apu, luapolo idi yambuluisha Société bua kumanyaye dilubuluka dia mudimu pa buloba. Mapangadika adi ne bua kuangatshibua pa bidi bitangila miaba idi ikengela diambuluisha, disungula dia mikanda ya kupatula ne bungi buayi. Mu tshisumbu tshionso, bakulu badi bakonkoloja luapolo ya mudimu bua kujadika malu adibu mua kulengeja. Luapolo mimpe idi itukankamija ne isaka yonso wa kutudi bua kukonkonona mudimu wende bua kumonaye bitupa biawu mudiye mua kulubuluka.

Mumanyishi yonso udi ne bua kumanya bujitu buende bua kufila pa lukasa luapolo luende lua mudimu ngondo yonso. Balombodi ba dilonga dia mukanda mbakumbanyine bua kuvuluija bamanyishi bujitu ebu, bu mudibu kabidi badienzeja bua kufila diambuluisha kudi muntu ne muntu ku aba badi pamu’apa ne lutatu bua kuyisha ngondo yonso, ku musangu ne ku musangu. Badi mua kuvuluija mu Dilonga dia Mukanda dia ku ndekelu kua ngondo, peshi mu tshikondo tshikuabu tshiakanyine. Bikalaku kakuyi mushindu wa kufila luapolo ya mudimu ku Nzubu wa Bukalenge, mulombodi wa Dilonga dia mukanda neikale mua kuyisangisha ne kutabalela bua se: ifike pa dîba kudi sekretere bua kuyibalaye mu luapolo lua ku ngondo lua tshisumbu lutumina Société.

Difila dietu dia luapolo lua mudimu pa dîba ne lulamatu kakuyi dinengesha didi dipepeja mudimu wa aba badi ne bujitu bua dikala-bimpe dietu dia mu nyuma.