Mandamuna ku nkonko yenu

▪ Mbiakanyine bua kulonga Bible kabidi ne muanetu udi mujimije luya mu mudimu, padi muena mu komite wa mudimu wa tshisumbu utulomba anyi?

Bakulu badi ne bujitu bua kukuba bena mu tshisumbu, pamue ne badi bajimije luya mu mudimu. Badi babakumbula ne bela meji bua diambuluisha dia muntu pa nkayende didibu nadi dijinga. Ku musangu bitu bimueneka bia mushinga bua kulomba muntu udi mujimije luya bua kulonga nende Bible. Mukanda wa Badilongolole bua kuenza mudimu wetu bimpe udi uleja mu dibeji 102 ne: Komite wa mudimu wa tshisumbu ke udi ne bua kuangata dipangadika bua muntu udibu mua kuambuluisha mushindu eu.

Mutangidi wa mudimu udi usungula muntu udi muakanyine bua kufila diambuluisha, malu a kukonkonona ne mukanda udi mutambe kuakanyina. Pamu’apa muntu uvua mulonge ne mumanyishi udi mujimije luya eu anyi muntu udiye mumanye ne wanyisha neikale muakanyine bua kumuambuluisha. Badi mua kulomba muanetu wa bakaji mukumbane ne mupie bua kuambuluishaye muanetu wa bakaji udi mujimije luya. Pa tshibidilu, kabitu bikengela ne: mumanyishi mukuabu afile udi ulombola dilonga edi to. Muntu udibu basungule neabale mêba, makumbulula ne dilonga.​—Tangila Mudimu wetu wa Bukalenge wa Kasuabanga 1987, dibeji 3.

Bu mudi mulongi eu muikale mutambule, kabitu pa tshibidilu ne mushinga bua ne: dilonga diangate matuku a bungi to. Tshipatshila ntshia kuambuluisha muanetu udi mujimije luya eu bua kubangululaye dibuela mu bisangilu ne bua kulua kabidi mumanyishi wa lumu luimpe musuminyine. Mutangidi wa mudimu neatabalele dilubuluka dia malonga a nunku. Diambuluisha edi dia dinanga didi ne bua kufikisha bana betu aba ku diambula majitu abu kumpala kua Yehowa ne bua ‘kuela miji ne kuashibua’ mu bulelela.​—Ef. 3:17; Gal. 6:5.