Batangidi badi balombola​—Mulombodi wa dilonga dia Tshibumba tshia Nsentedi

¹ Tshibumba tshia Nsentedi tshidi tshimanyisha Bukalenge bua Yehowa ke tshiamu tshia mudimu tshia kumpala tshia “mupika wa lulamatu ne wa budimu” bua ditupesha biakudia bia mu nyuma “mu tshikondo tshiakanyine.” (Mat. 24:45, NW) Mukulu udi ulombola dilonga dia Tshibumba tshia Nsentedi udi ne bujitu bunene bu mulongeshi udi ufila tshilejilu tshimpe mu nsombelu wa buena-nkristo.​—Lomo 12:7; Yak. 3:1.

² Bua kulongesha bimpe menemene, mulombodi wa Dilonga dia Tshibumba tshia Nsentedi udi ne bua kuenza madikolela malelela bua kudilongolola lumingu luonso. Udi wenza nunku ne ntema yonso ne muoyo mujima. Ditabalela diende dikole dia tshisumbu didi dimueneka mu didienzeja bua kulenga mitshima yetu ne malu atudi tulonga. Udi ushindamena pa malu manene a dilonga ne utuambuluisha bua kumona mudiwu umvuangana ne tshiena-bualu tshia dilonga.

³ Didilongolola diende bimpe menemene didi dikonga didianjila kukebulula mifundu bua kumanya mudiyi yumvuangana ne dilonga. Udi uleja mushinga wa Dîyi dia Nzambi mu dikankamija tshisumbu bua kuenza mudimu bimpe ne Bible mu dilonga. Padiku bualu bua mushinga budibu kabayi batele mu mandamuna mafila anyi padibu bapua muoyo bua kumvuija mvese wa mushinga mu dilonga, udi wela lukonko lua pamutu bua kufilabu diandamuna pa bualu ebu. Mu dienza nunku, udi utuambuluisha bua kufika ku nkomenu mijalame ne kumanya mua kutumika ne bitudi tulonga mu nsombelu wetu.

⁴ Mulombodi wa Dilonga dia Tshibumba tshia Nsentedi udi udienzeja ku kakese ku kakese bua kulengeja ndongeshilu wende. Kêna utamba kuela nseka ya bungi kadi udi utukankamija bua kufila mandamuna​—mu etu mêyi, mu tshikoso ne adi andamuna buludiludi ku lukonko. Udi mua kutuvuluija imue misangu ne: muntu udi wandamuna wa kumpala ku tshikoso udi ne bua kufila diandamuna dîpi, ne dia buludiludi ku lukonko ludi kuinshi kua dibeji. Mandamuna adi alonda adi mua kukoka ntema ku mushindu wa kutumikila mifundu, kufila ngenyi idi ikuatshisha diandamuna, anyi kuleja buenzeji bulelela bua malu aa mu nsombelu. Mulombodi wa Dilonga dia Tshibumba tshia Nsentedi udi usaka muntu yonso bua ikale ne dijinga dia kufila mandamuna mu dilonga pa kukankamija didilongolola dia muntu nkayende ne dia mu dîku.

⁵ Mutudi “bantu balongesha kudi Yehowa,” tudi tuanyisha “mapa a bantu,” bu mudi balombodi ba Dilonga dia Tshibumba tshia Nsentedi, badi “benza mudimu mukole wa . . . kuyisha.”​—Yesh. 54:13, NW; Ef. 4:8, 11, NW; 1 Tim. 5:17.