“Nuikale ne lutulu”

¹ Bu mutudi tumona nshikidilu wa ndongoluelu mukulakaje wa Satana wenda anu usemena pabuipi, bidi ne mushinga mukole bua ‘tuikale ne lutulu’ mu dindila dituku dia Yehowa diatupikulabu. Nangananga mu tshikondo etshi tshikadi tshiye kule tshia matuku a ku nshikidilu, makole mabi adi atuluisha mmasumishe bua kusesuisha ntema yetu ku bualu bua mushinga menemene bua bumfumu bukulu bua Yehowa ne atusaka ku ditanaja mu dikebakeba kuenza malu etu nkayetu. Mu mushindu eu, Satana mmusue kututeya bua tulekele peshi tutekete mu mudimu wa diyisha Bukalenge. (Yak. 5:7, 8; Mat. 24:13, 14) Mmunyi mutudi mua kuleja lutulu elu ludi lukengedibua?

² Pa kulama didikanda: Patudi tutuilangana ne kalèngù anyi buluishi mu mudimu wetu, didikanda nedituambuluishe bua kunanukila mu buambi. Katuakuikala tutshina tshianana tshianana anyi tubungama patudi tupetangana ne bantu ba tshikisu ne bapange bulenga. (1 Pet. 2:23) Bukole ebu budi munda muetu budi mua kutukanda ku diakula ne mmuenenu mubi bua bantu ba mu teritware wetu badi ne kalèngù peshi kabayi banange mudimu wetu, bualu diakula malu a nunku didi mua kututekesha mu maboko tuetu ne batudi tuenza nabu mudimu.

³ Pa kunanukila ne lutulu: Bidi mua kutulomba lutulu lua bungi panyima pa bamane kuyukila bimpe ne muntu mu buambi, ne pashishe katutshiyi kabidi tupeta muntu eu uvua musankidile bulelela kumbelu. Mbia muomumue kabidi padi bantu batudi tulonga nabu bikale ne lujoko bua kuenza malubuluka anyi kuangata dipangadika bua bulelela. Kadi dinanukila mu lutulu ditu misangu yonso difutshibua ne bipeta bimpe. (Gal. 6:9) Muanetu wa bakaji kampanda wakapingana misangu ne misangu bua kukumbula nsongakaji kansanga bangabanga ne kutuadija nende dilonga dia Bible dilelela. Misangu itanu ya ntuadijilu pavuaye uya bua kumukumbula, uvua umusangana ne midimu mikuabu. Mu diyaku musangu muisambombo, muanetu eu wakabola bikole ne mvula ne kakasangana nansha muntu kumbelu. Nansha nanku, uvua mupangadije bua kuteta kabidi kuya kukumbulula nsongakaji eu, wakaya ne kumusanganaye mudiakaje bua kulonga. Pashishe, mulongi eu wakalubuluka ne tshisumi tshionso ne mu tshikondo tshîpi patupu wakalambula muoyo wende kudi Yehowa.

⁴ Tudi bamanye se: dituku dia Yehowa kadiakupanga kulua to. Nunku tudi bindile mushindu wajikijaye malu, bamanye se: lutulu lua Nzambi nelupatule bipeta bimpe. (Hab. 2:3; 2 Pet. 3:9-15) Tudi ne bua kuleja lutulu bu Yehowa ne katuteketshi mu mudimu wetu to. ‘Bua ditabuja ne lutulu,’ tutangile kudi Yehowa watufuta bua mudimu wetu mukole.​—Eb. 6:10-12.