Tuyishayi lumu luimpe ne dijinga dikole
1 “Ndi njinga bikole bua meme kunumona . . . Ke tshindi nsumpakena bua kunutuadila penu [“lumu luimpe,” NW].” Ke muakamba mupostolo Paulo ku mbangilu kua mukanda wende mufundila bana betu ba ku Roma. Bua tshinyi Paulo uvua ne dijinga dikole dia kubamona? Wakamba ne: “Bua mpeteku tshipeta tshilenga kunudi aku . . . Tshiena ngumvua bundu bua kulongesha [“lumu luimpe,” NW]; ke bukole bua [“Nzambi,” NW] budi bupandisha muntu yonso udi witaba.”—Lomo 1:11-16, Mukanda wa Mvidi Mukulu.
2 Paulo wakaleja dijinga dikole dimue-dimue edi pavuaye wakula ne bakulu ba ku Efeso. Wakabavuluija ne: ‘Ku dituku dia kumudilu dingakadiata makasa anyi mu Asia, tshiakatshina bua kunuyisha padi bantu bunguile, ne ku nzubu ne ku nzubu, [“tuakamanyisha lumu luimpe kudi,” NW] bena Yuda ne bena Gelika.’ (Bien. 20:18-21) Paulo uvua ne dipangadika dia kumuangalaja lumu luimpe lua lupandu mu teritware wende mujima ne bua kupeta mamuma a Bukalenge. Ndungenyi kayipu buimpe lua kulonda!
3 Tudi ne bua kudiebeja ne: ‘Ntuku ndeja dijinga dikole dia muomumue edi mu dimanyisha lumu luimpe muaba undi anyi? Pamutu pa kuangata mudimu wa buambi anu bu bujitu patupu, ntu ne dijinga dikole dia kumanyisha lumu luimpe kudi bantu ba bungi anyi? Ndiku mukonkonone ne muoyo umue nsombelu wanyi anyi? Ndiku mutete mishindu yonso idi imueneka mu teritware wetu, bu mudi diyisha ku tshiibi ne ku tshiibi, mu misesu, mu turtié tua bungenda, ku telefone ne mu mpukapuka anyi?’
4 Tuyishayi ne dijinga dikole mu Tshisanga: Ngondo wa Tshisanga ntshikondo tshimpe bua kudifila bikole mu mudimu wa diyisha. Dikepesha mêba malomba didi ne bua kuambuluisha bantu ba bungi bua kuenza bumpanda-njila buambuluishi. Pamu’apa nsombelu webe neakupeteshe mushindu wa kuenza bumpanda-njila buambuluishi mu Tshisanga ne Lumungulu. Peshi udi mua kuikala ne mushindu wa kulua mpanda-njila wa pa tshibidilu, pa kumona dishintulula dia bungi bua mêba malomba. Biwikala mumanyishi mu tshisumbu, udiku mua kupitshisha dîba dia bungi mu buambi ngondo eu ne ngondo udi ulonda kupita muutu wenza pa tshibidilu, ufila dikuatshisha kudi aba badi ne mushindu wa kuikala bampanda-njila anyi? Nebisankishe Yehowa!
5 Bamanyishi bonso ba Bukalenge badi ne bua kutungunuka ne kuleja dijinga dikole mu didifila bikole mu mudimu wa buambi anu bu Paulo. Pa kuenza muetu muonso mu mudimu netupete disanka dilelela. Paulo wakapeta disanka dia nunku mu mudimu wende wa tshijila. Nebikale bimpe bua tuetu kulonda tshilejilu tshiende tshitambe bulenga.—Lomo 11:13; 1 Kol. 4:16.