Tuvudijayi mudimu wetu wa kumanyisha lumu luimpe bualu nshikidilu udi wenda usemena
1 Tshikondo tshia dinowa ntshia disanka. Tshidi kabidi tshikondo tshia mudimu mukole. Kudi anu dîba dikese patupu bua kunowa bia pa madimi. Bena mudimu kabena ne bua kujingakana mu mudimu wabu to.
2 Yezu wakafuanyikija “nkomenu wa ndongoluelu wa malu” ne tshikondo tshia dinowa. (Mat. 13:39, NW) Tudi mu tshikondo tshia nkomenu wa ndongoluelu eu wa malu, ne dîba ndishale anu dikese bua kumanyisha lumu luimpe “pa buloba buonso buasa.” (Mat. 24:14, NW) Bu mudi nshikidilu wenda usemena bikole pabuipi, tudi ne bua kuvudija mudimu wa buambi. Bua tshinyi? Yezu wakumvuija ne: “Bintu bia kunowa bidi bia bungi, kadi bena mudimu badi banya-banya.”—Mat. 9:37, 38; Lomo 12:11.
3 Tudifilemu ne mitalu: Pakatuadija Yezu mudimu wende wa mushinga mukole wa diyisha, uvua anu ne bidimu bisatu ne tshitupa bua kukumbaja mudimu uvua mumupesha. Wakayisha ne mitalu, wamba ne: ‘Bundi nabu mbua kuambila misoko mikuabu lumu luimpe lua Bukalenge bua Nzambi; buakantuminabu mbualu ebu.’—Luka 4:43.
4 Yezu wakapesha bayidi bende meji amue-amue aa a mitalu. (Mâko 13:32-37) Ke bua tshinyi ‘ku dituku ku dituku, mu ntempelo ne mu nzubu yabu, kabakalekela kuyisha bantu ne kubambila lumu luimpe ne: Yezu udi Kristo.’ (Bien. 5:42) Kabavua bateka midimu ya mushinga mukese pa muaba wa kumpala mu nsombelu wabu to. Nansha muvuabu bakese, bakapatula bipeta bimpe bualu bakayisha lumu luimpe ‘munkatshi mua bifukibua bionso muinshi mua diulu.’—Kolos. 1:23.
5 Tudi ne kabingila katambe bunene ka kuikala ne meji amue-amue aa a mitalu mpindieu, bualu “nshikidilu wa malu onso ukadi pabuipi.” (1 Pet. 4:7, Muanda Mulenga Lelu) Yehowa mmulongolole dituku ne dîba bua nshikidilu wa ndongoluelu eu wa malu. (Mat. 24:36) Mudimu wa diyisha neujike mu tshikondo tshidi kumpala. Ke bua tshinyi tudi tutungunuka ne kuvudija madikolela etu bua kufikisha lumu luimpe kudi bantu ba bungi.
6 Pa kuvudija mudimu wetu wa kumanyisha lumu luimpe bu mudi nshikidilu wenda usemena pabuipi, netusanke bua kuambila Yehowa, bu muakamba Yezu ne: ‘Tudi bakumbaje mudimu uuvua mutupeshe bua kuenza.’—Yone 17:4, MMM.