Mandamuna ku nkonko yenu

▪ Udiku mudilongolole bua mpukapuka idi mua kulua anyi?

Matuku etu aa “bikondo ne malu kaayi matekemena” bitu misangu mivule bikebesha dijinga dia luondapu lua lukasa lukasa, ne batu batatshishangana bua kuelangana mashi. (Muam. 9:11, NW) Bua tuetu kuikala badilongolole bua mpukapuka eyi idi mua kulua, Yehowa mmufile diambuluisha mu mishindu mivule ku butuangaji bua bulongolodi buende, kadi udi utekemena ne: tuambule buetu bujitu. Mbatele malu a kutabalela bua kukuambuluisha kuinshi eku.

• Wikale dîba dionso wenda ne karte kebe kapiakapia ka “Instructions médicales/​Pas de sang.”

• Ikala mujadike ne: bana bebe batu benda ne tuarte tuabu tua bumuntu tupiatupia.

• Konkonona tshisakidila tshia Mudimu wetu wa Bukalenge wa Lumungulu 1995, tshidi tshileja mushindu wa kuelangana meji ne baminganga ne banzuji bua diondopa bana.

• Konkonona biena-bualu bidi biakula bua bintu bidi bifumina ku mashi ne mishindu ya luondapu idi kayiyi ya dielangana mashi. (Biudi mua kubala: Tshibumba tshia Nsentedi tshia dia 1 Kasuamansense 1994, dibeji 31; tshia dia 1 Kabalashipu 1990, mabeji 30-31; tshia dia 1 Luabanya 1989, mabeji 30-31; Réveillez-vous! wa dia 8 Tshisua-munene 1994, mabeji 23-27; wa dia 8 Tshimungu 1993, mabeji 22-25; wa dia 22 Kasuabanga 1991, dibeji 10 ne bisakidila bia Mudimu wetu wa Bukalenge wa Lumungulu 1995 ne wa Lumungulu 1994. Lama mamanyisha aa pabuipi bua padi dijinga dimueneka.)

• Angata dipangadika bilondeshile kuondo kebe ka muoyo biwikala mua kuitaba dikuata mudimu ne biamu bidi biendesha mashi ebe pambelu pa mubidi anyi manga adi ne bintu biangata mu mashi.

• Bangabanga ne kuya ku lupitadi, bikalaku mushindu, umanyishe bakulu bua ne: bakukuatshishe ne bamanyishe bena mu Komite wa Diumvuangana ne Mpitadi bikalabi bikengedibua. Pikala muana mutekete ke udi usama, ambila bakulu bua bamanyishe bena mu komite eu kumpala kua dîba.

Manyisha ne dishindika dionso dibenga diebe dia mashi: Luapolo idi ileja ne: bana betu bakuabu batu bindila too ne mu minite ya ndekelu bua kushisha kuambila baminganga badi babuondapa ne: ki mbasue kuedibua mashi to. Kuenza nanku kakuena kusankisha bondapianganyi ne kudi mua kutueleshisha mashi. Bikala baminganga bamanye mitabuja ebe ne dijinga diebe difunda mu mikanda mitue biala idi ileja disua diebe disunguluke, nebibambuluishe bua kukuondopabu kakuyi dielakana ne bitu nangananga bibapesha kabidi mushindu wa kusungula ngondapilu udi kayi wa diela mashi.

Bu mudi bualu budi bulomba luondapu lua lukasa lukasa mua kutukuata tshikondo kayi tshionso, nangananga paudi kuyi mubutekemene, akaja malu mpindieu bua kudiepula wewe ne bana bebe ku diedibua mashi.​—Nsu. 16:20; 22:3.