Ntshinyi tshiwambila muena Hindu?
1 Anu bu muudi mua kumanya, kudi bena Hindu ba bungi mu matunga mashilashilangane, kabidi ne mu ditunga dietu. Ebi bidi biumvuija ne: dimue edi udi mua kupetangana mu buambi ne muena Hindu. Biobi bikufikile nanku, mmunyi muwayikila ne muntu eu?
2 Vuluka malu aa: Ba-misionere batu bayishe bena Hindu ne bapatule bipeta bimpe badi bamba ne: kabiena ne mushinga bua kumanya bikole Buena-Hindu bua kumona mua kuyisha bimpe. Dibamanyisha bulelela mu mêyi makese ne bukalanga ditu misangu mivule dibakoka. Lomba bua kuanji kuyikila ne mfumu wa dîku. Bikalaye muanyishe muyuki, nebikale bipepele bua kuyisha bakuabu bena dîku. Mu mbuelelu webe, kumuleji ne: udi mulue ne mukenji udi mupite mitabuja a muena nzubu anyi ne: udi musue nuakule bua Nzambi umuepele mulelela anyi bua mifundu minsantu ya ku kalekale. Bu mudibi ne: bena Hindu ba bungi batu bangata Bible anu bu mukanda wa bena ku Mputu, udi mua kubumbusha meji aa pa kumvuija ne: Bible kêna washisha dikokesha bimue bisamba kudi bikuabu anyi kêna unemesha dikoba dimue ne upuekesha dikuabu nansha.
3 Kuata mudimu ne biamu biakanyine: Kudi broshire ibidi milongoluela nangananga bena Hindu. Broshire wa Pourquoi adorer Dieu en amour et en vérité? mmupatula mu tshiena-Gujarati ne tshiena-Punjabi. Nos problèmes—Qui nous aidera à les résoudre? mmupatula mu miakulu mikuabu 11 ya mu Inde. Broshire ibidi eyi idiku mu Mfualansa. Broshire wa “Monayi, ndi mvuija bintu bionso bipiabipia” ne wa Dieu se soucie-t-il vraiment de nous? ivua kabidi miambuluishe pavuabu bayisha nayi bena kuitabuja ba Buena-Hindu. Tudi mua kuenza mudimu bimpe ne broshire wa Utulomba ne mukanda wa Dimanya bua kulombola malonga a Bible.
4 Longololayi mushindu wa kupetangana ku mêyi: Ki mbikole bua kupetangana ku mêyi ne bena Hindu to. Badi bitaba ne: tudi mu tshikondo mudi bubi butue mushimi ne se: Nzambi neumbushe ntatu yonso ya pa buloba ku diambuluisha dia tshipupu tshinene tshikala tshilonda kudi tshikondo tshia bulelela. Udi umona mudibi bipepele bua mitabuja aa kumvuangana ne malongesha a mu Bible adi atangila matuku a ku nshikidilu, dikenga dinene ne bukua-panu bupiabupia budi kumpala. Bu mutubi ne: bena Hindu ba bungi batu bangata muoyo anu bu dilondangana dia ntatu idi kayiyi mua kujika, badi basankidila biena-bualu bu mudi nsombelu wa mu dîku, dibunda bibawu ne bukubi, ne tshidi tshitufikila patudi tufua. Mona mayuki abidi a tshilejilu audi mua kuteta:
5 Diyuki edi didi mua kusankisha tatu wa nzubu:
▪ “Ndi ngenda ntangila bantu badi baditatshisha lelu’eu bua nsombelu wa mu dîku mu matunga a bungi. Udi wela meji ne: ntshinyi tshidi mua kuambuluisha bua kulama bena mu dîku bonso pamue? [Lekela muntu andamune.] Bantu bakuabu mbamanye tshidi mifundu ya bena Hindu yamba bua bidi bitangila dîku, kadi kabatu banji kupeta mushindu wa kuyifuanyikija ne tshidi Bible wamba pa bualu ebu to. Mvua musueku tuyikile nebe pa malu adi mu Kolosai 3:12-14.” Bamane kubala mvese eu, leja muntu nshapita wa 15 mu mukanda wa Dimanya ne amba ne: “Mvua musue bua tuangateku dîba dikese dia kubala pamue nshapita eu.”
6 Nsonga udi mua kuanyisha diyuki edi:
▪ “Kakuyi mpata udi witabuja Nzambi. Udi wela meji ne: Nzambi mmutulongoluele tshinyi?” Lekela muntu andamune. Pashishe ubale Genese 1:28, ne wambe ne: “Miaba ya bungi pa buloba idi ne bantu bapite bungi ne ntatu mmitule mipuwe. Udi wela meji ne: Mufuki neanyishe bua kutuambuluisha bua kujikija ntatu itudi nayi anyi?” Mumane kuteleja diandamuna diende, keba mukanda muakanyine wa kumupesha.
7 Sanka bua bipeta bimpe: Nsongalume kampanda muena Hindu wa bidimu 22 wakaya kudi muanetu wa bakaji uvua uyisha pa kasalu ne kumulombaye bua kulonga Bible. Wakumvuija muanetu eu ne: bidimu muanda-mukulu kumpala, uvua mulonde diyuki divua pankatshi pa mamuende ne muanetu eu. Nansha muvuaye mukemeshibue kudi mandamuna makanyine a mu Bible bua ntatu ya bantu, kabiakasankisha mamuende bua kutungunuka to, ne nsongalume eu utshivua udimona muana mutekete bua kulonda bulelela nkayende. Mpindieu, bu mukavuaye mukole, uvua ujinga kumanya bia bungi. Nsongalume eu kakajimija dîba nansha. Mu matuku 23 patupu, wakajikija dilonga diende dia mukanda wa Dimanya, ne wakalomba bua kutambula ngondo inayi patupu kunyima kua tshikondo tshiakapetanganabu ne muanetu wa bakaji eu pa kasalu!
8 Muanetu wa balume mukuabu wakatuadija dilonga ne muntu mulume muena Hindu wakapetaye mu kawulu. Muntu eu uvua ne ntatu mu dibaka diende. Uvua kabidi kanuayi. Wakitaba bua ne: Ntemu eu alue kumutangila ne bayikile pa mibelu ya mu Bible idi itangila nsombelu wa mu dîku. Malongesha a mu Bible a nsombelu wa tshitembu akamulenga ku muoyo ne kuitabaye dilonga dia Bible. Yeye ne dîku diende kutuadijabu kuya mu bisangilu pamue. Kunyima kua matuku, bakayikila ne balunda ne balela babu pa bulelela. Kubangila pine apu, basambombo ba ku bantu abu bakitaba bulelela!
9 Disua dia Nzambi ndia ne: ‘bantu ba mishindu yonso basungidibue ne bafike ku dimanya dijalame dia bulelela.’ (1 Tim. 2:4, NW) Bualu ebu mbutangile kabidi bantu balume ne bantu bakaji badi mu bitendelelu bidi kabiyi bia Buena-Kristo, bu mudi Buena-Hindu. Bikala mu teritware wenu muikale bena Hindu, bua tshinyi kubenga kuya kubatangila mpindieu ne kuyikila nabu ku diambuluisha dia ngenyi mifila mu tshiena-bualu etshi?