Ambuluisha bantu badi kabayi banji kudiakaja bua kulonga mukanda wa Bible ulongesha
1. Mukanda wa Bible ulongesha utuku usankisha muntu yonso diakamue patudi tupetangana nende anyi? Umvuija.
1 Bua muntu kuluaye mutendeledi wa Yehowa, udi ne bua kumanya tshidi Bible ulongesha. Kadi, bamue bantu kabatu mu tshitendelelu tshia bukua-buena-Kristo nansha tshimue, ne kabatu bamona Bible bu Dîyi dia Nzambi to. Bakuabu mene kabatu bitabuja Nzambi ne banemeka Bible to. Mbiamu kayi bia mudimu bidi mua kuambuluisha bantu badi kabayi bitaba bua kulonga mukanda wa Bible ulongesha diakamue patudi tupetangana nabu? Malu adi alonda aa mmimanyine mu mêyi a bamanyishi ba mu matunga 20.
2. Muntu yeye mutuambile ne: katu witabuja Nzambi, ntshinyi tshitudi ne bua kukeba bua kumanya? Bua tshinyi?
2 Bantu badi kabayi bitabuja Nzambi: Padi muntu wamba ne: katu witabuja Nzambi, mbimpe kumanya bua tshinyi udi wamba nanku. Mbualu udi witaba ne: bintu mbidienzekele anyi? Mmujimije ditabuja diende kudi Nzambi bua kansungansunga kadi pa buloba apa ne bua lubombo ludi mu bitendelelu anyi? Ngua mu ditunga didibu bakandika bantu bua kabitabuji Nzambi anyi? Imue misangu ki mmubenge menemene dikalaku dia Nzambi to, kadi mbualu katu muanji kupeta dijinga dia kumuitabuja. Bamanyishi ba bungi batu bamona ne: kuebeja muntu ne: “Utu udiumvua misangu yonso mushindu eu anyi?” kutu kumuambuluisha bua kumvuija. Umuteleje kuyi umukosa ku mêyi. Patudi tumanya bua tshinyi muntu kena witabuja Nzambi, netumanye tshia kumuadamuna ne mukanda utudi mua kumupesha.—Nsu. 18:13.
3. Mummyi mutudi mua kanemeka muntu ne malu adiye witabuja?
3 Paudi wandamuna muntu, enza bua muntu kamonyi ne: udi ubipisha mmuenenu wende to. Mu ditunga dia États-Unis mbapatule lungenyi ludi lulonda elu: “Mbia mushinga bua kunemeka budikadidi budi nabu muntu nkayende bua kudisunguila tshidiye musue kuitabuja. Pamutu pa kujinga bua kutshimuna muntu ku mêyi, mbimpe kuela muntu nkonko bua yeye nkayende ele meji ne aleje tshidiye mupete mu lungenyi luende.” Mutangidi muena ngendu kampanda uvua wenza nunku, yeye mumane kuteleja muntu uvuaye mulue kutangila, uvua misangu ya bungi webeja ne: “Ukadiku muele meji mushindu mukuabu eu anyi?”
4. Mmunyi mutudi mua kuambuluisha bena Buddha?
4 Malu a Nzambi mmenyi bua bena Buddha ba bungi. Bamue bamanyishi ba mu Grande-Bretange batu basue kuenza mudimu ne broshire wa La paix et le bonheur durables: comment les trouver patubu bayisha bantu ba mushindu eu. Bobu bamane kubala mêyi a mbangilu, badi bakonkonona tshitupa tshia ne: “Existe-t-il vraiment un Créateur Très-Haut?” ne tshitupa tshia ne: “Un guide bénéfique pour tous les humains.” Pashishe badi bapesha mpindieu muntu mukanda wa Bible ulongesha ne bamuambila ne: “Nansha muudi kuyi witabuja Nzambi, kulonga Bible kudi ne mushinga wa bungi bualu udi ne mibelu ya bungi mimpe.” Mpanda-njila wa mu ditunga dia États-Unis utu uyisha muaba udi bena chine udi wamba ne: “Bantu ba bungi ba mu teritware wetu batu basue kubala. Misangu ya bungi batu babala mukanda mujima kumpala kua tuetu kubapinganyina. Kadi kabena mua kumvua bimpe mushinga wa dilonga dia Bible to. Nunku, ntu musue kufila broshire wa Lumu lumpe anu mu dituku dia kumpala adi bualu mbamuenze mu mushindu wa kusaka bantu ku muyuki.” Mutangidi wa tshijengu kampanda wa mu États-Unis utu uyisha mu teritware udibu bakula tshiena chine udi wamba ne: kudi mushindu wa kufila mukanda wa Bible ulongesha anu musangu wa kumpala utudi tumonangana ne muntu. Kadi, bidi mua kuikala bimpe bua kutuadija dilonga mu nshapita 2, udi wakula bua Bible, pamutu pa kutuadija ne nshapita wa 1 udi wakula bua Nzambi.
5. Bua tshinyi bimpe kuikala ne lutulu?
5 Bidi bilomba matuku a bungi bua muntu kuitabuja Nzambi, ke bua tshinyi mbimpe kuikala ne lutulu. Malu atudi tuambila muntu bua musangu wa kumpala kaena mua kumusaka bua kuitaba ne: Mufuki udiku to. Kadi pamuapa mu bungi bua matuku, nealue kuitaba ne: bualu ebu budi mua kuikala bulelela, anyi udi mua kuamba ne: mmumvue bua tshinyi muntu udi mua kuitaba nanku.
6. Bamue bantu ki mbanange Bible bua tshinyi?
6 Bantu badi kabayi banyisha anyi beyemena Bible: Kadi, misangu ya bungi muntu udi witaba ne: Nzambi udi mua kuikalaku katu witaba malu adi Bible ulongesha bualu katu witaba ne: Bible Ndîyi dia Nzambi to. Pamuapa udi mu ditunga mudi kamuyi bena Kristo ne utu umona Bible bu mukanda wa bukua-buena-Kristo. Anyi udi mua kuikala musombele muaba udi bantu badiamba mudibu bena Kristo kadi badifile mu malu a tshianana, umona ne: Bible kakumuambuluisha to. Tudi mua kuambuluisha muntu wa nunku bua kunangaye bikole Bible ne kuitabaye bua kulonga mukanda wa Bible ulongesha mushindu kayi?
7. Mmushindu kayi muimpe utudi mua kujula bantu nyota ya kulonga Bible?
7 Betele wa mu ditunga dia Grèce wakafunda ne: “Mushindu muimpe wa kuambuluisha bantu badi kabayi bitaba Bible ngua kumubulula ne kubaleja malu adimu. Bamanyishi ba bungi mbamone ne: Mêyi a mu Bible adi ne bukole bua bungi mu muoyo wa muntu kupita malu onso adibu bobu mua kuamba. (Eb. 4:12) Pavua bantu ba bungi bamone dîna dia Nzambi mu Bible, bakapeta dijina dikole dia kumulonga.” Betele wa mu Inde wakafunda ne: “Bulelela pa bidi bitangila muoyo ne lufu mbusankishe bikole bena Hindu ba bungi, nansha mulayi wa mu Bible wa buloba budi kabuyi kansungasunga ka bisamba.” Kuakula bua ntatu ya muaba udi bantu kutu misangu ya bungi kupesha bamanyishi mpunga wa kuleja tshidi Bible wamba bua muikala Bukalenge bua Nzambi mua kuakaja malu.
8. Ntshinyi tshitudi mua kuambila bantu badi ne mmuenenu mubi bua Bible anu bua malu adi mu bukua-buena-Kristo?
8 Muntu yeye ne mmuenenu mubi bua Bible anu bua malu a mu bukua-buena-Kristo, umuleje ne: bukua-buena-Kristo mbumvuije Bible ne malongesha ende bibi. Betele wa mu Inde wakafunda ne: “Imue misangu tutu basue kuambuluisha bantu bua kumonabu ne: Bible ki mmukanda wa bitendelelu to.” Badi baleja ne: tshitupa 4 tshia broshire wa ne: Quel est le but de la vie? Comment le découvrir?, mudibu bumvuija muvua bitendelelu bikebe mua kunyanga Dîyi dia Nzambi ne kudijimija, tshitu tshisankisha bikole bena Hindu. Mpanda-njila wa mu Brésil utu wambila bantu ne: “Bua tshinyi kuenaku mua kumanya miyuki ya bungi ya mu Bible? Bantu ba bungi batu benza nunku ne meji mimpe, kabayi benzeja muntu bua kuikala mu tshtendelelu kampanda to. Malu audi ulonga adi mua kukusankisha bikole.”
9. Muntu yeye mubenge tshidi Bible wamba musangu wa kumpala utudi tuyikila nende, bua tshinyi katuena ne bua kulekela?
9 Yehowa utu umona mu muoyo wa muntu yonso. (1 Sam. 16:7; Nsu. 21:2) Udi ukoka bantu badi ne mutshima muakane ku ntendelelu mulelela. (Yone 6:44) Bantu ba bungi ba mushindu eu kabatu banji kulonga malu a Nzambi anyi mbabambile anu kakese malu a mu Bible. Mudimu wetu wa kuyisha udi ubapesha mpunga bua “basungidibue ne bafike ku dimanya dijalame dia bulelela.” (1 Tim. 2:4) Nunku, bantu bobu kabayi bitabe tshidi Bible ulongesha musangu wa kumpala utudi tutuilangana nabu, katulekedi to. Enza mudimu ne umue wa ku mikanda yetu idi mu muakulu wenu bua kubajula nyota. Mu kupita kua matuku nudi mua kutuadija kulonga ne muntu mukanda wetu munene ututu tulongeshangana nawu Bible wa Bible utu ulongesha tshinyi menemene?
[Kazubu mu dibeji 4]
Muntu yeye muambe ne: kena witabuja Nzambi, utete kuenza nunku:
• Umukonke ne: “Utu udiumvua misangu yonso mushindu eu anyi?” bua wewe kumanya tshidiye wambidila nanku.
• Yeye muikale muena Budda, wenze mudimu ne Broshire wa La paix et le bonheur durables: comment les trouver, dibeji 9-12.
• Bikalaye witaba dilongesha dia ne: bintu mbidienze, mikanda ne filme bidi bilonda ebi bidi mua kumuambuluisha:
Biena-bualu bitu bipatuka mu Réveillez-vous! bia ne: “Hasard ou conception?”
Film wa Les merveilles de la création révèlent la gloire de Dieu
Broshire wa Une vie pleinement satisfaisante: comment? Tshitupa 4 ; La vie a-t-elle été créée? ne wa Cinq questions à se poser sur l’origine de la vie
• Bikalaye mujimije ditabuja diende kudi Nzambi bua kansungansunga ne makenga, mikanda idi ilonda eyi idi mua kumuambuluisha:
Mukanda wa Y a-t-il un Créateur qui se soucie de vous?, nshapita wa 10
Broshire wa Nzambi utuku uditatshisha bua bualu buetu anyi? tshitupa 6, ne wa Quel est le but de la vie?, tshitupa 6
• Padi muntu witaba diakamue ne: Nzambi udi mua kuikalaku, nubuele nende mu mukanda wa Bible ulongesha. Bidi mua kuikala bimpe bua kutuadija ne nsahapita 2 anyi ne tshiena-bualu tshikuabu bilondeshile nsombelu wa muntu.
[Kazubu mu dibeji 5]
Muntu yeye muambe ne: kena witaba Bible, utete kuenza nunku:
• Balayi nende nshapita wa 17 ne wa 18 mu mukanda wa La vie: comment est-elle apparue? Évolution ou création?
• Bua bena Hindu, wenze mudimu ne broshire wa Pourquoi adorer Dieu en amour et en vérité?
• Bua bena Yuda, wenze mudimu ne broshire wa Connaîtrons-nous un jour un monde sans guerre?, dibeji 3, 4-11.
• Umvuije mudi kutumikila mêyi a Bible kupesha muntu masanka. Mikanda iudi mua kuenza nayi mudimu bua kuleja muntu mushinga udi nawu Bible nyoyi eyi:
Biena bualu bitu bipatuku mu Réveillez-vous! bia ne: “De l’aide pour les familles”
Filme wa La Bible, une force dans votre vie
Broshire wa Lumu luimpe lua kudi Nzambi, dilongesha dia 9 ne dia 11; Un livre pour tous, dibeji dia 22-26; ne wa Une vie pleinement satisfaisante: comment?, tshitupa 2
Bua bena Budda, wenze mudimu ne Broshire wa La voie qui mène à la paix et au bonheur, dibeji 3-4, 5-7.
Bua ba Mizilman, wenze mudimu ne Broshire wa Ditabuja dilelela didi dikuambuluisha bua kuikala ne disanka, tshitupa 3.
Wewe uyisha muaba udi bantu kabayi bitaba Bible, mbimpe kuanji kubapinganyina misangu ya bungi pamutu pa kubaleja diakamue muaba utudi tuangatshila malu atudi tubayisha.
• Umvuije mudi milayi ya mu Bible mikumbane. Udi mua kuenza mudimu ne bintu ebi:
Filme wa La Bible: un récit historique exact, des prophéties dignes de foi
Broshire wa Un livre pour tous, dibeji dia 27-29
• Muntu yeye muebeje bua kumanya tshidi Bible ulongesha bua biena-bualu kampanda bishilashilangane, nubuele nende mu mukanda wa Bible ulongesha.
[Kazubu mu dibeji 6]
Padi muntu wamba ne: “Tshiena ngitabuja Nzambi,” udi mua kumuambila ne:
• “Ndiku mua kukumvuija mu tshikoso tshivua tshintuishe meme bua kuitabuja ne: kudi Mufuki anyi?” Pashishe umubadile malu adi mu mukanda wa Comment raisonner, dibeji 111-112, anyi numvuangane nende bua kumutuadila mukanda kampanda uvua mukusankishe pauvua muubale.
• “Kadi bu Nzambi muikalaku, buebe wewe, uvua mua kuikala musue bua ikale mushindu kayi?” Bantu batu bandamuna ne: mbasue kusemena pabuipi ne Nzambi wa dinanga, buakane, luse ne udi kayi ne kansungasunga. Umuleje ku diambuluisha dia Bible ne: Nzambi udi ne ngikadilu eyi. (Udi mene mua kuenza mudimu ne nshapita 1 wa mukanda wa Bible ulongesha, kutuadija mu tshikoso 6.)
Padi muntu wamba ne: “Tshitu ngitabuja Bible,” udi mua kumuambila ne:
• “Kudi bantu ba bungi batu pabu bamba nanku. Bamue badi bela meji ne: Bible ki mmukanda wa sianse anyi ne: mibelu ya mu Bible kayena ne mushinga.” Anji ngambilaku pebe, ukavuaku mubale Bible eu anyi? [Lekela muntu andamune. Pashishe umuleje mêyi a mbangilu adi mu dibeji 3 dia broshire wa Un livre pour tous, ne umupeshaye.] Bantu ba bungi kabatu bangata Bible ne mushinga bualu bitendelelu mbikonyangaje malongesha adimu. Musangu walonda, nenjinge bua tuakule bua tshilejilu tshidi mu dibeji 4 ne 5.”
• “Bantu ba bungi batu bamba pabu anu muudi muambe emu. Ndiku mua kukuleja tshintu kampanda tshivua tshinkemeshe bua Bible anyi? [Bala Yobo 26:7; Yeshayi 40:22, mudibu baleja ne: Bible udi wakula malu a sianse anu mudiwu.]” Bible udi kabidi ne mibelu mimpe idi yambuluisha bena mu mêku. Musangu walonda nenkupeshe tshimue tshilejilu.”
• “Tuasakidila bua tshiudi uleja. Bikala Nzambi mufundile bantu mukanda, udi wela meji ne: udi mua kuikala ne malu kayi munda muawu?” Pashishe umuleje bualu kampanda mu Bible budi bumvuangana ne tshidiye muambe.