Diyisha didi ditusunguluja
1 Bantu ba bungi batu bebeja ne: “Ntshinyi tshidi tshivuija Bantemu ba Yehowa bashilangane ne bitendelelu bikuabu?” Udi mua kuandamuna munyi? Udi mua kumvuija amue a ku malu atudi tuitabuja adi mashindamene pa Bible. Kadi ukadiku muele meji kabidi bua kuleja mushindu udi mudimu wetu wa patoke utuvuija bashilangane ne bitendelelu bikuabu anyi?—Mat. 24:14; 28:19, 20.
2 Lelu’eu, anu bena malu a Nzambi bakese ke batu badiumvua basakibue bua kumanyisha bakuabu mitabuja abu. Pamu’apa badi mua kuela meji ne: kutumikila mikenji ya Kaisa, kuikala ne nsombelu wa tshitembu anyi kuenzela bakuabu malu mimpe, nkukumbane. Kadi, kabena badiumvua benzejibue bua kuambuluisha bakuabu bua balonge tshidi Bible uleja bua kupeta lupandu to. Kadi ntshinyi tshidi tshituvuija bashilangane ne bakuabu?
3 Mudimu wetu ututu tuenza ne lukunukunu mmushilangane bikole ne midimu mienza kudi bitendelelu bikuabu. Bantemu ba Yehowa ba mu tshikondo etshi badi bayisha lumu luimpe ne tshisumi too ne ku ntengu ya buloba, pa kulonda tshilejilu tshia bena Kristo ba kumpala. Badi benza mudimu eu kukadi bidimu bipite pa 100. Tudi tuyisha bua kuambuluisha bantu ba bungi batudi mua kupeta, bua kuakajabu nsombelu wabu mu diumvuangana ne disua dia Nzambi.—1 Tim. 2:4; 2 Pet. 3:9.
4 Ndumu kayi luudi nalu kudi bantu? Udiku mumanyike bu mumanyishi wa lukunukunu wa Dîyi dia Nzambi anyi? (Bien. 17:2, 3; 18:25) Bena mutumba nebe badiku bamona kakuyi dielakana ne: kudi dishilangana pankatshi pa ntendelelu wabu ne webe, bua mudimu wa buambi uudi wenza anyi? Udiku mumanyike bu muntu utu ujinga bikole bua kumanyisha ditekemena diende kudi bakuabu anyi? Utuku ne tshibidilu tshia kupatuka mu buambi anyi? Vuluka ne: katuena tudisunguluja anu bua dîna ditudi nadi patupu to, kadi kabidi ku dienza malu adi umvuangana ne tshidi dîna adi diumvuija—kumanyisha malu adi atangila Yehowa.—Yesh. 43:10.
5 Dinanga ditudi nadi bua Nzambi ne bua muntu netu didi ditusaka bua kudifila mu mudimu wa buambi. (Mat. 22:37-39) Ke bua tshinyi tudi basue kukuatshila pa tshikondo tshionso tshidi tshimueneka bua kumanyisha mukenji wa Bukalenge kudi bakuabu anu bu muakenza Yezu ne bapostolo bende. Tutungunukayi ne kuyisha lumu luimpe ne lukunukunu kudi bantu badi basue kuluteleja. Diyisha dia mushindu’eu nediambuluishe bantu ba mitshima milulame bua ‘kujingulula ditapuluka didi pankatshi pa badi bakuatshila Nzambi mudimu ne badi kabayi bamukuatshila mudimu.’—Mal. 3:18.