Nnganyi udi mua kuitaba bua kulonga netu Bible?

¹ Muprofete Amosa wakamanyisha ne: tshiyole tshivua ne bua kulua mu ditunga dia Isalele, ‘tshiyole tshidi katshiyi bu tshiyole tshia biakudia, ne nyota idi kayiyi bu nyota ya mâyi, kadi tshiyole tshia kumvua mêyi a Yehowa.’ (Amo. 8:11) Bua kuambuluisha badi ne nzala ne nyota ya mu nyuma, bulongolodi bua Yehowa budi buabanya pa buloba bujima mikanda ya bungi idi yumvuija Bible.

² Nunku, tukadi bapatule mikanda ya Dimanya miliyo 70 ne broshire ya Utulomba miliyo 91. Patudi tulongesha bulelela, tudi tuanyisha ngakuilu mupepele ne bipeta bilenga bia mikanda eyi. Kadi, bantu ba bungi badi bapete mikanda yetu ki mbanji kutuadija kulonga netu Bible to. Ntshinyi tshitudi mua kuenza bua kubambuluisha?

³ Mukanda wonso utudi tushiya udi mua kutunzuluila dilonga dia Bible. Ela meji pa bualu buakamona mumanyishi kampanda wakalomba diakamue muntu mukaji mukuabu bua kulonga nende Bible musangu wa kumpala wakayikilaye nende ku nzubu. Muntu mukaji eu wakitaba anu pinapu. Pashishe kumuambilaye ne: “Udi muntu wa kumpala udi undomba bua kulonga nanyi Bible.” Mbantu bungi kayi mu teritware wenu bakadi ne mikanda yetu ne badi mua kuamba mêyi a muomumue? Mukanda wonso utudi tushila muntu udi ufila mushindu wa kumupinganyina ne kutuadija dilonga dia Bible.

⁴ Bu mututu misangu mivule tupeta bantu bakadi ne mikanda yetu, mmunyi mutudi mua kujula dijinga diabu dia kulonga malu adi mu mikanda yetu eyi? Ntemu umue wakakonka buludiludi muntu mukaji mukuabu bikalaye uvua ne imue nkonko pa Bible. Muntu mukaji au e kuamba amu ne: “Tòo.” Muanetu wa bakaji kusuminyina umuambila ne: “Ndi mumanye ne: udi mua kuikala ne imue nkonko.” Muntu mukaji au uvua nayi bushuwa, bualu dilonga diakatuadija musangu umue. Bua tshinyi kubenga kuebeja muntu bikalaye mua kuanyisha diandamuna didi Bible ufila pa lukonko kampanda anyi pa bualu kansanga budi bumutonde? Ikala mudiakaje bua kujula lukonko ludi lukoka ntema bikala muntu kayi ne tshia kuamba. Mayuki a nunku adi mua kubotesha njila bua dilonga dia pa tshibidilu dia malelela a nshindamenu a mu Bible.

⁵ Dilombola malonga a Bible ke bualu bua ntaku mu mudimu wetu. Bu mutudi katuyi bamanye muntu udi mua kuitaba dilonga, katuelakanyi bua kulomba yonso utudi tupetangana nende bua kulonga. Ambila Yehowa bualu ebu mu disambila, ne enza malu mu diumvuangana ne masambila ebe. Udi mua kufika ku dimona se: muntu uudi ulomba bua kulonga nende udi witaba bua kulonga!​—1 Yone 5:14, 15.