“Nushale batabale”
1 Yezu mumane kumvuija malu makole avua ne bua kuleja ne: tukadi mu matuku a ku nshikidilu wa ndongoluelu eu wa malu, wakambila bayidi bende ne: “Nushale batabale.” (Mâko 13:33, Muanda Mulenga Lelu) Bua tshinyi bena Kristo badi ne bua kushala batabale? Bualu tudi mu tshikondo tshia njiwu mikole tshia katshia bafuka bantu. Katuena ne bua kulala mu nyuma to bualu nebitufikishe ku dibenga kuikala ne dianyisha bua mudimu udi Yehowa mutupeshe mu tshikondo etshi tshia ku nshikidilu. Mmudimu muine kayi au?
2 Yehowa mmutume bantu bende bua kumanyishabu lumu luimpe lua Bukalenge buende pa buloba bujima bu ditekemena dimuepele didi bantu ne bua kuikala nadi. Patudi tushala balamate bulongolodi bua Yehowa, tudi tuleja ne: tudi bena Kristo balelela badi bamanye tshikondo tshikadibu, ne bamanye kabidi mushinga wa kuambuluisha bakuabu bua kumvuabu pabu ‘mêyi a muoyo wa tshiendelele.’ (Yone 6:68) Patudi ne lukunukunu mu mudimu eu wa mushinga mukole, tudi tuleja ne: tudi batabale mu nyuma.
3 Tuikalayi ne muoyo wa kuyisha: Bu mutudi Bantemu ba Yehowa, mbimpe tuikale ne mmuenenu muimpe bua mudimu wetu wa buambi. Dinanga ditudi nadi bua Nzambi ne bua bantu netu ke didi ditusaka bua kuyisha. (1 Kol. 9:16, 17) Patudi tuyisha, tudi mua kudisungila ne kusungila bantu badi batuteleja kabidi. (1 Tim. 4:16) Tuangatayi dipangadika dia kuikala ne tshibidilu tshia kuyisha padiku mushindu ne anu mudibi bikengela. Tuenzayi mêba a bungi mu mudimu eu wa diyisha Bukalenge bua Nzambi budi buikale mbulamatadi mutambe bulenga wapeta bantu.
4 Bualu bua mushinga mukole butudi mua kulama mu lungenyi, mbua se: mudimu wa buambi ng’wa kuenza lukasa-lukasa—bualu dikenga dinene nedilue tuetu batshikale amu tuenza buambi. Dibenga kumanya dituku ne dîba didi ditulomba bua kushala anu batabale, kuikala badiakaje dîba dionso ne kueyemena Yehowa ne muoyo mujima. (Ef. 6:18) Mudimu wa buambi udi wenda uya kumpala. Kadi dimue dituku wadiakujika.
5 Tulondayi ne lulamatu dîyi dia Yezu dia ‘kushala batabale.’ Dîyi edi didi ne mushinga wa bungi mpindieu kupita mene nansha muvuabi kumpala. Tuenzayi mudimu eu ne lukunukunu. Dituku dionso biangatshile ku lelu, tushalayi batabale mu nyuma, badiakaje ne tuenza ne lukunukunu mudimu wa Yehowa. Ee, tushalayi ‘batabale ne tuikale ne meji mapole.’—1 Tes. 5:6.