Bituku bikuambuluisha anyi?

¹ Bantu miliyo mivule badi bakeba lelu bua kumanya mushindu wa kupita ne ntatu idi ibakuata ne kupeta disanka mu nsombelu wabu. Badi babala bikole mikanda yonso idi mua kubambuluisha mu malu abu anyi beyemena tusumbu peshi bulongolodi kampanda budi mua kubapesha mibelu pa mushindu wa kulengeja malu a mu nsombelu. Pamu’apa bamue badi mua kuakula bua masanka makese adi kaayi nansha anenga adibu bapete. Pabi, pa kumona malu adiku lelu’eu, tudiku mua kuamba ne: bantu mbalonge mua kusomba mu ditalala ne kuikala ne disanka dia bungi ku diambuluisha dia mishindu idi bantu balongolole bua kufila mamanya anyi? Kabiena nanku to!​—1 Kol. 3:18-20.

² Ku lukuabu luseke, Mufuki wetu udi upesha muntu yonso udi musue kuteleja dimanya didi diambuluisha bikole kayi umufutshisha dikuta nansha dimue. Yehowa mmusue bua dilongesha diende diambuluishe muntu yonso. Mmupeshe bantu Dîyi diende difundisha ku spiritu wende bua dibalombole mu njila mululame, ne mmuenze bua se: lumu luimpe lua Bukalenge buende lumanyishibue pa buloba bujima. (Mus. 19:7, 8; Mat. 24:14; 2 Tim. 3:16) Bua kupeta disanka dia menemene mu nsombelu, tudi ne bua kuteya ntema ku mikenji ya Yehowa.​—Yesh. 48:17, 18.

³ Mibelu idi Yehowa ufila mmipite kule ne kule eyi idi muntu mua kupetela mu mikanda ya didiambuluisha nayi peshi idi bena panu mua kumupesha. Tudi mua kupeta diambuluisha dia bushuwa ne masanka a kashidi anu tuetu bikale tuteleja bimpe malu adi Yehowa mutulongoluele adi mu Dîyi diende ne adi bulongolodi buende butulongesha.​—1 Pet. 3:10-12.

⁴ Bisangilu bia tshisumbu bidi mua kukukuatshisha: Lelu’eu, bua kutuleja dinanga dia bushuwa, Yehowa udi utulongesha njila yende, ne tudi tupeta dikuatshisha patudi tuteya ntema ku malu adiye utulongesha. Bisangilu bietu bitanu bitudi tuenza ku lumingu bidi bileja patoke mudi Yehowa utukuba ne dinanga. Patudi tubuela mu bisangilu bia tshisumbu, dimanya dietu dia Nzambi didi dilua dia bungi. Patudi tusemena pabuipi ne Yehowa, tudi tulonga mua kuepuka malu mabi. Mushindu eu tudi tulengeja ngenyi yetu.

⁵ Kudi malu a bungi mu bisangilu bietu ebi. Mu bisangilu bia tshisumbu tudi mua ‘kunzulula mioyo yetu.’ (2 Kol. 6:13, Mukanda wa Mvidi Mukulu) Mmuomumue ne: kumanyangana ne bantu bakuabu ba mu tshisumbu. Patudi tukankamijangana, bidi bitukuatshisha anu bu muakamba mupostolo Paulo mu mukanda wende wakafundilaye bena Lomo. (Lomo 1:11, 12) Pakafundilaye bena Ebelu, wakadimuija ne dîsu dikole aba bavua mua kuikala babange tshibidilu tshibi tshia kulengulula bunyana bua bena Kristo.​—Eb. 10:24, 25.

⁶ Bua muntu kupetaye disanka mu nsombelu wende, udi nangananga ne bua kuenzela bakuabu malu mimpe. Badi batukankamija bua kukeba mishindu ya kuambuluisha bakuabu bua kupetabu disanka. Nunku bisangilu bietu bia bena Kristo bidi bitukuatshisha ne kabidi bikuatshisha bakuabu batudi tudia nabu bulunda. Tshidibu batulomba mbua tudifile ne muoyo umue.

⁷ Mupostolo Paulo wakamba bualu bumuebumue ebu mu mubelu wakapeshaye Timote ne: ‘Udienzeje bua kupeta malu a buimpe bua Nzambi.’ (1 Tim. 4:7) Tudi mua kudikonka ne: ‘Ntu ndienzeja panyi mushindu au anyi? Ntu ndonga mua kudikuatshisha ne malu antu nteleja mu bisangilu bia tshisumbu anyi?’ Bituikala bushuwa ne tshibidilu tshia kuteya ntema ku malu atutu tuteleja mu bisangilu ne tudienzeja bua kutumikila atudi tulonga, diandamuna dietu nedikale ne: eyowa. Mêsu etu a ditabuja adi atufikisha ku dijingulula udi mu nyima mua bana betu badi batulongesha ne kumona ne: Yehowa ke udi muikale Mulongeshi Munene wa bantu bende.​—Yesh. 30:20.

⁸ Kalasa ka Mudimu wa Teokrasi ne Tshisangilu tshia Mudimu: Bisangilu bibidi ebi mbienza bua kutuambuluisha bua tuikale benji ba mudimu ba tshishiki mu buambi. Ke tshipatshila menemene tshia Kalasa ka Mudimu wa Teokrasi: kalasa ka balongi badibu balongesha ne bapesha mibelu misangu ne misangu. Udi ne mushindu wa kuleja muudi wenda ulua ngamba-malu ne mulongeshi mupiluke wa Dîyi dia Nzambi. Kadi bua kalasa aka kukukuatshishaku bia bungi, udi ne bua kudifundishamu, kubuelamu, kuenzamu midimu pa tshibidilu ne kudifila ne muoyo mujima bua kulongolola midimu idibu bakupeshamu. Paudi witaba mibelu idibu bakupesha ne uyitumikila, neumanye mua kulongesha bimpe.

⁹ Tshisangilu tshia Mudimu tshidi tshitulongesha mushinga wa mudimu wa buambi ne tshituleja mushindu utudi mua kuenza mudimu wetu wa dienza bayidi. Malu adibu batulongesha mu bisangilu bibidi ebi adiku akukuatshisha wewe ne dîku diebe bikole anyi? Bena Kristo babidi, mulume ne mukajende badi bamba ne: “Mu tshimue Tshisangilu tshia Mudimu, tuakateleja batuambila ne: tudi ne bua kuikala tukonkonona mvese wa dituku ne dîku dietu. Kumpala katuvua tuenza nanku to, kadi mpindieu ke tshitukadi tuenza.” Ndikuatshisha kayi didibu bapete? Badi bamba ne: “Tudi balue kumona ne: mayuki etu ku mesa adi asankisha bikole. Kakutshiena dikokangana dîba ditudi tudia to.” Bisangilu bidiku biambuluisha nansha bana batekete anyi? Eyowa, bidi bibakuatshisha. Mamuabu udi wamba ne: “Mbimueneke mpindieu ne: bisangilu bidi biambuluisha bana bikole. Lumue lumingu tuakajikila muananyi wa balume wa bidimu bisambombo ulonda malu a dishima. Kadi anu luine lumingu alu mu tshisangilu, muyuki wa ndongeshilu e kuakula bua dishima. Muananyi eu wakatangila tatuende ne bundu ku mêsu, kualalamaye mu nkuasa wamba kubuela mu buloba. Wakadibela ne kakidikija kabidi to.”

¹⁰ Muanetu mukuabu wa bakaji udi mpanda-njila udi wamba ne: utu usanka bua mutubu batubela mu Tshisangilu tshia Mudimu bua kulengeja mudimu wetu. Bua tshinyi? Udi umvuija ne: “Ntu ne ngenzelu umue-umue wa mudimu. Imue misangu ntu ngela meji ne: malu adibu baleja mu Mudimu wetu wa Bukalenge kaakungambuluisha to. Kadi pangakumvua bamba mu Tshisangilu tshia Mudimu ne: tudi ne bua kuteta mudibu baleje, ngakumvua disanka dia bungi ne biakansaka bua kulonda mibelu eyi. Idi ivuija mudimu wa buambi mulenga be!” Kunyima kua mbingu ya bungi yakalondaye mubelu wa kuteta kutuadija dilonga dia Bible musangu wa kumpala udiye umonangana ne muntu, wakatuadija kulonga diakamue ne nsongakaji mukuabu uvua usambila bua kupeta diambuluisha.

¹¹ Paudi uteleja muyuki udi ne mibelu ya mu Bible pa bidi bitangila malu autu musue kuenza, utuku umvua ne: udi Yehowa wambila malu aa ng’wewe anyi? Muanetu mukuabu wakadiumvua nanku. Wakamba ne: “Matuku apitshi aa mu tshimue tshisangilu, muanetu kampanda wakenza muyuki uvua umvuija mishindu ya dijikija lutetuku ivua miakanyine bua muena Kristo ne ivua kayiyi miakanyine. Mvua munange kutangila ku televizion dinaya dia dielangana mbata (anyi bokse). Kadi kunyima kua tshisangilu atshi, ngakapangadija bua kuteka dinaya edi mu mulongo wa mishindu ya dijikija mukodi idi kayiyi mua kuikala mimpe bua muena Kristo. Too ne ku lelu tshitu kabidi nditangila to.” Eyowa, nansha muvua muanetu eu mulue kunanga bikole dinaya dia tshikisu edi, wakitaba ne budipuekeshi buonso mibelu ya Yehowa.​—Mus. 11:5.

¹² Muyuki wa Patoke, Dilonga dia Tshibumba tshia Nsentedi, ne Dilonga dia Mukanda dia Tshisumbu: Miyuki ya patoke itutu tuteleja lumingu luonso itu yakuila pa biena-bualu kabukabu bia mu Bible. Ntshinyi tshiutu ukuata mu miyuki eyi? Muena Kristo kampanda wakalonda bua muvuabi bimukuatshishe wamba ne: “Muyuki wa patoke mukuabu uvua wakula bua mamuma a nyuma onso. Ngamba-malu wakumvuija bua bivua bimutangila yeye muine ne: bua kufika ku dikolesha mamuma a nyuma aa, uvua usungula ngikadilu umue ne udienzeja mu lumingu lujima bua kumukolesha. Ku ndekelu kua lumingu, uvua ukonkonona bua kumanya muvuaye muleje ngikadilu eu mu bienzedi biende. Pashishe, lumingu luvua lulonda, uvua udienzeja kabidi bua kukolesha ngikadilu mukuabu. Ngakanyisha lungenyi alu bikole ne meme kutuadija panyi kuenza nanku.” Edi nditumikila dia malu malonga dilenga be!

¹³ Dilonga dia Tshibumba tshia Nsentedi didi ditulongesha bua kutumikila mêyi a mu Bible patudi mu nsombelu mishilangane. Didi dituambuluisha bua kutukija meji ne muoyo nansha mudi nsombelu muikale wa tunyinganyinga. Dilonga dia Tshibumba tshia Nsentedi didi kabidi dituendesha tshiapamue ne bulelela budi buenda buvulangana. Tshilejilu, katuvuaku banyishe dilonga dia biena-bualu bia mu Tshibumba tshia Nsentedi tshia dia 1 Lumungulu 1999, bivua ne mitu ya bualu eyi: “Malu aa adi ne bua kuenzeka,” “Mubadi ajingulule bualu ebu,” ne “Ikala mutabale ne muena mitalu!” Mmunyi muvua biena-bualu ebi bikuambuluishe wewe? Udiku uleja mu bienzedi biebe ne: udi mulame mu mutshima webe didimuija dia Yezu bua matuku atshilualua anyi? Udiku udilongolola bua kutantamena mateta alua kumpala patuamona ‘tshintu tshibipe tshidi tshikebesha kabutu tshimane mu muaba munsantu’ anyi? (Mat. 24:15-22, NW) Bipatshila biebe ne nsombelu webe bidiku bileja ne: tshintu tshidi ne mushinga ku mêsu kuebe ki ndidivudijila biuma ne bintu to, kadi nditumbisha dîna dia Yehowa anyi? Mu Dilonga dia Tshibumba tshia Nsentedi, katuenaku tulonga malu adi atukuatshisha mpindieu anyi?

¹⁴ Elabi meji bua bungi bua malu atutu tulonga mu Dilonga dia Mukanda dia Tshisumbu lumingu luonso. Matuku aa tudi tulonga mukanda wa mu Bible wa Danyele. Mu ngondo inayi eyi itukadi benze mu dilonga dia mukanda wa mu Bible eu, katuenaku bumvue ditabuja dietu dienda dikola lumingu luonso anyi? Anu bu muvua Danyele muprofete munanga wa Yehowa, tudi tukolesha ditabuja dietu bua kumona mua kutantamana.

¹⁵ Yehowa udi utulongesha bua kusomba mu disanka: Tudi tuepuka tunyinganyinga patudi tuteya ntema ku mikenji ya Nzambi.Tudi kabidi tumanya tshidi kuikala ne nsombelu wa disanka kumvuija menemene. Patudi tulonda mushindu udi Yehowa utulombola, tudi tulua benji ba mudimu wende, ki mbabandidi patupu to. Ne aba badi benza mudimu wa Nzambi mbantu ba disanka.​—1 Kol. 3:9; Yak. 1:25.

¹⁶ Ikala wela meji mushindu uwatumikila malu audi uteleja mu bisangilu bia tshisumbu. (Yone 13:17) Kuatshila Nzambi mudimu ne musangelu wonso, ne muoyo webe mujima. Disanka diebe nediule tente ne pa mishiku. Nsombelu webe neikale ne malu malenga a bungi, neikale wa mushinga. Bulelela, nebikuambuluishe.