Tukoleshayi dijinga dia bantu dijula kudi Ngumu ya Bukalenge No. 36
1 Ukadi mujikije kuabanya Ngumu ya Bukalenge No. 36 yonso ivuabu bakupeshe anyi? Trakte eu udi wela lukonko pa dîba dialu ludi bantu bonso mua kudiela: “Bidimu tshinunu bipiabipia—Mmalu kayi adi matuindile kumpala eku?” Pakavua tshidimu tshia 2000 pabuipi, bantu bavua batekemene malu a bungi mashilangane mu bidimu tshinunu bipiabipia ebi. Trakte wa Ngumu ya Bukalenge No. 36 udi ne amue malu avua bantu batekemene aa, utuvuluija kabidi ne: nsombelu udiku lelu kêna upesha bantu mushindu wa kutekemena bualu bulenga nansha bumue to. Bidimu tshinunu bikala mua kutuala ditalala ne bukubi bidi bantu ba bungi bakeba bidi anu bia Bukokeshi bua Kristo Yezu. Ditekemena dia menemene edi ditudi nadi dia Bukalenge buende nditusake bua kuabanyina bantu bonso batuvua tupetangana nabu Ngumu ya Bukalenge No. 36.
2 Mushindu udi bantu bangata Ngumu ya Bukalenge: Diabanya dia Ngumu ya Bukalenge misangu mishale diakatupetesha bukole buvule bua kuenza mudimu. Filiale wa mu Canada wakafunda bua Ngumu ya Bukalenge No. 35 ne: “Kampanye ka pa buaku aka bavua bakatue nyama ku mikolo ne musangelu wonso kudi bamanyishi ne bampanda-njila mu budimi, kupatukaku malu a bungi mu mudimu eu adi atukankamija.” Kakuyi mpata, nudi penu baleje ne: nudi ne musangelu eu bua diabanya dia Ngumu ya Bukalenge No. 36.
3 Kampanye ka mpindieu ka diabanya dia Ngumu ya Bukalenge nekaye too ne mu dia 17 Kasuabanga 2000. Nukadi bajikije teritware wa tshisumbu tshienu yonso mujima anyi? Binuikala kanuyi bamujikije, bakulu badi mua kunulomba bua nutungunuke ne kampanye aka too ne ku ndekelu kua ngondo wa Kasuabanga eu.
4 Ntshinyi tshidi bantu benza katshia nuabanya Ngumu ya Bukalenge No. 36 muaba unudi basombele? Bantu bakese ke buuja kabeji kadi kuinshi kua trakte bua kulomba broshire wa Utulomba ne (peshi balomba anu) dilonga dia Bible. Kadi, ba bungi ba ku badi bajinga kumanya bivule pa tshiena-bualu tshia bidimu tshinunu etshi nebatuadije pamu’apa kuya kumpala anu padi Ntemu wa Yehowa kampanda ubapinganyina. Mbimpe kupinganyina bantu bonso badi basue kumanya bia bungi. Ndîba kayi dimpe diudi mua kubapinganyina? Kuena ne bualu bua kupitshisha matuku to.
5 Mona malu avua mapatuke ku mudimu wa dipinganyina bantu bavuabu bashile Ngumu ya Bukalenge No. 35. Mu ditunga dia Irlande, mpanda-njila mukuabu wakashila muena restoran (nzubu wa tshidilu) Ngumu ya Bukalenge. Mukenji uvuamu wakatuila mukaji au ku muoyo e kulombaye mpanda-njila bua amupinganyine. Mpanda-njila kumupinganyinaye kunyima kua matuku abidi, kutuadijabu kulonga nende Bible. Mu ditunga dia Danemark, bakashiya trakte umue wa Ngumu ya Bukalenge ku nzubu kuvua kakuyi muntu. Anu dimue dimue adi muntu mukaji muena kumbelu aku kutuminaye biro bia filiale kabeji ka kuinshi kua trakte eu kamana kuuja, ke biro pabi kukatumina tshisumbu tshia muaba uvuaye musombele. Kumpala kua lumingu alu kujikalu, bana betu babidi ba bakaji kuya kumutangila, kulongolola bua kutuadija kulonga nende Bible, yeye e kubuelaye wende musangu wa kumpala mu bisangilu ku Nzubu wa Bukalenge!
6 Tshia kuamba paudi upinganyina muntu: Kupinganyina bantu bavua bangate Ngumu ya Bukalenge ki mbualu bua lutatu to, kadi ntshitupa tshia mudimu wetu tshitu tshitusankisha. Paudi upinganyina muntu, mbimpe wewe kuikala ne trakte umue wa Ngumu ya Bukalenge No. 36 bualu muntu uudi uyila udi mua kuikala katshiyi ne wende. Udi mua kuteta kuenza nunku.
7 Wewe mumane kuvuluija muntu ne: udi kampanda, udi mua kuamba pashishe ne:
▪ “Mvua mukushile dibeji divua ne tshiena-bualu ne: ‘Bidimu tshinunu bipiabipia—Mmalu kayi adi matuindile kumpala eku?’ Kabienaku bitukankamija patudi tubala ne: mu katupa kîpi emu Bukokeshi bua Bidimu Tshinunu bua Yezu Kristo nebutuadije, bututuadila nsombelu muimpe mu Mparadizu pa buloba apa anyi? [Muleje bimfuanyi bia Mparadizu bidi mu Ngumu ya Bukalenge No. 36.] Panyima pa dibeji edi badi bakuambila bua ulombe broshire wa Ntshinyi tshidi Nzambi utulomba?” Muleje broshire, bulula pa dilongesha 5, ubale lukonko lua kumpala ne tshikoso tshia 1 ne 2, nunku umulombe bua akulaku. Bala mvese umue anyi ibidi ne uyumvuije. Bikalaku mushindu, udi mua kubala lukonko lukuabu ne tshikoso, pashishe numvuangane bua wewe kupingana bua kutungunuka ne diyuki.
8 Bu mutudi ne bua kufila broshire wa “Utulomba” ne mukanda wa “Dimanya” panyima pa trakte eu mu ngondo wa 11, udi mua kuamba ne:
▪ “Pamvua mulue kukutangila musangu mushale, mvua mukushile trakte wa ‘Bidimu tshinunu bipiabipia—Mmalu kayi adi matuindile kumpala eku?’ Mu trakte amu mbaleje ne: badi mua kukuleja mua kulonga Bible kuyi ufuta tshintu to. Ndi mulue bua kukuleja mukanda utu utuambuluisha bua kulonga Bible. [Muleje broshire wa Utulomba, kudimuna ku dibeji dia panyima; anyi uleje mukanda wa Dimanya, bulula mu dibeji dia 188-189.] Bidimu tshinunu bidibu bakuile bualu buabi mu Bible nebitutuadile nsombelu wa buena uudi umona mu bimfuanyi ebi. Bua kupeta muoyo mu Mparadizu, tudi ne bua kuanji kupeta dimanya dijalame dia Nzambi. Suaku nkulejeku mu tshikoso mushindu ututu tulonga Bible.”
9 Diabanya dia Ngumu ya Bukalenge No. 36 nditupeshe muoyo wa kuenza mudimu wa buambi mukole, kuyisha bikole. Pamu’apa ndijule bantu ba bungi ba mu teritware wenu kabidi dijinga dia kumanya bivule. Bukole butudi tuenza bonso pamue bua kukolesha dijinga dia bantu edi (katuyi tupua muoyo diambuluisha dia Yehowa) nebutuambuluishe bua kupeta bantu ba bungi badi bafuane mikoko ne disanka dionso.—Mat. 10:11; Bien. 13:48, 49, 52.