Mandamuna ku nkonko yenu

▪ Mmunyi mudibu mua kuambuluisha muanetu udi katshiyi kabidi wenza mudimu wa buambi kukadi matuku a bungi bua kutuadijaye kabidi kumanyisha lumu luimpe?

Mbualu bua disanka menemene padi muanetu ukadi mulekele dienza mudimu wa buambi umueneka ne: udi ne dijinga dia bushuwa dia kusadila Yehowa. (Luka 15:4-6) Pamu’apa, muanetu au uvua mulekele buluishi anyi ntatu ya mu nsombelu imupangisha mua kuikalaye udilongela, ubuela mu bisangilu ne mua kupatuka mu buambi. Mmunyi mudibu mua kumuambuluisha bimpe bua kukolaye mu nyuma?

Tuetu bonso tudi ne bua kujadikila muanetu eu mutudi bamunange bushuwa anu mutu bena-Kristo banangangane. Bakulu ke badi ne bua kuteta ne lukasa luonso bua kujadika tshidiye natshi dijinga menemene mu nyuma. (Yak. 5:14, 15) Bikala matuku adiye muimanyike mudimu eu kaayi manji kuikala a bungi, mumanyishi mupiluke udi mua kuambuluisha mukuetu eu bua abange kabidi mudimu wa buambi. Kadi bikala muanetu ukadi muimanyike mudimu eu muenze matuku mapite bungi katshiyi umueneka mu tshisumbu, nebikengele pamuapa kuenza malu makuabu bua kumuambuluisha. Bua kukolesha ditabuja ne dianyisha diende, bidi mua kuikala bimpe bua kulonga Bible ne muanetu au mu mukanda udi muakanyine. Nanku, mutangidi wa mudimu nealongolole bua mumanyishi mupiluke kuikalaye ulombola dilonga edi. (Eb. 5:12-14; Tangila Mandamuna ku nkonko yenu mu Mudimu wetu wa Bukalenge wa Kasuabanga 1998.) Wewe mumanye muntu udi dijinga ne diambuluisha dia nunku, wambile mutangidi wa mudimu wa mu tshisumbu tshienu.

Bangabanga ne kulomba muanetu uvua muimanyike mudimu wa buambi kukadi matuku a bungi eu bua kubangaye kabidi kuyisha, mbimpe bakulu babidi bapetangane nende bua kumona bikalaye ukadi mukumbane bua kulua kabidi mumanyishi wa Bukalenge. Nebaye ne malu anu mutubu benza patubu bayikila ne bantu bapiabapia badi bajinga kulua bamanyishi ba lumu luimpe. (Tangila Tshibumba tshia Nsentedi 15 Kasuabanga 1988, dib. 17 [Mfual.].) Muanetu ukavua muimanyike mudimu eu udi ne bua kuleja ne: udi ne dijinga dilelela dia kumanyisha bakuabu lumu luimpe. Bidi kabidi bikengela bua kukumbajaye malu malomba adi mu dibeji dia 97-99 mu mukanda wa Mudimu wetu ne ikale ubuela mu bisangilu misangu yonso.

Kuikala ne programe muimpe wa malu a mu nyuma nekuambuluishe muanetu udi upingana mu mudimu eu bikole bua kukoleshaye malanda a mushinga adiye nawu ne Yehowa ne kualama. Programe muimpe wa malu a mu nyuma neamuambuluishe kabidi bua kutungunukaye ne kuenda mu njila udi ufikisha ku muoyo wa kashidi. (Mat. 7:14; Eb. 10:23-25) Kuenza malu ne “disuminyina dionso” ne kulonga mua kupeta ngikadilu minene ya buena-Kristo nekumuambuluishe bua kalu kabidi muyidi muena Kristo ‘muatuke ne mupange mamuma.’​—2 Pet. 1:5-8.