Utu uyisha ne dikima anyi?
1 Petelo ne Yone bakatungunuka ne kuyisha mukenji wa Bukalenge ne dikima nansha muvuabu babakuata ne babakanyina kudi baluishi babu. (Bien. 4:17, 21, 31) Buetu tuetu lelu, kuyisha ne dikima ntshinyi?
2 Tuyishayi ne dikima: Muaku mukuabu udi ne diumvuija dia muomumue ne dia “dikima” “m’bukitu,” mbuena kuamba ne: “kupangadija bua kuenza bualu kuyi utshina, kupanga buôwa, kuikala muena muoyo mukole, muntu udi mumanye mua kutantamana.” Bua bena Kristo balelela, kuyisha ne dikima mmuomumue ne: kuakula kakuyi buôwa dîba dionso didiku mushindu wa kuyisha bantu bakuabu lumu luimpe. (Bien. 4:20; 1 Pet. 3:15) Mbuena kuamba ne: katuena tumvua bundu bua kuyisha lumu luimpe to. (Mus. 119:46; Lomo 1:16; 2 Tim. 1:8) Nunku, dikima ke ngikadilu utudi ne bua kuikala nende bua kumona mua kukumbaja mudimu wa kuyisha lumu luimpe lua Bukalenge, udibu batupeshe mu tshikondo tshia ku nshikidilu etshi. Dikima didi ditusaka bua kuyisha bantu lumu luimpe miaba yonso itudi mua kubapeta.—Bien. 4:29; 1 Kol. 9:23.
3 Ikala ne dikima mu kalasa: Buôwa ne bundu bitu bikupangisha bua kuyisha balongi nebe anyi? Imue misangu kabitu bualu bupepele to; ne bidi mua kulua mene lutatu lukole. Kadi nansha nanku, Yehowa neakukankamije wewe mumulombe bua akupeshe dikima didi mua kukuambuluisha bua kuyisha bakuabu. (Mus. 138:3) Dikima nedikuambuluishe bua udimanyishe ne: udi Ntemu wa Yehowa; ne kabidi bua kabikutondi nansha buobu bakuseka. Ndekelu wa bionso, diyisha diebe mu kalasa didi mua kupandisha badi bakuteleja.—1 Tim. 4:16.
4 Dikima ku mudimu: Mbakumanye ku mudimu ne: udi Ntemu wa Yehowa anyi? Anu wewe ke udi ne mushindu wa kuyisha bena mudimu nebe aba bua lumu luimpe lufike ku matshi abu. Dikima nedikuambuluishe kabidi bua kulomba diikisha ku mudimu bua kubuela mu bisangilu ne mu mpungilu.
5 Ikala ne dikima padibu bakukengesha: Dîba didiku buluishi ke dîba dia kuleja dikima. (1 Tes. 2:1, 2) Dikima didi dituambuluisha bua kushala ne ditabuja dikole nansha padibu batukanyina, batuseka anyi batukengesha. (Filip. 1:27, 28) Didi ditukolesha bua kushala bakandamane padibu batuenzeja ku bukole bua kutupa ku mêyi a Yehowa Nzambi atudi balamate. Didi ditukankamija bua kuleja mutudi bena ditalala padi bakuabu bajula ndululu.—Lomo 12:18.
6 Nansha tuetu ne ntatu ya mushindu kayi, tuyishayi lumu luimpe ne dikima katuyi tulekela.—Ef. 6:18-20.