“Balongeshi ba Dîyi dia Nzambi”: Mpungilu wa Distrike wa Bantemu ba Yehowa bua tshidimu tshia 2001
1 Muprofete Yeshaya wakaleja mudi Yehowa muikale Mulongeshi Munene, udi ubela bantu bende anu musombele tatu mua kuenza. Wakamba ne: ‘Njila n’yeye eu, endelamu.’ (Yesh. 30:20, 21) Kadi, mmushindu kayi utudi mua kumvua mêyi adi Yehowa wamba bua diakalenga dietu? Yehowa udi wambila bantu bende malu ku diambuluisha dia Bible ne mikanda idi ituambuluisha bua kumvuija malu adimu, bisangilu, malu a mu mpuilu ya tshijengu, ne mpungilu ya distrike idi “mupika wa lulamatu ne wa budimu” ulongolola. (Mat. 24:45, NW) Tudi mua kuleja Yehowa dianyisha bua mudiye utungunuka amu ne kutulombola mu njila utudi ne bua kuendela.
2 Tshidimu tshionso, mpungilu wa distrike utu utupesha mushindu wa kusangila ne bana betu ne kuteleja ne ntema malu adi Yehowa utulongesha. Tshidimu tshishale, bantu binunu ne binunu bakabuela mu mpungilu wa “Benji ba Dîyi dia Nzambi” uvua mubakoleshe mu nyuma. Mu tshidimu tshia 2001, Mpungilu wa Distrike wa matuku asatu udi ne tshiena-bualu ne: “Balongeshi ba Dîyi dia Nzambi” neenzeke mu Congo-Kinshasa ne mu Congo-Brazzaville.
3 Mpungilu yetu ya distrike ya mu tshidimu tshia 2001 neyitupeshe kabidi mushindu wa kusamuna Yehowa pamue ne bana betu badi “bamanye bupele buabu bua mu nyuma” ne bikale ne dijinga dikole dia “kuteleja tshidi spiritu wambila bisumbu.”—Mat. 5:3, NW; Buak. 2:29, NW.
4 Newikalemu anyi? Dianjila kudilongolola ku mpindieu. Angata dipangadika dia kuikalamu matuku onso asatu a didia dilenga dia mu nyuma edi bituadijile ku musambu wa mbangilu too ne ku disambila dia nkomenu. Pa tshibidilu mpungilu wa kubuela ng’udibu benzela pabuipi ne muaba uudi musombele. Société mmutupepejile malu pa muanda eu. Mbasakidile muaba mukuabu wenzekela mpungilu ku eyi ya tshidimu tshishale bua tuetu kupeta mushindu wa kudia biakudia bia mu nyuma ebi pamue ne bena dietu bonso. (Dut. 31:12) Bidi bikengela kumanya tshiudi ne bua kuenza bituadijile mpindieu bua kupeta makuta a njila bua bena dîku dienu. Bamue bavua benze muabu muonso bua kubuela mu mpungilu wa distrike wa tshidimu tshia 2000. Muanetu mukuabu wa bakaji ne bayende ne bana babu babidi bakenda kilometre 150 lua makasa bua kufika muaba uvua mpungilu ne bua kuenzekela. Muanetu wa bakaji eu ukavua pa kulela muanende muisatu ne lumingu luvua mpungilu awu ne bua kuenzeka ke luvua luende lua kulela. Disanka divuabu nadi pa kumona muvua bana betu bakuabu bapita baya ku mpungilu diakabasaka bua kumatabu pabu mu njila batangile muaba uvua mpungilu ne tshia kuenzekela. Bamane kuenda kilometre 70, muanetu eu e kulelaye muana mulenga wa mubidi muimpe. Dîku adi diakatungunuka ne luendu munkatshi mua butuku, kufikabu pa dîba e kubuelabu mu mpungilu mujima mu matuku onso asatu. Bua kuleja dianyisha bua malu adi Société mulongolole, tudi ne bua kuenza muetu muonso bua kubuela mu mpungilu mu 2001.
5 Miaba ya kulala: Pa tshibidilu, bana betu ke badi bafila miaba ya kulala. Nunku tulejayi dianyisha kudi bana betu badi bitaba bua kutupesha miaba ya kulala. Kabidi, nansha buobu mua kutuakidila mushindu’eu, katujingi bua batuteke matuku a bungi kumpala ta kunyima kua mpungilu to. Bana betu badi bafila miaba ya kulala anu bua matuku a mpungilu. Padibu batupesha miaba ya kulala, tudi ne bua kunemeka bintu bia bende bia muena nzubu, katunyangi kantu nansha kamue, katuena ne bua kuya miaba idibu kabayi batupeshe bukenji bua kubuela ne mbimpe tuikale ne dîsu dikole bua bana benze pabu bia muomumue. Bikala bena nzubu ne lutatu kampanda pa bualu ebu, badi ne bua kumanyisha diakamue tshibambalu tshia miaba ya kulala ne tshiotshi netshibambuluishe. Bua tshibambalu etshi kuendatshi bimpe, tuetu bonso tudi ne bua kueleshangana diboko. (Eb. 13:17) Bavua batumanyishe ne: kudi bamue bana betu batu babenga ku bukole miaba idibu babapesha bua kutudila, baya pamu’apa kua mulunda wabu peshi mumanyangana nabu kampanda. Ngenzelu eu udi ukondakaja mudimu wa bana betu badibu buomekele bujitu bua Tshibambalu tshia miaba ya kulala. Tudi tunulomba bonso bua nutumikile bionso bidi tshibambalu etshi tshilongolole.
6 Kakuyi mpata, Yehowa udi ukuatshisha bionso bitudi tuenza bua mpungilu yetu ya ku tshidimu. Bu mudi bana betu ba bungi batu benza ngendu bumbukila kule bua kubuela mu mpungilu wa distrike bikale dijinga ne kua kutudila, Yehowa kakubalekela to, neabambuluishe bapete kua kutudila. Bu mudi ntendelelu mulelela muikale ulomba malu aa, tudi ne bua kulonda ne disanka mêyi adibu bafile aa. Tulejayi ne: tudi bena lulamatu nansha mu tu-malu tua tukese tukese; nenku netupete masanka a bungi adi Yehowa mulaye bantu badiye munange—Luka 16:10.
7 Tuditatshishayi bua badi kabayi ne mushindu: Bakulakaje peshi balema, basadidi ba ku dîba ne ku dîba anyi bantu bakuabu badi pamu’apa bakeba wa kubambuluisha bua kumonabu mua kubuela mu mpungilu. Bena mu mêku abu, bakulu ta bena mu tshisumbu badi bamanye tshidibu natshi dijinga badi mua kubambuluisha ne dinanga pamutu pa kushila bana betu badi balongolola mpungilu bujitu ebu.—Tangila 1 Timote 5:4.
8 Tudilongololayi bua kuikalaku matuku onso asatu: Satana mmutete kumbusha ntema yebe ku malu a mu nyuma anyi? Bia dibungama, bana betu ba bungi ne mêku abu batu badipangisha biakudia bia mu nyuma bia mushinga mukole ebi. Mushindu kayi? Batu bapumbisha mpungilu wa mu Ditanu. Imue miaba bana betu ba bungi bavua bapangile dilongesha dia mu nyuma ne bulunda buvuabu mua kudia ne bakuabu mu Ditanu. Mbimueneke ne: bakuabu bakabenga bua kuya mu mpungilu bualu bivi bakashala kubiba bintu mu nzubu pavuabu kabayiku. Bua kuepuka malu a buena aa, bamue batu bumvuangane ne bena mêku abu badi kabayi Bantemu bua kubashadilabu ku nzubu dîba didibu baya mu mpungilu ne bena diabu.
9 Mmalu kayi mimpe atutu tupeta mu mpungilu yetu? Muanetu mukuabu uvua malu a mu dinaya dia drama wa “Bilejilu bidi bitudimuija matuku etu aa” matuile ku muoyo wakamba ne: “Tshiena-bualu etshi ntshiakanyine tshikondo tshitudi etshi bualu tshidi tshifuanangane ne tshikondo tshivua bena Isalele mu tshipela pakavuaku kubashadile matuku makese bua kubuelabu mu buloba bulaya. Mpekatu ivua bena Isalele benze nyoyi imue idi bantu benza lelu’eu, bu mudi: ditendelela mpingu (kutumbisha bantu bende lumu) ne tshiendenda. Ke bualu kayi drama eu udi utudimuija.” Dilongesha divua mu drama eu divuaku dikulenge pebe ku muoyo anyi?
10 Tshia kumanya: Padi tshikondo tshia mpungilu wenu wa distrike tshisemena pabuipi, sambila Yehowa bua upete mushindu wa kuikalaku mu bitupa bionso bia matuku onso asatu, ke bionso bidibu balongolola mu programe eu kukuambuluishabi bikole. Ukadi mulombe diikisha ku mudimu bua matuku asatu a mpungilu eu anyi? Enza lukasa. Tshianana kabakukuitabila wewe mudilombe mu minite ya ndekelu to. Mupika wa lulamatu ne wa budimu mmulongolole Mpungilu wa Distrike wa “Balongeshi ba Dîyi dia Nzambi” tshidimu etshi bua kutulongesha mu nyuma ne kukolesha ditabuja dietu. Nunku, tuadija kudilongolola mpindieu bua kuleja se: udi utumikila tshidi mufundi wa Misambu wamba ne: “Tumbishayi [Nzambi] mu bisangilu bienu.”—Mus. 68:26, [MMM 68:27].
[Kazubu mu dibeji 3]
Ndongamu
Ditanu ne Disambombo
9:30 wa dinda – 5:00 wa dilolo
Dia lumingu
9:30 wa dinda – 4:00 wa dilolo
[Kazubu mu dibeji 4]
Mua kudilongolola bua kubuela mu mpungilu ya “Balongeshi ba Dîyi dia Nzambi”
1. Biwikala ne bua kuenza luendu lule bua kubuela mu mpungilu, utuadije kulama makuta a biakudia ne a njila bua dîku diebe.
2. Uvuluke kabidi mapa a budisuile a kufila bua dilongolola dia mpungilu. ‘Kumueneki ku mêsu kua Yehowa bianza bitupu to,’ kadi ‘umutumbishe ne biuma biebe.’—Dut. 16:16; Nsu. 3:9.
3. Tudiakaje bua kuikala ne bienzedi bimpe, ne mvuadilu mulenga wa mankenda dîba dia mpungilu.—1 Kol. 10:31.
4. Udilongolole bua kulonda tshidi bana betu badi benza mudimu wa bulongame bakulomba. Kulami miaba patupu to. Kadi udi mua kuyilamina anu bena dîku diebe ne bantu baudi muende nabu.
5. Mêba a diikisha, kanudi biakudia bia bujitu to bua kabilu kunupangisha bua kuteleja bilenga ndongamu wa mu mapingaja. Diukuta ditu difila tulu.—Luka 8:18.
6. Mankenda atu apa Yehowa lumu. Ku ndekelu kua tshitupa tshionso, muntu yonso neangule mabeji ne bintu bikuabu bia bukoya ne kubiela mu miaba mibilongoluela, bua muaba wa mpungilu kushalawu ne mankenda.—1 Pet. 1:15, 16.