Bulelela bua malu enzeka matuku a tshilualua
Ukadiku mudiebeje bua kumanya tshitudi bindile mu matuku a tshilualua anyi? Bible udi utuleja malu a mushinga enzeka mu katupa kîpi emu ikala ne bua kulenga bantu bonso badi basombele pa buloba.
Yezu wakaleja tshivua mua kutujadikila ne: ‘Bukalenge bua Nzambi bukadi pabuipi.’ (Luka 21:31) Wakamanyisha malu kampanda atudi tumona enzeka lelu pa buloba bu mudi mvita minene, dikanka dikole dia buloba, biyole bia nzala ne bipupu bia masama.—Luka 21:10-17.
Bible udi utuambila ne: bantu bavua ne bua kudituala bibi menemene mu “matuku a ku nshikidilu” a bukokeshi bua bantu. Udi mua kubala mushindu udibu bumvuije malu aa mu 2 Timote 3:1-5. Kakuyi mpata, paudi umona mushindu udi bantu benza malu lelu, udi witaba ne: mêyi a buprofete a mu Bible aa adi apetangana menemene ne nsombelu utudi nende lelu.
Mêyi a buprofete aa adi umvuija tshinyi? Adi umvuija ne: tshikondo tshia Bukalenge bua Nzambi kulengeja malu onso pa buloba tshikadi tshisemene pabuipi. (Luka 21:36) Mu Bible, Nzambi mmulaye malu mimpe a bungi bua buloba ne bua bantu basombelapu. Mona bilejilu bikese.
BUKOKESHI BUIMPE
“Bakamupesha bukokeshi, lumu, ne bukalenge, bua bukua bantu, bisamba, ne bisumbu bia miakulu bimuenzele bionso mudimu. Bukokeshi buende mbukokeshi bua tshiendelele buikala kabuyi mua kupita, ne bukalenge buende kabuakubutudibua to.”—DANYELE 7:14.
Tshidi mêyi aa umvuija: Udi mua kupeta nsombelu mulenga padi mbulamatadi muimpe wa Nzambi, udiye muteke Muanende Mukalenge utuadija kulombola buloba bujima.
MAKANDA A MUBIDI MIMPE
“Muntu nansha umue udi musombele mu ditunga kakuamba ne: ‘Ndi nsama.’”—YESHAYA 33:24.
Tshidi mêyi aa umvuija: Kuakusama anyi kupeta bulema to; kadi newikale ne muoyo wa kashidi.
DITALALA MIABA YONSO
“Udi ujikija mvita pa buloba buonso bujima.”—MISAMBU 46:9.
Tshidi mêyi aa umvuija: Kakuakuikala kabidi mvita ne ntatu yonso ituyi ikebesha to.
BULOBA NEBUWULE TENTE NE BANTU BAKANE
“Bantu babi kabakuikalaku kabidi to . . . Bena bupuekele nebapiane buloba.”—MISAMBU 37:10, 11.
Tshidi mêyi aa umvuija: Kakuakuikala kabidi bantu babi pa buloba to, nekuikale anu aba badi batumikila Nzambi ne muoyo mujima.
BULOBA BUJIMA NEBULUE MPARADIZU
“Nebase nzubu ne nebasombelamu, ne nebadime madimi a tumuma tua mvinyo ne nebadie tumuma tuawu.”—YESHAYA 65:21, 22.
Tshidi mêyi aa umvuija: Buloba bujima nebulue muaba mulenga wa katshia! Nzambi neandamune disambila dietu dia ne: disua diende dienzeke “pa buloba.”—Matayi 6:10.