Tutumbishayi Yehowa ne Muanende
Mushindu udi dibuela mu Tshivulukilu mu dia 8 ngondo muinayi mua kutuambuluisha bikole
1 Lelu’eu, mbanganyi batubu batamba kutumbisha? Ng’aba batu benza malu a kukema pa buloba. Kadi misangu ya bungi, malu abu a kukema aa bantu batu baapua muoyo ne lukasa. Kadi netuambe tshinyi bua malu adi akuatshisha bantu menemene? Ku bualu bunene bupite onso a nunku aa ke kutudi mua kutuma ntema yetu yonso, anu mutuenza bua Didia dia Mukalenge dituenza mu dia 8 Tshisanga 2001 kunyima kua dîba dimane kubuela.
2 Nnganyi udi muakanyine lumu lupitshidile? Bible udi wandamuna ne: ‘Wewe, Mukalenge wetu [Yehowa], udi muakane bua kuangata butumbi ne bunême ne bukole; bualu bua wewe wakafuka bintu bionso.’ (Buak. 4:11) Bu mudi Yehowa muikale Mufuki, yeye udi Mukokeshi Munene wa bukua-bifukibua. Mmuakanyine lumu kashidi ne tshiendelele!—1 Tim. 1:17.
3 Yezu Kristo, Muana wa Nzambi, mmuenze malu a mushinga mukole atuadila bantu mabenesha a tshiendelele. Wakidikija Tatuende mu malu onso. (Yone 5:19) Ditumikila diende didi muntu nansha umue kayi mua kudiwula ne mudimu wa lulamatu biakenza bua ikale ‘muakanyine bua kupeta bukokeshi, bubanji, meji ne bukole, bunême, butumbi ne ditumbishibua.’ (Buak. 5:12, Muanda Mulenga Lelu) Tatuende wakamupa lumu, e kumuteka Mukalenge. (Mus. 2:6-8) Tuetu petu netupete mushindu wa kutumbisha Tatu ne Muana mu Didia dia Mukalenge mutuabuela mu dia 8 Tshisanga 2001.
4 Tshidi katshiyi tshisankisha ntshia se: kubangila ku bankambua betu, anu bantu bakese ke badi batumbishe Yehowa ne Muanende muvuabi bikengela. Mu bimue bikondo, nansha Isalele, tshisamba tshia Nzambi tshia kale tshivua tshienzele Yehowa mudimu anu wa tshidingishilu. Atshi nkupanga kanemu bibi. (Mal. 1:6) Bua kuleja kanemu ka bushuwa, bidi bikengela kuikala ne lulamatu lushindamene pa dinanga ne dianyisha bua bionso bidi Yehowa ne Muanende bakuenzele. Kanemu ne lumu bia mushindu eu bidi bileja ne: tudi tutshina Nzambi ne tumunemeka, tuanyisha Yehowa ne Yezu mu nsombelu wetu mujima. Tshisumbu tshia bena Kristo tshidi tshienza muatshi muonso bua kulongesha ne kuambuluisha bakuabu bua kuenzabu pabu nunku.
5 Tshikondo tshia pa buatshi tshia kuleja kanemu: Tshivulukilu ntshisangilu tshia mushinga mukole bua bantu ba Yehowa. Muntu yonso udi ne dijinga dia kusadila ne kutumbisha Yehowa kashadi to. (Luka 22:19) Tudi tutshinka ne: pa kumbusha Bantemu badiku lelu miliyo 6, bantu badi banyisha bulelela nebavudije bungi ebu kupitshisha ne pa miliyo 14. Etshi ntshikondo tshilenga tshia kutumbisha Tatu wetu wa mu diulu! Nansha mudi Tshivulukilu tshitamba kutangila Yezu, lumu ne kanemu bitudi tuleja bua malu adiye muenze bidi bitumbisha Tatuende uvua mumutume.—Yone 5:23.
6 Ntshintu kayi tshitambe buimpe tshitudi mua kuenza mu tshikondo tshia pa buatshi etshi? Tudi mua kuambuluisha bantu batshidi bapiabapia mu bulelela. Tubambile bua balue mu Tshivulukilu, ne tubambuluishe pikalabi bikengedibua bua kufikabu muaba wenzekelatshi. Umvuija tshipatshila tshia muyuki wenzabu. Enza bua bamanyangane ne bakuabu. Malu amonabu ne umvuabu adi mua kubasaka bua kudisangishabu netu ne kutumbisha Yehowa.
7 Kumonyi ne: tshisangilu etshi katshiena ne bualu buditshi mua kuenza to. Mulongi mukuabu wa mu iniversite wakamba ne: “Ndi mudie nkomunyo mu misa misangu ne misangu, kadi tshisangilu etshi ntshia watshi mushindu menemene. Ndi mumone ne: nudi nuenza tshidi Bible wamba bushuwa, ne ndi ngela meji ne: nuenu nudi mu bulelela.” Wakatuadija kubuela mu bisangilu pa tshibidilu ne kuluaye kutambula.
8 Tuambuluishayi bapiabapia bua kukolabu: Funda mêna a bapiabapia badi balue mu Tshivulukilu ne uye kubatangila matuku makese kunyima bua kubavuluija malu avuabu bateleje ne bamone patshidiwu mu mutu muabu. Tubambile bua bisangilu bikuabu mudibu mua kuvudijila dimanya diabu dia Bible. Tudi nansha mua kukonkonona nabu nshapita wa 17 udi ne tshiena-bualu ne: “Keba dikubibua munkatshi mua tshisamba tshia Nzambi,” mu mukanda wa Dimanya bua bamanye mudi tshisumbu tshipesha bantu biakudia bia mu nyuma bipite bungi, ne bua bamanye kabidi ne: biakudia abi mbabilongolole kabidi buabu buobu. Tumvuangane nabu bua bamone bande wa video wa: Our Whole Association of Brothers [Toute la communauté de nos frères] bua badimuene ne abu abidi buobumue, disanka ne lukunukunu lua bantu ba Yehowa.
9 Bidi ne mushinga bua bantu badi banyisha bulelela bamanye mushindu udibu buobu bine mua kutumbisha ne kunemeka Yehowa. Tubumvuije ne: disambila dienza ne muoyo mujima ditu disankisha Yehowa ne ditu misangu yonso ditukankamija mu nyuma. (1 Yone 5:14) Tuangate dilongesha dia 8 too ne ku dia 12 mu broshire wa Utulomba, bua kubaleja ngikadilu itu itumbisha Yehowa. Tuyikile nabu malu adi mu broshire wa Bantemu ba Yehowa, dibeji dia 30 ne dia 31, bua kubaleja bamanye bua tshinyi badi ne bua kuyisha bua kutumbisha Yehowa.
10 Tuetu bayidi ba Yezu, patudi tuanyisha mulambu wende ne diakalenga ditudi nadi dia kuenza mudimu eu, tudi tutumbisha Tatu wetu ne tuleja bakuabu njila wa mabenesha. Yezu wakalaya ne: “Biangenzela muntu mudimu, Tatu neamutumbishe.”—Yone 12:26.