Tuambuluishayi bakuabu bua babuele mu bisangilu
1 “Balunda betu bonso badi netu mutumba . . . badi bajinga kubuela mu bisangilu, tudi tubabikila ne disanka bua baluemu.” Katshia dimanyisha edi diapatuka mu Tshibumba tshia Nsentedi tshia Siona (Zion’s Watch Tower), tshia Kasuabanga 1880, Bantemu ba Yehowa badi babikila bantu ne musangelu bua kudisangisha pamue nabu bua kulonga Bible. (Buak. 22:17) Bisangilu ntshitupa tshinene tshia ntendelelu mulelela.
2 Kubuela mu bisangilu kudi ne mushinga: Patudi tudisangisha ne bana betu mu tshisumbu tudi tupeta masanka. Tudi tulua kumanya menemene Yehowa Nzambi wetu muenji wa malu a kukema. Tudi tudisangisha mu tshisumbu bua kuikala “balongi ba [Yehowa].” (Yesh. 54:13, MMM) Bulongolodi buende budi butulongoluela programe wa dilonga malu a mu Bible adi atusemeja pabuipi nende ne atuambuluisha bikole patudi tutumikila “malu onso adi Nzambi musue.” (Bien. 20:27; Luka 12:42) Bisangilu bidi bituleja mushindu wa kulongesha Dîyi dia Nzambi. Malu adi Bible utuvuluija adi atuambuluisha bua kusomba bimpe ne bakuabu, kabidi ne Yehowa muine. Kudisangisha ne bantu badi banange Nzambi kudi kukolesha ditabuja dietu.—Lomo 1:11, 12.
3 Muambile diakamue bua alue mu bisangilu: Anu mu dilonga nende dia kumpala, ambila muntu yonso uudi ulonga nende Bible bua alue mu bisangilu. Bua kujula dijinga diende, mulondele bualu buvua bukukankamije mu tshisangilu tshishale ne muleje bukuabu buikalabu mua kulongesha mu tshisangilu tshialonda. Mumvuije tshitudi tubikila ne: Nzubu wa Bukalenge ne umuludike muaba udi nzubu eu.
4 Bikalaye kayi ulua mu bisangilu katshia watuadija kumubikila, kutshioki to, tungunuka amu ne kumubikila. Ikala wangata minite mikese lumingu luonso bua kumumvuija mushindu utu bulongolodi buetu buenda. Wenze nunku ku diambuluisha dia broshire wa Bantemu ba Yehowa—Mu buobumue ne bande wa video wa Les Témoins de Jéhovah—Un nom, une organisation bua kutumanyaye bimpe ne kabidi kuibidilanganaye ne bisangilu bietu. Ikala upatuka ne bamanyishi bakuabu mu buambi bua yeye kuibidilanganaye nabu pabu. Paudi wenza disambila kumpala kua kulonga, wikala wela Yehowa tuasakidila bua bulongolodi buende ne leja mudi mulongi eu ukengela kubuelamu pende.
5 Kuelakanyi bua kuambuluisha bantu batshidi bitabilaku bulelela bua kuikalabu badisangisha netu. Padi dianyisha didibu nadi bua Yehowa dienda dikola, nebibasake bua kutumikila malu adibu balonga ne kubuela mu bulongolodi bua Nzambi budi budisuike mu buobumue.—1 Kol. 14:25.