Tulombole Balongi Ku Bulongolodi Bua Yehowa
1 “Eu mmukenji mumanyisha mu miakulu mipite pa 200. Mmukenji muteleja mu matunga mapite pa 210. Mmukenji mumanyisha bantu bonso, muaba kayi wonso udibu. Aka nkampanye katambe bunene ka bumanyishi bua mukenji udi usangisha miliyo ya bantu, katu kakayi kanji kuenzeka pa buloba. Bantemu ba Yehowa badi benza mudimu eu kukadi kupite siekele mujima!”
2 Ke mêyi adi atuadija mu malu malonda mu kasete ka video ka Les Témoins de Jéhovah — Un nom, une organisation. Kadi kandamuna ku nkonko idi ilonda eyi: Bantemu ba Yehowa mbanganyi bulelela? Mmunyi mudi mudimu wabu mulongolola? mulombola? mukuatshisha ne mfranga? Kadi kaleja patoke bonso badi bakatangila ne: “Bantemu ba Yehowa ba pa buloba bujima mbadilongolole ne mbashidimuja bua kuambuluisha bantu nabu bua kuibaka ditabuja diabu mu Bible” ne kadi kabakankamija bua kutangila bulongolodi bua Bantemu ba Yehowa. Panyima pa mumane kutangila kasete aka, mulongi kampanda wakapuekesha binsonji bia disanka ne dianyisha, ne wakamba ne: “Mmunyi mudi muntu mua kupanga kumvua ne: etshi mbulongolodi bua Nzambi mulelela Yehowa?”—Tangila 1 Kolinto 14:24, 25.
3 Mukaji mukuabu wakalonga Bible mutantshi mule, mu dikosa ne dituadijilula dilonga ku misangu, kadi kavuaku witabuja ne: dilongesha dia Busatu Bunsanto divua dia dishima. Pashishe bakabaleja kasete yeye ne bayende. Bakasankidila filme eu bikole ne bakamutangila misangu ibidi butuku bumuebumue abu. Mu dilonga diakalonda, mukaji eu wakaleja dijinga diende dia kulua Ntemu. Wakamba ne: too ne ku tshikondo atshi, uvua amu ne lungenyi lushindamija pa ditaba diende mu Busatu Bunsanto ne uvua upua muoyo bua kutangila bulongolodi buetu ne bantu badimu. Kasete kakamuambuluisha bua kumvuaye ne: uvua mupete bulongolodi bua Nzambi. Wakajinga bua kutuadija difila bumanyishi bua ku nzubu ne ku nzubu kakuyi dijingakana. Bakamumvuija bidia bia kuenzaye bua kulua mumanyishi ukena mutambule, pashishe wakamba ne: “Tuye kumpala.” Wakumbuka mu ekleziya wende, wakatuadija difila bumanyishi ne wakazanzamuka bikole mu dibenga dilongesha dia Busatu Bunsanto.
4 Mbimanyike bimpe ne: balongi ba Bible batu benza malubuluka mavule a mu nyuma ne bakola lukasa batangile ku diboba padibu bamanya bulongolodi bua Yehowa ne babuelamu. Bualu bua mushinga, pakatambula bayidi 3 000 mu Pentekoste, “bakananukila kuikala mu dilongesha dia bapostolo ne mu buobumue.” (Bien. 2:42) Bidi bia mushinga mukole bua tuetu kuambuluisha balongi bua kuenza bia muomumue lelu’eu. Mmunyi?
5 Tuambulayi bujitu buetu: Aba bonso badi benza bayidi badi ne bua kumanya se: badi ne bujitu bua kulombola balongi ba Bible ku bulongolodi bua Nzambi. (1 Tim. 4:16) Dilonga dionso didi ne bua kuikala tshidia tshisakidila batangile ku dituku dia disanka dialeja muyidi eu mupiamupia dilambula dia bumuntu buende kudi Yehowa ku batismo wa mu mâyi. Lumue lua ku nkonko yamuelabu dîba dia batismo ng’elu: “Udiku mumanye se: paudi udilambula kudi Nzambi ne utambula udi udisunguluja bu Ntemu wa Yehowa ne udi udisangisha ku bulongolodi bua Nzambi, bulombola kudi spiritu munsantu anyi?” Nenku bidi bia mushinga bua kumvuaye ne: kêna mua kusadila Nzambi bikalaye kayi mubuele mu tshisumbu tshilelela tshia bena nkristo.—Mat. 24:45-47; Yone 6:68; 2 Kol. 5:20.
6 Tutungunuke ne kulondela mulongi wetu malu adi atangila tshisumbu tshietu ne bulongolodi bua pa buloba bujima bua Bantemu ba Yehowa. Tuenze nunku ku lumingu luonso, kutuadijila anu ku dilonga dia kumpala. Anu ku ntuadijilu, tubikile mulongi bua kubuela mu bisangilu ne tutungunuke ne kuenza nunku.—Buak. 22:17.
7 Tutumike ne biamu bitupetesha: Mikanda mitambe bulenga itudi nayi bua dilombola dia malonga a Bible a ku nzubu ng’eyi: broshire wa Ntshinyi tshidi Nzambi utulomba? ne mukanda wa Dimanya didi difikisha ku muoyo wa kashidi. Mikanda ibidi eyi idi ishindika dikengedibua dia kubuela mu tshisumbu. Tudi tubala ku ndekelu kua dilongesha 5 dia broshire wa Utulomba ne: “Bidi bikukengela kutungunuka ne kulonga pa bidi bitangila Yehowa ne kutumikila malomba ende. Dibuela mu bisangilu ku Nzubu wa Bukalenge wa Bantemu ba Yehowa wa tshitupa tshiudi musombele nedikuambuluishe bua kuenza nunku.” Mukanda wa Dimanya udi ukankamija misangu mivule mulongi bua kubuela mu bisangilu. Mu nshapita 5, tshikoso 22, udi wenza dibikila edi: “Bantemu ba Yehowa . . . badi bakukankamija ne musangelu bua udisangishe kudibu mu ditendelela Nzambi ‘ne spiritu ne bulelela.’ (Yone 4:24, NW)” Tudi tubala mu nshapita 12, tshikoso 16 ne: “Paudi utungunuka ne dilonga edi ne wangata tshibidilu tshia kubuela mu bisangilu bia Bantemu ba Yehowa, ditabuja diebe nedikoleshibue kupita apa mene.” Nshapita 16, tshikoso 20, udi wamba ne: “Suaku ukune tshibidilu tshia kubuela mu bisangilu bia Bantemu ba Yehowa.” Udi usakidila ne: “Ebi nebikuambuluishe bua kumvua bimpe dimanya dia Nzambi ne kuditumikila mu nsombelu webe, kabidi nebikutuadile diakalenga. Kuikala mu buena-muntu bua bena nkristo pa buloba bujima nekukuambuluishe bua kushala pabuipi ne Yehowa.” Nshapita 17 udi umvuija mu buondoke mushindu wa kupeta dikubibua dilelela munkatshi mua tshisamba tshia Nzambi. Patudi tulonga ne bantu, tudi ne bujitu bua kuzangika bitupa ebi bia mu mukanda.
8 Broshire wa Bantemu ba Yehowa—Mu buobumue bua kuenza disua dia Nzambi pa buloba bujima ntshiamu tshitambe buimpe tshipatula bua bantu bibidilangane ne bulongolodi bumu’epele budi bumueneka budi Yehowa utumika nabu mu matuku etu aa bua kukumbaja disua diende. Mamanyisha mavule adimu pa bidi bitangila mudimu, bisangilu ne bulongolodi buetu neakankamije mubadi bua kudisangishaye kutudi bua kutendelela Nzambi. Diakamue padi dilonga dituadija, tudi bakankamija bua kupesha mulongi broshire eu bua kumubalaye. Kabiena bikengela bua kumulonga nende bu mutuvua tuenza kumpala.
9 Tumue tusete tupatula kudi Société tudi biamu bitambe buimpe bua kulombola balongi ku bulongolodi bua Yehowa. Nebikale bimpe bua kutangilabu tudi tulonda etu: (1) La Société du monde nouveau en action kadi kambulula filme wa mu 1954 udi uleja lungenyi luimpe, dikuata mudimu wa dipatula bipeta bimpe ne dinanga didi mu bulongolodi bua Yehowa; (2) Unis grâce à l’enseignement divin kadi kaleja ditalala ne buobumue bileja mu mpuilu yetu ya bukua-matunga ku Mputu wa ku Est, mu Amerike wa ku Sud, mu Afrike ne mu Azi; (3) Jusqu’aux extrémités de la terre kadi kaleja mufikilu wa tshidimu tshia 50 tshia Gilada, Tshilongelu tshia Bible tshia Société Watchtower, ne kaleja mudimu muenza kudi ba-misionere mu bumanyishi bua pa buloba bujima; (4) La fermeté des Témoins de Jéhovah face à la persécution nazie kadi kalonda malu adi atua ku mutshima a bukitu ne ditshimuna bia Bantemu kumpala kua dikengeshibua dia tshinyangu dijula kudi Hitler; ne kabidi (5) Les Témoins de Jéhovah — Un nom, une organisation.
10 Tubatekele bipatshila bidi bilubuluka bua bisangilu: Tudi ne bua kumvuija balongi se: tudi ne dijinga dia dilongesha dia pa buadi difila ku diambuluisha dia dilonga dia Bible dia ku nzubu ne mayukidilangana menza pamue, mu bisangilu bia tshisumbu. (Yone 6:45) Mupiamupia udi ne bua kulubuluka mu dimanya diende dia Mifundu ne dia bulongolodi. Mushindu umu’epele wa kufikaku ndibuela mu bisangilu. (Eb. 10:23-25) Anu ku ntuadijilu, tubikile muntu mu bisangilu bia tshisumbu. Bantu badi basankidila bulelela kukadi matuku makese badi batuadija kubuela mu bisangilu bangabanga mene ne kutuadija dilonga dia Bible dia pa tshibidilu. Mbilelela se: tudi tujinga kufila tshilejilu tshimpe pa kuikala tuetu bine pa tshibidilu mu bisangilu.—Luka 6:40; Filip. 3:17.
11 Tufile mamanyisha makumbane pa bisangilu ne pa mushindu utubi bienzeka bua mulongi adiumvuemu bimpe. Bamue bantu batu badiumvua bibi padibu baya bua musangu wa kumpala pa muaba; nenku bidi bimpe bua kushindikija mulongi ku Nzubu wa Bukalenge padiye ubuela bua musangu wa kumpala mu tshisangilu. Neatambe kudiumvua bimpe bituikala nende pamanyanganaye ne bena mu tshisumbu. Kupita apu, tuikale bakididianganyi bena dîna: muenyi wetu udi ne bua kudiumvua muakidila bimpe ne muikale bimpe.—Mat. 7:12; Filip. 2:1-4.
12 Tukankamije mulongi bua kubuela mu mpuilu wa pa buende wa dituku dimue, mu mpuilu wa tshijengu peshi mu mpuilu wa distrike pikala umue wa kudiyi mua kuenzeka. Pamu’apa netuikale mua kuya nende pamue.
13 Tujulayi dianyisha: Tudi tubala mu mukanda wa Badilongolole bua kuenza mudimu wetu bimpe, dibeji 91 ne: “Bikala miyuki yenu ne bantu badi banange bulelela ileja munudi bangate bulongolodi bua Yehowa ne mushinga, nebikale bitekete bua bobo kabidi kuikala ne ngikadilu wa muomumue, ne abio nebibambuluishe bua kudiundabo mu dimanya dia Yehowa.” Tuikale tuanyisha mu ngakuilu tshisumbu tshietu, katutshibipishi nansha. (Mus. 84:10; 133:1, 3b) Mu masambila atudi tuenza dîba dia dilonga, tuakule bua tshisumbu ne bua dikengedibua dia mulongi kubuelamu pa tshibidilu.—Ef. 1:15-17.
14 Kakuyi mpata, tudi tujinga kumona bapiabapia baleja dianyisha dia muoyo umue bua bulunda bulenga ne dikubibua dia mu nyuma bitudi tupetela munkatshi mua tshisamba tshia Nzambi. (1 Tim. 3:15; 1 Pet. 2:17; 5:9) Nenku tuenzayi muetu muonso bua kulombola balongi ba Dîyi dia Nzambi ku bulongolodi bua Yehowa.
[Caption on page 3]
Balongi badi balubuluka ne lukasa luonso mu nyuma padibu badimuenena bulongolodi buobu nkayabu
[Caption on page 4]
Katujingakanyi bua kubikila balongi mu bisangilu