Mmalu kayi atudi ne bua kudianjila kulongolola?
1 Muntu yonso utuku wanji kuela meji bua malu ende a matuku adi kumpala. Aba badi batekemene bua kuikala ne muoyo pa buloba badi bindila bua kupeta muoyo wa kashidi pikala Nzambi muvuije malu onso mapiamapia ne makane. Kadi kudi malu adi mua kutupangisha bua kuvuluka ditekemena edi. Tudi ne bua kuenza muetu muonso bua malu atudi tuenza umvuangane ne midimu ya Bukalenge ne kabidi tudi ne bua kudimuka bua ditanaja ne nkuka ya mubidi kabitukuatshi.—1 Yone 2:15-17.
2 Bena panu kabena mua kujingulula tshidi bantu badi bakeba malu a mu nyuma bipatshila to. (1 Kol. 2:14) Padi bantu bakuabu baluangana bua kuenda lumu, kumanyika bu bilobo peshi bena kantu ku bianza, tuetu tudi tuluangana bua kupeta bubanji bua mu nyuma. (Mat. 6:19-21) Tuetu bidikije bua kushintulula ngelelu wetu wa meji bua kuikalaye bu udi nende bena panu pa bidi bitangila matuku atshilualua, tudiku mua kufika ku bipatshila bietu bia mu nyuma anyi? Tòo, bualu malu a panu ke atuangata dîba dietu dionso. Kadi tshia kuenza ntshinyi?
3 ‘Tudiluatshishe ne Mukalenge Yezu Kristo’: Bua kumanya bikala bionso bitudi tuenza bishindamene pa malu a Bukalenge, mbimpe tukonkonone mayuki etu. Tutu dîba dionso tuakula anu bua bintu ne malu a panu anyi? Bikalabi nanku, tukebayi bua kumanya bikala mutshima wetu ukadi wenda ulekela malu a mu nyuma. Pamu’apa nebikale bimpe bua kuikala kuelangana meji bua muanda wa ‘didiluatshisha ne Mukalenge Yezu Kristo pamutu pa kulongoluela mibidi malu bua kumana nkuka yayi.’—Lomo 13:14.
4 Bansonga badi mua ‘kudiluatshisha ne Kristo’ pa kudianjila kulongolola dituku didibu bajinga bua kutuadija mudimu wa ku dîba ne ku dîba. Nsonga mukuabu udi mukolele muaba utu bantu bonso bajinga kupeta bubanji batshitshidi bansonga uvua musue kulua mpanda-njila wa pa tshibidilu. Nanku, wakaditua ne kasuki mu dienda dia mushinga ne kubangaye kuya mu bisangilu anu bua kuya ne kupatuka mu buambi anu bua kupatuka. Pakatuadijaye kueyemena mêyi a Yezu adi mu Matayo 6:33 ne kulekelaye lungenyi lua kuenza mudimu anu bualu batu bawenza, wakasungula bua kutuadija mudimu wa ku dîba ne ku dîba. Mpindieu utudi tuakula eu, udi wenzela Yehowa mudimu ne lungenyi luimpe, anu mudiye wamba yeye muine ne: ‘ne bukole buende buonso.’
5 Bible udi wamba ne: mbia meji bua muntu kudianjilaye kulongolola malu bua matuku ende adi kumpala. (Nsu. 21:5) Ke tshitudi bonso ne bua kuenza, tuteka disua dia Nzambi pa muaba wa kumpala mu lungenyi luetu.—Ef. 5:15-17.