Dianjila kulongolola malu!
1 Bulongolodi bua Yehowa budi butulongoluela ndongamu wa pa tshibidilu wa midimu ya teokrasi ne tshipatshila tshia kukumbaja bitudi nabi dijinga mu nyuma. Dianyisha didi ditusaka ku dipetela masanka a tshishiki ku malu onso malongolola, bu mudi makumbula a mutangidi muena ngendu, mpuilu ne mpungilu, ne malu makuabu a pa buawu malongolola muaba unudi. (Mat. 5:3) Pabi, bamue badi bapangila kupeta dikuatshisha ku mavule a ku malu aa a mu nyuma bualu bavua balongolole malu makuabu a kuenza. Ntshinyi tshitudi mua kuenza bua kuepuka bipumbishi ebi? Mmunyi mutudi mua kujadika ne: midimu idi kayiyi ya teokrasi kayena ipumbisha “malu a mushinga wa bungi”?—Filip. 1:10, NW.
2 Dilongolola malu dia meji didi ne mushinga: Nsumuinu 21:5 udi udimuija ne: ‘Meji adi muena mutshima wa mudimu upangadija adi amuvudijila lupetu luvule, kadi muntu yonso udi ne lukuluku neapete anu bupele.’ Bua kupeta ‘lupetu luvule’ lua mu nyuma, tudi ne bua kudianjila kulongolola malu ne tshisumi, balame mu lungenyi midimu ya teokrasi idibu balongolole. Tudi ne bua kulongolola bua kuenza midimu yetu nkayetu tshikondo tshidiyi kayiyi mua kuangata dîba dilama bua kupeta mabenesha a mu nyuma. Bituikala tuzuka anu bua kuenza malu adi muoyo wetu musue kuenza, katuyi tuvuluka malu a teokrasi adi kumpala, tudi mua kulua kubuela pamu’apa mu ‘bupele’ bua mu nyuma.
3 Kupangidi bua kuikalaku to! Buonso buetu tutu tudianjila kulongolola malu bua matuku adi kumpala, bu mudi diikisha, ngendu ya diya ku mushinga, dikumbula balela betu, ne bikuabu kabidi. Kumpala kua kupangadija anyi kujadika biukadi mulongolole, tangila ndongamu wa malu a mu nyuma adi kumpala. Wewe mumone ne: mutangidi wa tshijengu ulualua anyi ne: kudi mpuilu mu tshikondo tshiudi mulongolole bua kuenza luendu, enza madikolela ne muoyo umue bua kuakajilula malu ebe bua wikaleku. Batu batumanyisha kumpala kua dîba menemene malu manene malongolola bua matuku adi kumpala. Bakulu ba mu tshisumbu tshienu badi mua kukumanyisha malu malongolola bua muaba uudi.
4 Pa kudianjila kumona malu ne kudianjila kudilongolola bua malu a mushinga wa bungi, ‘netuujibue tente ne mamuma a buakane, bua butumbi ne kutumbishibua bia Nzambi.’—Filip. 1:11.