Udi musue kuenza bivule anyi?

¹ Yezu wakafuanyikija Bukalenge ne bintu bia mushinga mukole. (Mat. 13:44-46) Mudimu wa dimanyisha lumu lua Bukalenge udi kabidi tshiûma tshia mushinga mukole. Mudimu eu mmuakanyine kuikala pa muaba wa kumpala mu nsombelu wetu, nansha bikala didifilamu bikole dilomba mua kudipangishaku bimue bintu. (Mat. 6:19-21) Udi musue kuenza bivule mu mudimu wa Bukalenge anyi?

² Ela meji bua malu manene aa: Kudi malu a bungi adi ne mushinga bua kumona mua kudifila bikole mu mudimu wa buambi: (1) kuikala ne dipangadika dia kuteka malu a Bukalenge pa muaba wa kumpala (Mat. 6:33); (2) kuikala ne ditabuja ne kueyemena Yehowa. (2 Kol. 4:1, 7); (3) kulomba diambuluisha dia Nzambi mu disambila dienza ne muoyo mujima ne tshisumi (Luka 11:8-10); (4) kutungunuka ne kulonda mêyi etu a mu disambila ne kuenza malu mu diumvuangana nawu.​—Yak. 2:14, 17.

³ Mishindu itudi mua kuvudija mudimu wetu: Tuetu bonso tudi mua kudifundila tshipatshila tshinene tshia kuikala kuenza pa tshibidilu mêba bungi kampanda mu buambi ngondo yonso. Kadi ukadiku muele meji pa bualu bua kuyisha mu mpukapuka mu tshikondo tshionso tshidi tshikumuenekela, wenza muebe muonso bua kuamba mêyi adi ne bujitu, kulenga mitshima ya bantu paudi ubapinganyina ne kudienzeja bua kuikala kulonga Bible ne bantu anyi? Udi mua kukokesha bua kuenza bumpanda-njila buambuluishi peshi bua pa tshibidilu ta kabidi kuenza mudimu muaba udi dijinga dia bungi anyi? Biwikala muanetu wa balume mutambule, udiku mua kukumbaja malu malomba bua kulua musadidi wa mudimu peshi mukulu anyi? (1 Tim. 3:1, 10) Udiku mua kuvudija mudimu webe pa kuuja formilere wa dilomba bua kubuela ku Betele, kubuela mu Kalasa ka Dilongesha Mudimu peshi mudimu wa dilonga bumisionere ku Tshilongelu tshia Gilada anyi?​—Luka 10:2.

⁴ Bakakankamija muanetu wa balume mukuabu uvua ne mudimu umuangata dîba dionso ne upitshisha dîba dia bungi mu manaya bua kulua mpanda-njila wa pa tshibidilu. Wakatuadija bumpanda-njila buambuluishi ne pashishe kudiakajaye bua kudifila mu mudimu wa ku dîba ne ku dîba. Wakafika too ne ku dibuela mu Kalasa ka Dilongesha Mudimu, kakamuambuluisha bua kudilongololaye bua kuenza mudimu udiye wenza mpindieu wa mutangidi wa tshijengu. Udi ne disanka dia bungi bua mudiye mulonde malu avuabu bamukankamije bua kuenza, kabidi mmutuishibue se: disanka dia bungi didiye mupete ndifumine ku dipangadika divuaye muangate dia kuenza bia bungi mu mudimu wa Bukalenge.

⁵ Yehowa udi ubenesha badi badifila mu mudimu wende. (Yesh. 6:8) Kanulekedi bualu nansha bumue bunupangisha mua kuvudija mudimu wenu, muanda udi mua kunupetesha masanka mavule ne kunupa makanda.