Tutekayi dijikija lutetuku pa muaba wadi

¹ Mu bikondo ebi bikole, muntu yonso udi wende eu utu dijinga ne kushintululaku amue malu ku tshikondo ne tshikondo. Kuikalaku ne matuku a kujikija lutetuku nkuakanyine. Kadi, patudi tubanga kupitshisha dîba dipite bungi mu dijikija lutetuku, diolola mubidi ne diya kusombeshangana, malu aa adi mua kutufikisha ku kakese ku kakese ku dijimija tshibidilu tshia kutabalela malu a mu nyuma. Tudi ne bua kuteka dijikija lutetuku pa muaba wadi menemene. (Mat. 5:3) Mmunyi mudibi mua kuenzeka? Pa kulonda mibelu mifila mu Efeso 5:15-17.

² Tuditekele mikalu: Paulo wakafunda ne: bena Kristo badi ne bua ‘kudimuka’ bua kuikala ne nsombelu wa meji. Bidi bikengela kuikala ne nkatshinkatshi mu dienza malu ne didikanda bua kumanya dîba dia kutuadija ne dia kujikija dijikija lutetuku. Mbimpe kuela meji bikole ku bitutu tuenza dîba ditudi katuyi ne mudimu. Dijikija lutetuku didi ne bua kutuambuluisha bua tufike ku dikumbaja amue malu pamutu pa kutufikisha ku dimona ne: tudi bajimije dîba patupu peshi kutushiya bapungile bikole. Bu tuetu mua kumvua ne: bualu kampanda ki mbufike ku ditusankisha, katuena ne tshitudi bapetemu, ne kabidi tudiumvua bu bapile kunyima kua tuetu bamane kudifila mu dienza dia bualu abu, abi bidi bileja ne: tudi ne bua kuakajilula malu atudi tuenza ne dîba ditudi tupitshisha.

³ Tuikale ne meji: Paulo wakafila mubelu wa ‘kudisumbila tshikondo’ bua kuenza malu adi ne mushinga wa bungi, kadi ki nkuikala bu bantu “bapange meji.” Bena Kristo badilambule kabena mua kuitaba bua nsombelu wabu kuikalaye mushindamene anu pa dijikija dia lutetuku to. Nansha mudi dikisha ne didiolola mua kutupeshilula bukole bua mubidi, mpokolo wa makanda etu a mu nyuma mbukole buenzeji bua Nzambi. (Yesh. 40:29-31) Tudi tupeta nyuma wende ku diambuluisha dia midimu ya malu a Nzambi bu mudi: dilonga dia Bible, dibuela mu bisangilu bia tshisumbu, dipatuka mu buambi; kadi ki mmu dijikija lutetuku to.

⁴ Tuditekele kumpala malu adi ne mushinga kupita makuabu: Paulo wakabela bena Kristo bua ‘bajingulule mudi disua dia [Yehowa].’ Yezu wakalongesha ne: malu atudi tuenza adi ne bua kushindamena pa Bukalenge bua Nzambi bualu buobu ke budi buangata muaba wa ku mpala mu nsombelu wetu. (Mat. 6:33) Bidi ne mushinga bua tuetu kuanji kuenza malu adi atupesha mushindu wa kunemeka diditshipa dietu kudi Yehowa. Pashishe mpindieu tudi mua kuteka dîba dia dijikija lutetuku pa muaba wadi menemene. Patudi tuenza nanku, dijikija lutetuku nedituambuluishe bimpe, netudisankidile bikole.​—Muam. 5:12.