Udi ne tshipatshila kayi?
1 Tutu tulombola malonga a Bible bua tshinyi? Tutu tuenza nunku anu bua kuuja dimanya mu mitu ya bantu, kuakaja malu abu a mu nsombelu peshi kubapesha lungenyi bua malu adibu balongolola bua kuenza mu matuku adi kumpala anyi? Kabiena nanku to. Tshipatshila tshietu tshinene ntshia kubavuija bayidi ba Yezu Kristo! (Mat. 28:19; Bien. 14:21) Ke bualu kayi bitu bia mushinga bua bantu batudi tulonga nabu Bible bikala babuela mu bisangilu bia tshisumbu. Bua kudiundabu mu nyuma, badi ne bua kuikala ne dianyisha bua bulongolodi buetu bua bena Kristo.
2 Bua kufika ku dikumbaja bualu ebu: Diakamue anu ku mbangilu kua dilonga, wikale misangu yonso ukankamija mulongi bua kubuela mu bisangilu bia tshisumbu. (Eb. 10:24, 25) Umumvuije muikala bisangilu mua kukolesha ditabuja diende, kumuambuluisha bua kuenza disua dia Nzambi ne kumanyangana ne bakuabu badi pabu bajinga bua kutumbisha Yehowa. (Mus. 27:13; 32:8; 35:18) Mushindu uudi wewe muine uleja muudi munange ne muudi wanyisha tshisumbu ne bisangilu neusake mulongi bua kujinga kubuelamu.
3 Bapiabapia aba badi dijinga ne kumona ne: bulongolodi bua Yehowa budi nsangilu wa buena-muntu buetu bua buloba bujima. Ubalombe bua nutangile nabu bande wa video wa Les Témoins de Jéhovah: un nom, une organisation ne wa Toute la communauté de nos frères (Angl.). Ubambuluishe bua banyishe mushindu udi Yehowa wenza mudimu ne miliyo ya bantu badi badilambule kudiye bua kuenza disua diende pa buloba bujima. Nuambuluishe bapiabapia aba bua bamanye ne: buobu pabu badi mua kusadila Nzambi.—Yesh. 2:2, 3.
4 Bitu bienza disanka dia bungi bua kumona mulongi wa Bible ulua muyidi mulelela wa Yezu. Etshi ke tshipatshila tshietu!—3 Yone 4.