Mu buobumue ne disanka ne Yehowa ne Muanende
Tshibilu tshia mushinga mukole tshidimu etshi ntshia kuenza mu dia matuku 28 ngondo muisatu
1 Patudi tuenza tshivulukilu tshia Didia dia Mukalenge kunyima kua dibuela dia dîba mu dia matuku 28 ngondo muisatu wa tshidimu tshia 2002, tudi tuleja ne: tudi ne disanka bua buobumue buetu ne Yehowa Nzambi ne Yezu Kristo. Mu tshikondo atshi tshia pa buatshi, bashadile bena Kristo bela manyi nebapete mushindu wa pa buawu wa ‘kudisanga’ ne bakuabu bapianyi ba Bukalenge, ne Tatu, ne Muanende kabidi. (1 Yone 1:3, Muanda Mulenga Lelu; Ef. 1:11, 12) Bua “mikoko mikuabu” miliyo ya bungi, tshikondo atshi netshikale tshikondo tshia kuelangana meji bua diakalenga dia pa buadi didibu nadi edi dia kuikala mu buobumue ne Yehowa ne Muanende, kuikala nabu tshintu tshimue mu mutshima ne mu lungenyi mu dienza dia mudimu wa Nzambi eu!—Yone 10:16.
2 Tuenzayi mudimu pamue mu diumvuangana: Yehowa ne Yezu batu katshia kuonso eku mu buobumue bua disanka. Bavua mu diumvuangana dia menemene bidimu miliyo ne miliyo kumpala kua kufukabu bantu. (Mika 5:2) Ke dinanga dikole kushemakanadi pankatshi pabu buobu babidi. Muanabute eu muleja bu meji akula bu muntu, wakamba kumpala kua kuluaye pa buloba ne: ‘Meme kulua eu uvua [Yehowa] munange mu mushindu wa pa buawu ku dituku ku dituku, meme muikale nsanka kumpala kuende dîba dionso.’ (Nsu. 8:30, NW) Kupitshisha bidimu bungi kabuyi kubala kumana mu diumvuangana dia menemene ne Mpokolo wa dinanga kuakambuluisha Muana wa Nzambi bikole!—1 Yone 4:8.
3 Bu muvua Yehowa mumanye ne: bivua bikengela kupikula bukua-bantu, wakasungula Muanende umu’epele mulela, uvua munange bantu bikole, bua kufilaye mulambu wa tshia-bupikudi udi utupesha ditekemena dia pa buadi ditudi nadi. (Nsu. 8:31) Anu mudi Yehowa ne Muanende bikale mu buobumue bua kukumbaja tshipatshila tshimue, tudi petu tudisanga kudibu, kabidi tudisanga ne bakuetu bakuabu mu dinanga dikole, tuenza disua dia Nzambi ne disanka.
4 Tulejayi dianyisha ne muoyo mujima: Patudi tubuela mu Tshivulukilu tuteleja muyuki ne ntema ne kanemu, tudi tuleja dianyisha dia muoyo mujima bua dinanga dia Yehowa ne bua mulambu wa Muanende mutufidila. Tshilejilu tshivua Yezu mushiye tshia dinanga, lulamatu luende too ne ku lufu bua kufila tshia-bupikudi, ne dikokesha diende bu Mukalenge wa Bukalenge bua Nzambi, kabidi ne masanka ikala Bukalenge abu mua kutuadila bukua-bantu mmalu manene. Nebatuvuluije kabidi bua mudibi bikengela kutungunuka ne kuleja ditabuja dietu, tuenza mudimu ne lukunukunu mu diumvuangane ne disua dia Yehowa bu ‘benji nabo ba mudimu mu bualu bua bushuwa.’—3 Yone 8; Yak. 2:17.
5 Tuambuluishayi bakuabu bua benze netu mudimu: Kasumbu ka bakulu kenze muaku muonso bua kukankamija Bantemu bakadi balekele kuyisha badi mu teritware wetu bua kubuela mu Tshivulukilu tshia lufu lua Kristo. (Mat. 18:12, 13) Nufunde mêna a bantu bonso banudi ne bua kuya kutangila bua kanulu kupua bakuabu muoyo, ne nubikile muntu ne muntu yonso bua alue.
6 Udiku mumanye bantu bakuabu badi mua kubuela mu Tshivulukilu anyi? Angata dipangadika dia kubaleja kubafikisha too ne ku dianyisha tshibilu etshi. Ubabikile ne musangelu ne ubakidile ne disanka dia bungi paluabu. Tuenzayi muetu muonso bua kubikila mu tshibilu etshi tshia mushinga mukole tshidimu etshi balongi betu ba Bible bonso ne bantu bakuabu batu basankidila bulelela, kabidi ne bena mu dîku dietu ne bamanyangana nabu. Tshia-bupikudi tshidiku bua muntu yonso udi ulonga ‘bulengele butambe bua kumanya kua Kristo Yezu.’ (Filip. 3:8) Bonso badi benza midimu idi ileja ditabuja bua mulambu wa Kristo badi mua kupeta ditekemena dishindame dia muoyo wa kashidi.—Yone 3:16.
7 Katulenguludi tshidi Tshivulukilu mua kushiya mu lungenyi lua bantu ba muoyo muimpe nansha. Kukadi bidimu bibidi mu tshidiila tshia Papouasie Nouvelle Guinée, bantu 11 bavua basankidila bulelela bakenza luendu munkatshi mua mêba 17 majima mu ka-buatu kakese mu musulu wa muenji mukole. Bua tshinyi bakenza luendu elu? Bakamba ne: “Tuvua basue kuya kusekelela Tshivulukilu tshia lufu lua Kristo pamue ne batendeledi netu bakuabu ba Yehowa; nunku luende elu luvua ne mushinga walu.” Elabi meji bua tshisumi tshia bantu aba ne dianyisha diabu bua kuikala mu buobumue ne disanka ne Yehowa, Muanende ne bena Kristo nabu bakuabu!
8 Lomba bantu bonso badi basankidila bulelela bua kulonga nabu Bible. Bakankamije bua bikala babuela mu bisangilu ne bambila bakuabu bulelela budibu balonga. Bambuluishe bua ‘kuenda mu butoke’ ne ‘kuenza malu mu bulelela’ pa kutumikila mêyi a mu Bible. (1 Yone 1:6, 7, Mukanda wa Mvidi Mukulu, [Katolike, MMM]) Bambuluishe bua bashêmeje malanda abu ne Yehowa ne bua batungunuke ne kukolesha dianyisha diabu bua diakalenge edi didibu nadi dia kuikala mu buobumue mu dienza disua diende.
9 Ndiakalengapu kayi dia kuikala mu buobumue ne disanka mu ‘nyuma umue, ne tutshinta popamue ne mutshima umue bua ditabuja dia lumu luimpe’! (Filip. 1:27, 28) Tushalayi batekemene buena-muntu buetu bulengele butuikala nabu ne bakuetu dîba dia Tshivulukilu tshienzeka mu dia matuku 28 a ngondo muisatu, tuela Yehowa ne muanende tuakasidila wa manza tente!—Luka 22:19.