‘Nuikale babanji mu midimu mimpe’

¹ Mu bidimu bia ndekelu bia mudimu wende wa tshisumi, mupostolo Paulo wakalua kulamatangana bikole ne Timote ne Tito. Wakabafundila bonso babidi mêyi a muomumue a kubakolesha nawu. Wakambila Tito ne: ‘bua bantu bakamana kuitabuja Nzambi’ badi ne bua ‘kunanukila mu midimu mimpe.’ (Tito 3:8) Wakambila Timote ne: bantu bonso badi batekemena Nzambi badi ne bua “kuikala babanji mu midimu mimpe.” (1 Tim. 6:17, 18, Muanda Mulenga Lelu) Bualu ebu budi kabidi mubelu mutambe buimpe kutudi tuetu bonso! Kadi ntshinyi tshiatusaka bua kuenza midimu mimpe mu nsombelu wetu? Ne mmidimu kayi itudi mua kuenza mu matuku adi kumpala eku?

² Tshidi tshitusaka bua kuikala babanji mu midimu mimpe nditabuja ditudi bitabuje Yehowa ne dinanga ditudi bamunange nadi kabidi ne ditekemena dilenga didiye mutupeshe. (1 Tim. 6:19; Tito 2:11) Nangananga mu tshikondo etshi, badi batuvuluija ne: Yehowa wakatuma Muanende Yezu pa buloba bua abingishe Tatuende ne unzulule njila wa muoyo wa tshiendelele bua bantu bonso badi baukumbanyine. (Mat. 20:28; Yone 3:16) Nebumvuije bimpe muanda eu mu disekelela dia Tshivulukilu tshia lufu lua Kristo mu dia matuku 28 a ngondo muisatu wa tshidimu etshi. Bua ditekemena edi ditudi nadi dia kupeta muoyo wa tshiendelele, kabienaku bitusaka bua kuenza muetu muonso bua “kuikala babanji mu midimu mimpe” anyi? Ntshia bushuwa menemene! Kadi mmidimu kayi itudi mua kuenza?

³ Midimu mimpe ya kuenza mu ngondo muisatu ne mu ngondo yalonda: Tshitudi bajadike ntshia se: netubuele mu Tshivulukilu; Tshivulukilu ntshibilu tshia mushinga mukole tshia mu tshidimu bua Bantemu ba Yehowa pa buloba bujima. (Luka 22:19) Tudi basue kusanka bua tshibilu etshi ne bantu bakuabu ba bungi. Wewe mutangile luapolo lua mudimu ludi mu Annuaire 2002, neumone ne: tshidimu tshishale bungi bua bantu bavua babuele mu Tshivulukilu mu matunga a bungi pa buloba bujima, buvua buvule misangu isatu, inayi, itanu, anyi ya bungi mene kupita bungi bua bamanyishi. Bushuwa biakalomba bena mu bisumbu bonso mudimu mukole bua kumona mua kuabanya tubeji tua dibikila natu bantu mu Tshivulukilu mu teritware yabu. Nunku, bilondeshile muetu mutudi namu, tudi basue kuenza mêba a bungi mu buambi kubangila anu lelu too ne mu dia 28 ngondo muisatu bua kubikila bantu mu Tshivulukilu, tubambuluisha bua kumanya malu a bungi pa bidi bitangila ditekemena dia lupandu.

⁴ Tshia kuenza ntshinyi bua kuikala ‘babanji mu midimu mimpe’ mu ngondo muinayi? Tudi ne bua kutungunuka ne kuenza mudimu wa diyisha lumu luimpe ne disanka, ne kabidi kuikala ne “lukunukunu lua kuenza midimu mimpe.” (Tito 2:14; Mat. 24:14) Pawikala kuyi ne mushindu wa kulua mpanda-njila muambuluishi mu ngondo muisatu, udiku mua kuenza mudimu eu mu ngondo muinayi anyi muitanu peshi mene mu yonso ibidi eyi anyi? Biwikala udi mpanda-njila mu ngondo muisatu, udiku mua kutungunuka [ne mudimu eu mu ngondo mikuabu yalonda] anyi?

⁵ Bamue bana betu batu ku midimu mbafike ku dimona ne: badi mua kuenza dîba dijima anyi kupita apu padibu mu njila batangile ku mudimu, benda bayisha mu njila anyi baya kutangila bantu pa miaba yabu ya mudimu ikadi mituadije. Bakuabu batu bayisha nansha dîba ditubu banji kuikisha mu midi. Bakuabu pabu mbafike too ne ku dilombola dilonga dia Bible ne bena mudimu nabu dîba dia diikisha adi. Bana betu ba bakaji ba bungi badi bamamu ba nzubu mbadiakaje bua kuikala kuyisha dîba didi bana babu mu kalasa. Padibu benza bua kuikala kujuka patshiatshia amue matuku bua kuenza midimu ya mu nzubu, badi bapeta dîba dia bungi bua kuyisha ne kulongesha bantu.​—Ef. 5:15, 16.

⁶ Nansha biwikala kuyi ne mushindu wa kuikala mpanda-njila muambuluishi, pamu’apa udi mua kuakaja programe webe nkayebe bua kuvudija mudimu webe wa buambi, kuenza muebe muonso bua ‘kuenza malu mimpe, kuikala mubanji mu midimu mimpe, kupeshangana bintu ne kuikala mudilongolole bua kuabanyangana ne bakuabu’ bulelela.​—1 Tim. 6:18, MML.

⁷ Uvuluke mudimu muimpe eu wa divuija bakuabu bayidi: Tshidimu tshionso bantu batu banyisha bulelela batu balua mu Tshivulukilu. Kudiku mushindu wa bamue bena mu tshisumbu kutabalelabu bantu badi balua mu Tshivulukilu badi kabayi banji kutuadija kulonga Bible anyi? Kudiku mushindu wa kuya kubatangila kumabu ne kubambuluisha bua kukolabu mu nyuma anyi? Pamu’apa bamue badi balue mu Tshivulukilu batu ne balela babu bikale Bantemu. Bakuabu badi mua kuikala bantu bavua balonga Bible kale kadi batudi mua kukankamija mpindieu bua kutuadijilula kumulonga ne kuikala kubuela mu bisangilu bionso. Ndisanka kayipu ditumvua patudi tumona bantu aba balua basadidi ba Yehowa ba tshisumi pamue netu!

⁸ Bu mudi bantu bajinga kuvudija mudimu wabu wa buambi mu ngondo muisatu ne mu mikuabu idi ilonda, bantu ba tuetu kupinganyina nebikale ba bungi. Ubashila lukonko kampanda. Pashishe ubalaye bua kulua kuluandamuna pawalukila musangu mukuabu. Patudi tuenza nunku, tudi tulongolola njila bua patuapingana musangu udi ulonda. Kupinganyina bantu panyima pa matuku makese ke kudi mua kupatula bipeta bilenga. Bikalabi bitukolele bua kutuadija dilonga dia Bible ne muntu anu musangu wa kumpala au, tudi mua kukeba bua kutuadija dilonga edi musangu udi ulonda pikalaku mushindu.

⁹ Patudi tuyisha mu njila, tudienzejayi bua kuyikidisha bantu. Bantu batu banyisha bulelela batu bafila mêna abu, adrese, ne nimero ya telefone kudi bamue bamanyishi padibu bayisha mu njila. Bikala muntu au kayi wa mu teritware wenu, manyisha sekretere wa tshisumbu tshienu bua yeye atumine tshisumbu tshidi muaba udi muntu au usombela mamanyisha adi amutangila. Bikala sekretere kayi ne mushindu wa kuenza nunku, neatumine biro bia filiale mamanyisha adi atangila muntu au bua biro nkayabi bimone tshia kuenza bua kumupeta. Ngenzelu eu neambuluishe bua kukolesha dianyisha dia muntu eu divuaye muleje.

¹⁰ Pikala muntu mufile patupu nimero wende wa telefone, udi mua kumubikila pebe ku telefone bienze bu udi umupinganyina. Udianjile kulongolola kumpala kua dîba malu anuikala ne bua kuyukidila. Wikale ne mukanda webe wa Comment raisonner bua kukeba lukasa lukasa malu awikala nawu dijinga. Bamue bana betu batu bafika ku dilonga bilenga bia dikema ne bantu ku telefone, ne kabidi ne aba batu dibapeta ku mbelu dikala bualu bukole. Muanetu mukuabu wa bakaji uvua mutuadije kulomba nimero ya telefone ya ba-mamu bavua bitaba bua yeye kuyikila nabu bavuaye mupetangane nabu pavuaye mu mudimu wa ku nzubu ne ku nzubu, ndekelu wa bionso wakatuadija malonga a Bible abidi.

¹¹ Kuatshishanganayi ne bakulu bua kuambuluisha bana betu bakadi balekele kuyisha: Bakulu batu ne disanka dia kuambuluisha ne dinanga bana betu bonso bakadi batekete mu nyuma. Mpindieu bamue bana betu abu, buobu nkayabu bakadi batuadijilule kubuela mu bisangilu bia tshisumbu. Mbafike ku dijingulula ne: dikolesha malanda ne bulongolodi bua Yehowa didi diambuluisha bua kuikala bakubibue anu mudibu babileje mu Musambu wa 91. Bamue ba kudibu bakadi badiakaje bua kutuadijilula buambi. Bikala bamue bakadi balekele kuyisha balue mu Tshivulukilu mu ngondo eu, bumue badi mua kuanyisha bua kutuadija kulonga Bible. Bikalabi nanku, bakulu badi mua kulongolola bua muanetu kampanda alonge ne aba badi bakeba diambuluisha. Bikalabu bakusungule bua kuambuluisha mu bualu ebu, tshiwenza bua kubakuatshisha netshianyishibue bikole.​—Lomo 15:1, 2.

¹² Tungunuka ne ‘kuenza midimu mimpe’: Bantu ba bungi bavua benze bumpanda-njila buambuluishi mu ngondo umue anyi ya bungi, bakamona se: mudimu wabu wa buambi uvua mudiunde mu ngondo ivua ilonda. Bakapeta bantu bavua banyishe bulelela bakajingabu bua kupinganyina bua kubatangila. Biakabasaka bua kuenza muabu muonso bua kupatuka mu buambi misangu ya bungi bua kumona mua kupetangana ne bantu badi banyisha bulelela. Bamue bakatuadija malonga a Bible akabambuluisha bua kuikala kupatuka bikole mu buambi.

¹³ Bakuabu pabu bakapeta disanka dia bungi mu dienza mudimu wa bungi wa diyisha ne divuija bantu bayidi, ke kubasakabi too ne bua kukonkonona malu adi ne mushinga wa bungi mu nsombelu wabu. Nunku, bamue bakakepesha imue midimu yabu bua kutungunuka ne mudimu wa bumpanda-njila buambuluishi. Bakuabu pabu bakapeta mushindu wa kulua bampanda-njila ba pa tshibidilu. Bakashala batekemene anu Nzambi, kadi ki mmu bintu bidi bulongolodi ebu mua kufila nansha. Bakamona ne: ‘kupeshangana bintu ne kuikala badilongolole bua kuabanyangana bintu ne bakuabu,’ kudi kufila masanka a bungi a kudi Yehowa ne kabidi kukolesha ditekemena diabu dia kuikala ne ‘muoyo mulelela.’ (1 Tim. 6:18, 19, MML) Bushuwa, bidi biambuluisha tshisumbu tshijima padi bana betu ba bungi bangata mudimu wa bumpanda-njila. Bampanda-njila batu amu basue kuyukila ne bakuabu malu malenga atubu bamona mu mudimu wabu ne bumvuangana nabu bua kupatuka nabu mu buambi, nunku tshisumbu tshikola malu a mu nyuma ashindamamu atangalaka kudi bonso.

¹⁴ Tuikalayi bonso ‘babanji mu midimu mimpe’ mu tshikondo tshia Tshivulukilu etshi ne matuku adi alonda, ne bua kuenza nanku tudi ne bua kuvudija mudimu wetu wa bena Kristo. Tulejayi dianyisha bua tshidi Yehowa muenze pa kutupesha ditekemena dia muoyo wa kashidi pa buloba bupiabupia buakane.​—2 Pet. 3:13.