Mmunyi mudi dîku mua kushindama mu nyuma?

¹ Badi bela mêku a bena Kristo kalumbandi bua mudi benamu ‘bayila bua kunemeka ba mu dîku diabu.’ (1 Tim. 5:4) Kadi bu mudi malu mabi a bungi adi mua kutekesha ditabuja dietu matunyunguluke, bidi bikengela bua mêku enza muawu muonso bua kushalawu mashindame mu nyuma. Mmunyi mudi bualu ebu mua kukumbana?

² Bumfumu buebe buikale bu bua Kristo: Bamfumu ba mêku badi ne bua kuidikija Yezu Kristo mu mushindu udibu bambula majitu abu bua kukankamija ba mu mêku abu. Pa kumbusha dituleja dinanga ku lufu luende lua mulambu, Yezu udi utungunuka ne ‘kudisha ne kulama’ tshisumbu. (Ef. 5:25-29, Muanda Mulenga Lelu) Baledi ba dinanga badi balonda tshilejilu etshi tshia kulama ne dinanga dionso pa kutabalela bua kuikala kupesha bena mu mêku abu biakudia bia mu nyuma ku dituku ne ku dituku. Mu biakudia ebi mudi dilonga dia Bible mu dîku lumingu luonso, diyukidilangana dia malu a mu nyuma padiku mushindu ne dijikija bilumbu padibi bijuka.​—Dut. 6:6, 7.

³ Mu buambi: Bena mêku bonso badi ne bua kumanya se: kuyisha bakuabu malu adi atangila Yehowa ne majinga ende mbualu bua mushinga muvule mu ntendelelu wabu. (Yesh. 43:10-12) Binuikale nuenu baledi basue bua bana banudi balela kuikalabu Bantemu ba Yehowa ba lulamatu, nudi ne bua kutuadija anu patshidibu batekete bua kulongesha mitshima yabu bua mudimu wa buambi. Akulayi bua malu adi aleja mudibi bikengela kuikala ne lungenyi lua didifila mu mudimu eu ne kuikala kuyisha lumingu luonso. (Mat. 22:37-39) Pashishe ulongolole bua nuikale nupatuka nabu mu buambi pa tshibidilu.

⁴ Ambuluisha bena mu mêku enu bua kumanyabu mushinga udi nawu mudimu wa buambi pa kulama imue minite mu dilonga dia mu dîku dia ku lumingu bua kulongolola ne kuambulula manaya adi aleja mua kuyisha. Longesha muana ne muana yonso mua kuyisha, ubambuluisha bua kuyabu kumpala bilondeshile bidimu ne lungenyi luabu. Kunyima kua diyisha pamue nabu, yukilayi bua baleje mudibu bamone buimpe bua Yehowa. Londelanganyi malu adi akolesha ditabuja. Padi mêku ‘alabula ne: Mukalenge udi muimpe,’ malanda abu ne Yehowa adi ashemakana, bibambuluisha bua kukandamena ‘bubi buonso.’​—1 Pet. 2:1-3.

⁵ Mu bisangilu: Mmunyipu mudibi bimpe padi bena mu dîku bonso bambuluishangana bua kuikala kubuela mu bisangilu, nangananga tshikondo tshidi umue wa kudibu udiumvua mupungile bikole, malu mamutekeshe mu maboko anyi padi midimu ya bungi imujingakaja! Nsongakaji mukuabu Ntemu wakamba ne: “Tatu utu mupungile bikole patuye ufuma ku mudimu. Kadi ntu mmuyikidila bualu kampanda bulenga buakuilabu mu bisangilu dilolo adi, ne bitu bimupesha bukole bua kuyamu. Pashishe, dituku dindi panyi ndiumvua mupungile bikole, yeye utu unkankamija bua kuya mu bisangilu.”​—Eb. 10:24, 25.

⁶ Kuenza malu pamue: Mêku adi ne bua kuikala enza malu pamue, tshilejilu midimu ya ku nzubu. Dîba dia kujikijaku lutetuku mu mushindu muakanyine didi ne bua kuikalaku. Kuya kuendakana, kunaya ne kuya kutangila balela anyi balunda mbintu bidi mua kupetesha bikondo bia disanka bikalabu bashala bavuluka anu kuvuluka.​—Muam. 3:4.

⁷ Mêku a bena Kristo adi mashindame adi dituku dionso atshimuna malu adi atatshisha bua kuya kumpala mu nyuma. Padibu basemena menemene kudi Yehowa, badi bapeta bukole budiye ufila.​—Ef. 6:10.