Sanka ne biudi nabi
1 Dîyi dia Nzambi didi ditudimuija bua kukumbajila bena mu dîku dietu bidibu nabi dijinga, kadi kuenza nunku kakuena ne bua kulua mpindieu tshipatshila tshinene mu nsombelu wetu to. Malu a mu nyuma adi ne bua kuangata muaba wa kumpala. (Mat. 6:33; 1 Tim. 5:8) Kuikala ne nkatshinkatshi udi ukengendibua mbualu bukole mu ‘bikondo bia njiwu bikole mua kupita nabi’ mutudi emu. (2 Tim. 3:1, NW) Kadi ntshinyi tshiatuambuluisha bua kuenza nanku?
2 Ikala umona malu mudi Bible uamona: Dîyi dia Nzambi didi ditudimuija ne: dikeba biuma ne muoyo mukunze didi mua kushipa muntu mu nyuma. (Muam. 5:10; Mat. 13:22; 1 Tim. 6:9, 10) Mu bikondo bikole ebi, bidi mua kuikala bualu bua njiwu tuetu tudifila bikole mu mudimu wetu anyi mu dikeba dia makuta eku tulengulula malu a mu nyuma bu mudi: dibuela mu bisangilu, dilonga ne mudimu wa buambi. (Luka 21:34-36) Kadi, Bible udi wamba ne: ‘Bituikala ne biakudia ne bia kuvuala, tusanke bua bintu ebi.’—1 Tim. 6:7, 8, Muanda Mulenga Lelu.
3 Kabiena bisua kumvuija ne: bena Kristo mbalombibue bua kushala bapele to. Tshidibi, mubelu eu udi utuambuluisha bua kujadika bintu bitudi nabi dijinga menemene bu mudi: biakudia, bilamba ne muaba wa kulala. Tuetu bikale ne bintu bitudi mua kudikuatshisha nabi, kabiena ne mushinga bua kukeba bua kuikala amu ne nsombelu wa bena kantu ku bianza to. Patudi tuela meji a kusumba tshintu anyi tukeba mukuabu mudimu wa kusakidila pa utudi nawu, mbimpe tuanji kudiebeja ne: ‘bidi ne mushinga menemene anyi?’ Kuenza nanku nekutuambuluishe bua kutumikila mubelu eu mufunda ku nyuma wa Nzambi wa se: ‘Mioyo yenu kayikadi ne lukuka lua biuma, nuikale ne disanka ne bintu binudi nabi, bualu bua Nzambi muine wakuamba ne: tshiena nkulekela, nansha kakese, tshiena nkushiya tshianana.’—Eb. 13:5.
4 Tuetu tutekemena kudi Yehowa, neatukuatshishe. (Nsu. 3:5, 6) Nansha mutudi ne bua kuenza mudimu mukole bua kupeta mushindu wa kukumbaja bitudi nabi dijinga dituku dionso, nsombelu wetu kêna ne bua kushindamena anu pa malu au to. Nansha tuetu bikale ne bintu bikese ta bia bungi, tudi ne bua kueyemena Yehowa bua kupeta mushindu wa kukumbaja majinga etu. (Filip. 4:11-13) Nenku ku ndekelu Nzambi udi utupa disanka pamue ne mabenesha makuabu mavule.
5 Idikija ditabuja dia bakuabu: Muledi mukuabu uvua mukoleshe muanende wa bakaji mu njila wa bulelela wakakepesha ku kakese ku kakese malu a mu nsombelu wende. Nansha muvuaye musombele mu nzubu muimpe wa dibalasa, wakadishiya e kuya kusombela mu nzubu mukese ne pashishe kuyaye kubuela mu kazubu ka shambre umuepele. Dienza nunku diakamuambuluisha bua kukepesha bungi bua mêba avuaye upitshisha ku mudimu wende bua kumonaye mua kuenza mêba a bungi mu buambi. Pakakola muanende wa bakaji au ne kuyaye ku dibaka, mamu eu wakalomba bua kuangata pansio kayi muanji kukumbaja bidimu bia diyamu nansha muvua muanda eu ne bua kumukepeshila makuta avuaye upeta. Patudi tuamba apa, muanetu wa bakaji eu ukadi muenze bidimu muanda-mutekete mu bumpanda-njila bua pa tshibidilu ne kêna unyingalala nansha kakese bua didibudisha dia bintu divuaye musungule edi bua kumona mua kuteka malu a Bukalenge pa muaba wa kumpala mu nsombelu wende.
6 Mukulu mukuabu ne mukajende bavua bampanda-njila munkatshi mua bidimu bia bungi eku bakolesha bana basatu bajima. Bonso dîku dijima bakalonga mua kusanka anu bivua bikengela kuikala nabi pamutu pa kukeba bua kupeta bionso bivuabu bajinga. Mukulu eu udi wamba ne: “Tuvua ne bua kupepeja nsombelu wetu bikole. Nansha mutuvua imue misangu tupitshila mu bimue bikondo bikole, Yehowa uvua misangu yonso utupetesha bituvua nabi dijinga. . . . Pandi mmona bena dîku dianyi bateka malu a Bukalenge pa muaba wa kumpala nunku, ndi mmona se: bionso bidi bienda anu muvuabi bikengela ne ndi mumanye mua kukumbaja malu.” Mukajende udi wamba pende ne: “Pantu mmona [bayanyi] mumonangane anu ne malu a mu nyuma, ntu ngumvua disanka dia bungi munda muanyi.” Bana babu badi pabu ne disanka bua mudi baledi babu bangate dipangadika dia kusadila Yehowa ku dîba ne ku dîba.
7 Bua bonso badi basungula njila eu wa dilamata Nzambi pamutu pa kukeba bua kupeta bintu bia panu, Bible udi ubalaya mabenesha mavule mpindieu ne mu matuku atshilualua.—1 Tim. 4:8.