Tusangishayi bantu ba miakulu yonso
1 Dîyi dia Nzambi didi dienda dikumbana! Bantu “ba mu bisamba bidi biakula miakulu mishilangane” badi babuela mu ntendelelu mulelela. (Zek. 8:23, Mukanda wa Mvidi Mukulu, [Katolike, MMM]) Mmushindu kayi udi Bantemu ba Yehowa bambuluisha bantu ba ‘munkatshi mua bisamba bionso, ne bantu bonso ne miakulu yonso’ bua kuikalabu kabayi katoba kumpala kua Yehowa, ne kutekemena bua kupanduka ku “dikenga dinene”?—Buak. 7:9, 14.
2 Bulongolodi bua Nzambi budi bukumbaja dijinga edi: Kasumbu Kaludiki nkalongolole bua mikanda yetu kuikalayi mu miakulu mitue ku 380 bua bantu ba pa buloba bujima bamanye mushinga wa lumu luimpe. Kulongolola ne kupatula mikanda mu miakulu ya bungi nanku mmudimu munene be! Udi ulomba bua kuikala ne tusumbu tuvule tua bakudimunyi bapiluke ne kubakuatshisha mudibi bikengela bua kukudimunabu mikanda yetu mu miakulu yonso eyi, kabidi kuyipatula ku biamu ne kuyitumina bantu. Kadi mudimu munene ngudibu benza kudi bamanyishi ba Bukalenge badi batuadilangana mukenji wa mu Bible udi upandisha mioyo ya bantu.
3 Tuitabayi lutatu ludiku: Bantu ba bungi badi bakula miakulu mienyi badi mpindieu miaba mivule. Bua kufikisha lumu luimpe kudibu, basadidi ba Nzambi ba bungi badi badienzeja bua kulonga muakulu wa bena-Chine, kulonga tshiena-Russie, tshiena-Espagne peshi muakulu mukuabu udi bantu bakula muaba udi bamanyishi aba basombele. Bakuabu badi balonga muakulu wa tumama wa bena Amerike. Mu Congo yonso ibidi mudi bisumbu bitue ku 2 489 ne tusumbu tukese 63 bia Bantemu badi bayisha ne benza mudimu ne mikanda mu miakulu 17 pa kumbusha muakulu wa Mfualansa. Bamue bantu bavua kabayi banji kumvua bualu bua Yehowa peshi kabayi bamanye bualu nansha bumue pa bidi bitangila Bible badi bitaba bulelela bua mu Dîyi dia Nzambi.—Lomo 15:21.
4 Tudiku mua kudienzeja petu bikole bua kumanyisha bantu ba ku babende badi basombele mu teritware wetu lumu luimpe anyi? (Kolos. 1:25) Bisumbu bia bungi bidi bilongolola bua kuyisha miaba idi benyi mu teritware yabi. Bamanyishi batu banji kulonga malu a bungi a mu muakulu wa bantu abu bua kumona mua kuyishaku nansha mu mêyi makese, bu mudi kuamba patupu ne: “Muoyo webe. Ndi ne mukenji muimpe wa kukumanyisha. [Pashishe ufila trakte anyi broshire udiye nende mu muakulu au.] Ushale bimpe.” Bushuwa, Yehowa udi ubenesha mêyi makese a mbangilu a nunku!
5 Mukenji wa Bukalenge utu ukoka bantu ba miaba yonso ne miakulu yonso. Tumanyishayi bantu ba nunku mukenji au dîba dionso didi mpunga umueneka.