Programe mupiamupia wa mpuilu wa tshijengu
1 Tudi ne bua kueyemena Yehowa bua tuetu kushala bashindame mu ditabuja mu bukua-panu bunyanguke ebu. Bidi biumvuija tshinyi bua nsombelu wetu wa dituku dionso? Mmunyi mudi kueyemena Yehowa kutuambuluisha, kuambuluisha kabidi ne dîku dietu? Mmunyi mudibi bituambuluisha bua bulongolodi bua Satana ebu kabutupambuishi? Mpuilu wa tshijengu wa tshidimu tshia 2003 udi wandamuna nkonko eyi. Tshiena-bualu tshiende tshidi ne: “Eyemena Yehowa ne enza malu mimpe.”—Mus. 37:3.
2 Dieyemena dietu dia Yehowa ki ndia kuleja anu mu bikondo bia pa buabi ta mu bikondo bitudi dijinga menemene ne diambuluisha to. Didi ne bua kumueneka mu malu atudi tuenza dituku dionso. Bualu ebu mbabumvuije mu muyuki wa mbangilu eu: “Eyemenayi Yehowa misangu yonso.” (Mus. 62:8) Muyuki wa bitupa binayi eu wa ne: “Tueyemenayi Yehowa” neutuleje mua kupeta ne kutumikila malu adi mu Bible adi mua kutuambuluisha bua kutuadija dibaka dia disanka, bua kujikija ntatu itu ijuka mu dîku ne kupeta bintu bitudi nabi dijinga.
3 Bulongolodi bua Satana budi bukeba bua tuikale ne mmuenenu mukonyangale wa tshidi tshimpe ne tshidi tshibi ne bulubakaja lungenyi luetu bua katumanyi mua kusunguluja malu adi ne mushinga ne adi kaayi nawu. (Yesh. 5:20) Miyuki eyi: “Dilamayi ku malu a tshianana” ne “Epukayi malu mabi ne nuikale benji ba malu mimpe” neyikoleshe dipangadika dietu dia kutumikila mêyi malenga a Yehowa.—Amo. 5:14.
4 Pabutulabu bulongolodi bubi ebu kudi Yehowa, nebikengele bua basadidi ba Nzambi bamueyemene muabu muonso. Ke tshiambabu mu muyuki wa patoke eu: “Dipikudibua ku makenga a panu dikadi pabuipi.” Pashishe, nebatulombe bua tudikonkonone muntu ne muntu patuikala tuenda tulonda muyuki udi wamba ne: “Nebakubaleku pebe mu bantu badi bakanyine bua kubuela mu Bukalenge bua Nzambi anyi?” Mpuilu eu neajike ne muyuki udi ukankamija wa ne: “Eyemena malu adi Yehowa mulaye.”
5 Tshikondo tshinene tshia mpuilu yonso itu yenzeka tshitu tshikondo tshitubu bela muyuki wa batismo. Muntu yonso udi ujinga kutambula udi ne bua kuyikila ne mutangidi-muludiki pa lukasa bua se: balongolole tshidi tshikengela kuenza.
6 Mu bikondo bitudi katuyi ne wa kueyemena ebi, anu Yehowa ke muntu mulelela utudi ne bua kueyemena ne kushindamena. (Mus. 118:8, 9) Tuetu bonso tukoleshayi dieyemena dietu kudi Yehowa, tuenze nanku pa kuikalaku mu mpuilu mujima.