Tulejayi lulamatu lua buena-Kristo padi umue wa mu dîku dietu muikala muipata mu tshisumbu

1. Nnsombelu kayi udi mua kubueja lulamatu lua muena Kristo mu diteta?

¹ Malanda atu pankatshi pa bena dîku dimue atu mua kuikala makole. Malanda a nunku adi mua kubueja muena Kristo mu diteta padi muena dibaka nende, muanende, muledi wende anyi mulela mukuabu wa pabuipi bikala bamuipate anyi mudipatukile nkayende mu tshisumbu. (Mat. 10:37) Mmunyi mudi bena Kristo ba lulamatu mua kuangata mulela wa mushindu eu? Mushindu utudi tumuenzela malu udiku mua kushilangana bu bikalaye musombele mu nzubu umue netu anyi? Tshia kumpala, tuanji kumona mêyi adi Bible ufila bua tshilumbu etshi, mêyi aa adi atangila ne bantu badibu bipate kabidi ne badi badipatukile nkayabu mu tshisumbu.

2. Bilondeshile Bible, mmunyi mudi bena Kristo mua kuangata muntu udibu bipate mu tshisumbu?

² Mushindu wa kuangata bantu badibu bipate: Dîyi dia Nzambi didi dibela bena Kristo bua kubenga kuikala bulunda ne bantu badibu bipate mu tshisumbu, diamba ne: ‘Kanubuelakanyi ne muntu udi ne dîna dia muanetu wa mu Kristo bikalaye muena masandi, anyi muena lukuka lua bintu, anyi muena mpingu, anyi mupendianganyi, anyi mukuatshiki wa maluvu, anyi munyengi wa bintu, kanudi mene ne muntu wa nunku. Umushayi muntu mubi au munkatshi muenu.’ (1 Kol. 5:11, 13) Mêyi a Yezu adibu bafunde mu Matayo 18:17 adi akumbanangana kabidi mu muanda eu: ‘[Muntu udibu bipate] ikale biende ku mêsu kuebe bu muntu wa bende anyi mulambuishi wa milambu.’ Bateleji ba Yezu bavua bamanye muvua bena Yuda mu tshikondo atshi kabayi mua kuikala shetasheta ne bantu ba bisamba bikuabu ne muvuabu bangata balambuishi ba bitadi bu bisota, bu bantu bavuabu kabayi banyisha. Nunku Yezu uvua ulongesha bayidi bende bua kubenga kudisanga ne bantu bavuabu bipata mu tshisumbu.​—Tangila Tshibumba tshia Nsentedi tshia dia 1 Kasuabanga 1982, dib. 5-7 (15 Tshisua-munene 1981, dib. 17-19 [Mfual.]).

3, 4. Mmalanda a mushindu kayi atudi katuyi mua kudia ne bantu badibu bipate anyi badi badipatukile mu tshisumbu?

³ Ebi bidi biumvuija ne: bena Kristo ba lulamatu kabena ne bua kuikala ne malanda a mu nyuma ne muntu yonso udibu bipata mu tshisumbu to. Kadi ki nkujika to. Dîyi dia Nzambi didi diamba ne: ‘kanudi mene ne muntu wa nunku.’ (1 Kol. 5:11) Nunku, tudi petu tuepuka bulunda ne muntu udibu bipata mu tshisumbu. Ebi bidi bisua kumvuija ne: katuena ne bua kuitaba bua kudisanga nende mu difesto kampanda, mu manaya anyi diya kusumba bintu pamue, ta kusomba ku mesa amue bua kudia nende kumbelu anyi mu restoran anyi kuenza nende pamue malu makuabu nansha.

⁴ Netuambe tshinyi bua kuyukila ne muntu udibu bipate mu tshisumbu? Nansha mudi Bible kayi wakula patoke bua muanda ne muanda wonso mu tshilumbu etshi, 2 Yone 10 udi utuambuluisha bua kumanya tshidi lungenyi lua Yehowa mu bualu ebu, wamba ne: ‘Bialua muntu kunudi kayi ulua ne diyisha edi, kanumuitabuji mu nzubu, kanumuedi muoyo.’ Tshibumba tshia Nsentedi tshia dia 1 Kasuabanga 1982 mu dibeji dia 12 (15 Tshisua-munene 1981, dib. 23 [Mfual.]) tshidi tshiamba ne: “Tudi bamanye se: ‘kuela muntu muoyo’ wetu wa tshianana eu kudi mua kuenza bu tshibangidilu tshia muyuki anyi bulunda buine. Tudi basue kuela tshidia tshia kumpala tshia mushindu eu ne muntu udibu bipate mu tshisumbu anyi?”

5. Padibu bipata muntu mu tshisumbu, mmalu kayi adiye ujimija?

⁵ Bushuwa, anu mudi Tshibumba tshia Nsentedi tshimue tshimue etshi tshileja mu dibeji dia 18 (29 mu Mfualansa), tshiamba ne: “Nudi ne bua kumanya se: bena Kristo badi baditua mu dienza mpekato too ne mudibo bafika ku dipatshibua badi bajimija malu a bungi: dianyishibua dia Nzambi, . . . ngikadilu mulenga wa kusomba bilenga ne bana betu balume ne bakaji ne tshitupa tshinene tshia malanda masheme avuaye nawo ne bena nkristo bangabanga.”

6. Muena Kristo udi ne bua kukosa malanda onso ne muntu wa mu dîku diabu udibu bipate mu tshisumbu kadi udibu basomba nende mu nzubu umue anyi? Umvuija.

⁶ Kudi bantu batudi nabu mu nzubu umuepele: Ebi bidi biumvuija ne: bena Kristo badi mu nzubu umuepele ne muntu udibu bipate mu tshisumbu kabena ne bua kuyukila nende, kudia nende ne kuenza nende midimu ya ku mbelu pamue bu muvuabu benza kumpala anyi? Tshibumba tshia Nsentedi tshia dia 15 Tshisanga 1991 dibeji dia 22 tshidi tshiamba mu mêyi adi kuinshi kua dibeji ne: “Bikala mu dîku dia bena Kristo mudi muntu muipata mu tshisumbu, udi mua kutungunuka ne kuenza malu onso a pa tshibidilu mu midimu ya mu nzubu.” Nunku, bena mu dîku ke badi mua kuangata dipangadika dia kumona pikalabi bikengela bua yeye kudia nabu pamue anyi kumubengela malu makuabu a ku nzubu. Nansha nanku, kabena ne bua kufila kudi bana betu bakuabu badi mu tshisumbu lungenyi lua se: malu onso adi enzeka anu bu muvuawu enzeka kumpala kua kabayi banji kuipata muena mu dîku au nansha.

7. Mmunyi mudi malanda a mu dîku ashintuluka padi umue wa kudibu bamuipate mu tshisumbu?

⁷ Kadi, Tshibumba tshia Nsentedi tshimue tshimue atshi mu dibeji dia 15 ne dia 16 (dia 26 ne dia 27 mu Mfualansa), tshidi tshiamba kabidi bua bidi bitangila muntu udibu bipate anyi udi mudipatukile mu tshisumbu ne: “Kakuena bulanda nansha bumue bua mu nyuma butudi mua kudia nende to. Bualu ebu budi mushindu umue nansha bikalaye muena diku dietu. . . . Diyukila dia mianda ya mu nyuma didi ne bua kushintuluka. Tshilejilu, mu diku didi mulume muipatshibue, mukajende ne bana kabakuikala ne disanka bua kulombolaye dilonga dia mu diku, dibala dia Mukanda wa Nzambi, anyi kuenza disambila to. Bikalaye musue kuenza disambila bangabanga ne kudia, udi mua kuenza disambila edi bualu nku nzubu kuende. Kadi bantu ba mu diku diende buobu badi ne bua kuenza disambila mundamunda bua kulomba Nzambi (Nsu. 28:9; Mis. 119:145, 146) Bu bikala muntu muipata udi mu diku, muikale ne dijinga dia kudisangisha mu dilonga dia mu diku anyi dibala dia Bible, badi mua kumuitabila, kadi amu bu bikalaye kayi ukeba bua kulongesha bantu bakuabo wende ndongeshilu wa pa buende [ta wende ngumvuilu wa malu a Nzambi] anyi wa tshiende tshitendelelu.”

8. Mbujitu kayi budi nabu baledi bena Kristo bua muanabu udibu bipate mu tshisumbu utshidi musombele ku nzubu kuabu?

⁸ Bikala muana wa tshitenda wa mu nzubu wa utshidi mupuekele yeye muipata mu tshisumbu, baledi bende bena Kristo badi amu ne bujitu buabu bua dimukolesha bimpe. Tshibumba tshia Nsentedi tshia dia 15 Kasuabanga 1988, dibeji dia 20 (Mfual.), tshidi tshiamba ne: “Anu bu mudibu batungunuka ne kupesha muana au biakudia, bilamba ne muaba wa dilala, baledi nebalongeshe ne nebafile manyoka kudi muana bilondeshile tshidi Dîyi dia Nzambi dileja. (Nsumuinu 6:20-22; 29:17) Baledi bende ba dinanga badi mua kulongolola bua kuikala kulonga nende Bible, nansha mudi muana eu muipata mu tshisumbu. Pamuapa bidi mua kumuambuluisha, kumufiksha bumue ne kudiakajaye malu bua dilonga diabu nende anu yeye nkayende edi. Anyi badi mua [kupangadija] bikala muana eu mua kutungunuka ne kubuela mu dilonga dia mu dîku didibu benza; atshi tshilumbu ntshibatangile anu buobu.”​—Tangila kabidi Tshibumba tshia Nsentedi tshia dia 1 Kasuamansense 2001 dibeji dia 16-17.

9. Mmushindu kayi udi muena Kristo mua kuikala upetangana ne mulela wende udibu bipate mu tshisumbu kadi udibu kabayi basomba nende ku nzubu?

⁹ Balela badi basombela kukuabu: Tshibumba tshia Nsentedi tshia dia 15 Tshisanga 1988 dibeji dia 28 tshidi tshiamba ne: “Malu adi mashilangane bikala muntu udibu bipate anyi udi mudipatukile mu tshisumbu au muikale mulela udi musombele kua tshianana. Kudi mushindu wa kuepuka mulela wa nunku eu mu malu onso. Nansha kuoku kuikale imue mianda ya mu dîku ya kuyukila, misangu ya disombasomba nende idi ne bua kuikala anu mikese menemene,” bionso ebi bilondeshile mukenji wa Nzambi udi utulomba bua ‘kubenga kubuelakana ne muntu’ udi muenji wa mpekatu udi kayi unyingalala. (1 Kol. 5:11) Bena Kristo ba lulamatu badi ne bua kudienzeja muabu muonso bua kuepuka lusombu ludi kaluyi ne mushinga ne balelela ba nunku, nansha kukepesha menemene malu onso a bungenda adibu benza nabu.​—Tangila Tshibumba tshia Nsentedi tshia dia 1 Kasuabanga 1982 dibeji dia 17, 18 (15 Tshisua-munene 1981, dib. 28-29 [Mfual.]).

10, 11. Mmalu kayi ikala muena Kristo ne bua kukonkonona kumpala kua kuitabila mulela wende udibu bipate mu tshisumbu bua kuluaye kusombela kumbelu kuende?

¹⁰ Tshibumba tshia Nsentedi etshi tshidi tshikoka kabidi ntema yetu ku bualu bukuabu budi mua kujuka: “Tuakulayi bua muntu kampanda wa mu tshiota, muana, tatu anyi mamu, uvua muipatshibue mu tshisumbu kadi kavua musombe pamue ne bena diku, [kadi mpindieu] mmusue kupingana bua kusomba pamue ne bena diku. Diku didi mua kuitaba muntu wa mushindu’eu anyi? Diku ke didi mua kuangata dipangadika bilondeshile nsombelu. Tshilejilu, muledi eu, tatu anyi mamu, udi ne disama anyi? Bidi bikengela kumuambuluisha ne biakudia ta bivualu bu mudiye kayi ne mushindu anyi? Bu bikalabi nenku, bana bende bena Kristo badi ne bua kumuambuluisha. (1 Tim. 5:8) . . . Njila udibo ne bua kulonda [nealondeshile] malu a bungi, bu mudi majinga adi nawo muntu muena budi panshi eu, ngikadilu wende ne mushinga udi tatu wa nzubu nawo bua bidi bitangila mianda ya mu nyuma ya bena mu nzubu muende.”​—Tshibumba tshia Nsentedi 1 Kasuabanga 1982, dibeji dia 16-17 (tshia dia 15 Tshisuamunene 1981, dib. 27-28).

¹¹ Bua bidi bitangila muana, tshiena-bualu tshimue tshimue etshi tshidi tshitungunuka ne: “Bidi bimpe bua baledi bena nkristo kuangatabo muana mu bule bua tshikondo kampanda, bualu muana eu udi ujinga bua bamuambuluishe ne bintu bia kudikuatshisha nabi nansha bu mudiye muipatshibue mu tshisumbu. Kadi baledi badi ne bua kukonkonona nsombelu wa muana misangu mivule. Kena ne mushindu wa kudiambuluisha yeye nkayende anyi? Anyi tudi mua kumubikila ku nzubu kuetu bua [ikale] ne nsombelu mulenga anyi? Nnsombelu kayi ne ngikadilu udiye nende? Mmufuanyine kubueja ‘luevene’ mu diku anyi?​—Galatia 5:9.”

12. Ng’amue malu kayi adi ambuluisha mu bualu ebu budibu balongolole bua kuipatangana mu tshisumbu?

¹² Masanka adi muntu upeta padiye ne lulamatu kudi Yehowa: Kulonda mibelu ya mu Mukanda wa Nzambi pa bidi bitangila tshilumbu tshia dipata bena malu mabi mu tshisumbu tshia bena Kristo ne kuepuka benji ba mpekatu badi kabayi banyingalala kudi ne mushinga wa bungi. Kudi kuambuluisha bua kulama bukezuke mu tshisumbu ne kutusunguluja, kuleja ne: tudi balondi ba mêyi a mushinga a mu Bible. (1 Pet. 1:14-16) Kudi kutukuba ku ngenyi idi inyanga bantu. (Gal. 5:7-9) Kudi kupetesha kabidi muena mpekatu mushindu wa kupetela dilongesha ku dinyoka didiye upeta, dilongesha didi mua kumuambuluisha bua kupatula “mamuma a ditalala, mamuma a buakane mene.”​—Eb. 12:11.

13. Ndiakajilula kayi dia malu divua dimue dîku dienze ne kuakapatuka bipeta kayi?

¹³ Kunyima kua bamane kuteleja muyuki kampanda mu mpuilu wa tshijengu, muanetu wa balume ne muanabu wa bakaji bakamona ne: bivua bikengela bua kuakaja malu makuabu mu mushindu uvuabu bangata mamuabu uvua musombele kua tshianana ne uvuabu bipate mu tshisumbu kukadi bidimu bisambombo. Diakamue panyima pa mpuilu, muanetu wa balume wakela mamuende nshinga, kuanjiye kumuleja muvuaye yeye ne muanabu wa bakaji bamunange, nunku pashishe kumumvuijaye ne: kabakuikala bamuakuisha kabidi to, anu kuoku kuikale bualu kampanda bua mushinga budi bujinga bua buobu kutuilanganabu. Matuku makese panyima, mamuende wakabanga kubuela mu bisangilu ne kufika too ne ku dipingana mu tshisumbu. Kabidi, bayende uvua kayi muena Kristo wakatuadija kulonga ne panyima pa matuku wakatambula.

14. Bua tshinyi tudi ne bua kutumikila ne lulamatu tshidibu balongolole bua kuipata mu tshisumbu benji ba mpekatu badi kabayi banyingalala?

¹⁴ Ditumikila dietu ne lulamatu dia tshidibu balongolole bua kuipata bantu badi benza bibi kadi kabayi banyingalala, didibu baleje mu Bible didi dileja dinanga dietu bua Yehowa ne dipesha muntu udi umuyobola diandamuna. (Nsu. 27:11) Tuetu petu, tudi mua kutekemena mabenesha a Yehowa, ne kabidi neatuanyishe. Mukalenge Davidi wakafunda bua bualu bua Yehowa ne: “Tshiena mupambuke nansha kakese ku mikenji yende. Wewe udi uleja bulamate kudi bena bulamate.”​—2 Sam. 22:23, 26, MMM.