Tulongayi mua kuyukidishangana!

¹ Bua kuenza mudimu wetu wa diyisha ne divuija bantu bayidi, tudi ne bua kumanyisha bakuabu malu atudi bamanye. (Mat. 24:14; 28:19, 20) Bidi mua kumueneka bikole bua kuyukidilangana nansha munkatshi mua balunda. Ntshinyi tshidi mua kutuambuluisha bua kumanyisha bantu benyi lumu luimpe?

² Baudi uyukila nabu bakuangate bu mulunda kadi ki mbu muenyi to: Teta bua kuditeka pa muaba wa bantu bautu uyukila nabu mu buambi. Bua nsombelu udiku lelu pa buloba, bidi biumvuika bua mudi bamue bantu mua kuelela bakuabu meji mabi anyi kuikala ne buôwa bua bantu badibu kabayi bamanye. Buôwa ebu budi mua kupangisha bantu bua kuyukila ne benyi. Tshia kuenza ntshinyi bua kuambuluisha bantu baudi upetangana nabu mu buambi bua kabikadi ne buôwa? Kumpala kua tuetu kuamba dîyi nansha dimue, umue mushindu utudi tubamanyisha malu nku mmuenekelu wetu muimpe udi uleja mutudi bena bupuekele. Mvuadilu wetu muakane udi uleja kanemu udi utuambuluisha bua kulekelabu kututshina.​—1 Tim. 2:9, 10.

³ Mushindu mukuabu udi wambuluisha bua kuyukila bilenga ne bantu nkuikala ne mpala kayi mukange ne wa bulunda. Kuenza nunku kudi kuambuluisha bua bakuabu kudiumvuabu bimpe kabayi bapampakana, ne kuteleja bidibu babambila. Bidi bikengela kudilongolola bimpe. Tuetu bikale ne malu matoke bimpe mu lungenyi luetu, netuakule katuyi tudia tshibanga to. Patudi ne lungenyi lutukija mushindu eu, mukenji wetu udi mua kukoka ntema ya bakuabu. Mamu mukuabu wakamba nunku bua Ntemu kampanda uvua uya kumutangila: “Tshindi muvuluke bua mukaji au tshidi anu mpala wende wa mimuemue ne wa ditalala uvuaye nende. Bivua binkemesha bikole.” Ngikadilu au wakunzuluila mamu eu njila wa kuteleja lumu luimpe.

⁴ Ngikadilu idi mua kufikisha utudi tuyukidisha bua kututeleja: Tudi ne bua kuikala tuditatshisha ne muoyo mujima bua malu a bakuabu. (Filip. 2:4) Umue mushindu wa kuenza nanku nkuanji kulekela kuoku mukuetu pende wakula, ki ng’anu tuetu nkayetu katshia tuangata anu tshiangatshidi to. Bushuwa kuyukila kudi kulomba kuteleja bakuabu. Patudi tulomba bantu batudi tuyukila nabu bua kuakulabu pabu ne tubateleja petu ne ntema, badi bamona ne: tudi tubangata ne mushinga. Nunku padi mukuetu wakula, katuikadi tuzuka anu bua kuamba bitudi balongolole to. Padiku mushindu, tumuele kalumbandi ne muoyo wa munda mujima, nenku tutete mua kuashila muyuki wetu pa bidiye wamba. Bikala malu adiye muambe aleja tshidi tshitamba kumutonda, shintulula muyuki webe bua kuakuila pa malu adi amutonda au.

⁵ Bupuekele budi buambuluisha mu diyukidilangana. (Nsu. 11:2; Bien. 20:19) Bantu bavua baya kudi Yezu bualu uvua “mupole malu ne muena bupuekele mu muoyo.” (Mat. 11:29, Mukanda wa Mvidi Mukulu [Katolike, MMM]) Ku lukuabu luseke, didiangata ne mushinga didi dinyemesha bantu kutudi. Bua nunku, nansha mutudi bashindike ne: tuetu ke badi ne bulelela, tudi tuepuka ne meji onso ngakuilu wa kuleja bantu ne: anu bietu bitudi tuamba ke bidi bilelela katuyi tuanji kutelejaku bidibu bamba.

⁶ Tshia kuenza ntshinyi bikala muntu wamba malu adi abengangana ne malongesha adi mu Bible? Bidi bikengela kuakaja mmuenenu wende eu anyi? Eyowa, bidi nanku, kadi kabiena nangananga bikengela kuenza nanku mu diyuki dietu nende dia musangu wa kumpala to. Pa tshibidilu, bitu bia mushinga bua kuasa muyuki ne muntu pa malu atudi tupetangana nende kumpala kua kumuambila malongesha a mu Bible adiye mua kumona makole bua kuitaba. Kuenza nunku kudi kulomba lutulu ne budimu mu diakula dietu. Paulo wakashiya tshilejilu tshilenga pa muanda eu pavuaye uyisha balumbuluishi ba ku tubadi tua mu Aleopago.​—Bien. 17:18, 22-31.

⁷ Dinanga dia bushuwa ke didi dipite bionso; nedituambuluishe bua kuikala bantu badi bamanye mua kuyukidishangana bimpe. Anu bu Yezu, tudi ne bua kumvuila bantu badi “bapungile, bakengakana bu mikoko kayiyi ne muyilami” luse. (Mat. 9:36, MMM) Ngikadilu eu udi utusaka bua kubatuadila lumu luimpe ne kubambuluisha bua kubuelabu mu njila wa muoyo. Mukenji wetu ng’wa dinanga; nunku tutungunukayi ne kuumanyisha mu dinanga. Patudi tuenza nunku, tudi tuidikija Yehowa Nzambi ne Yezu Kristo; Bayukidishanganyi banene mu diulu ne pa buloba.