Tuambuluishayi bakuabu bua batumbishe Yehowa
1 Badi benda bamanyisha bantu ba pa buloba bujima mukenji wa mushinga mukole eu wa ne: ‘Nutshine Nzambi, numutumbishe, bualu bua dîba dia dilumbuluisha diende diakulua; nukukuile yeye wakafuka diulu ne buloba ne mâyi manene ne mishimi ya mâyi.’ (Buak. 14:6, 7) Tuetu tudi ne diakalenga dia kumanyisha mukenji au. Kadi, ntshinyi tshidi bantu ne bua kumanya pa bidi bitangila Yehowa bua kumona mua kumutshina ne kumutendelela?
2 Dîna diende: Bidi bikengela bua bantu bamanye kusunguluja ku dîna Nzambi umuepele mulelela ne nzambi ya bungi ya dishima idi bantu batendelela lelu’eu. (Dut. 4:35; 1 Kol. 8:5, 6) Bushuwa, bafundi ba Bible mbakuate mudimu ne dîna dimanyike bimpe dia Yehowa misangu mipite pa 7 000. Nansha mudibi bikengela busunguluji patudi tumanyisha dîna dia Nzambi, tshidibi katuena ne bua kudisokoka anyi kumvua bundu bua kuditela nansha. Disua dia Nzambi didi ne: bantu bonso bafike ku dimanya dîna diende.—Mus. 83:18.
3 Bumuntu buende: Bua kutumbishabu Yehowa, bantu badi ne bua kumanya ne: udi Nzambi wa mushindu kayi. Tudi ne bua kubumvuija dinanga diende dia pa buadi, meji ende matambe onso, buakane buende bua tshishiki ne bukole buende butambe bunene, kabidi ne luse luende, bulenga buende ne ngikadilu yende mikuabu mitambe buimpe. (Ekes. 34:6, 7) Badi kabidi ne bua kulonga mua kutshina Yehowa ne muoyo wabu mujima, kumunemeka, kuikala bamanye ne: badi ne muoyo anu bualu mmuanyishe bua bikale nawu—Mus. 89:7.
4 Kusemena pabuipi ne Nzambi: Bua kupanduka ku dilumbuluisha dia Nzambi didi dilua, bantu badi ne bua kubila Yehowa ne ditabuja. (Lomo 10:13, 14; 2 Tes. 1:8) Kabiena bilomba anu dimanya patupu dia dîna dia Nzambi ne ngikadilu yende to. Tudi ne bua kuambuluisha muntu ne muntu yonso bua kudiaye malanda ne Yehowa, kumueyemena ne muoyo mujima. (Nsu. 3:5, 6) Padibu batumikila bidibu balonga, basambila Nzambi ne muoyo mujima ne bamona diambuluisha diende mu nsombelu wabu, ditabuja diabu nedikole, dibambuluisha bua kusemena pabuipi menemene ne Yehowa.—Mus. 34:8.
5 Tumanyishayi ne lukunukunu dîna dia Nzambi ne tuambuluishayi bakuabu bua bamueyemene muabu muonso ne bamutshine. Nunku tudi mua kufika ku diambuluisha bantu ba bungi bua kumanyabu Yehowa ne kumutumbisha bu ‘Nzambi wa lupandu.’—Mus. 25:5.