Leja dianyisha bua bintu bia mudimu wetu wa Nzambi

¹ Pavua Mukalenge Yoshiya wangata mapangadika bua kulongoluesha ntempelo, wakatumina bavua ne bujitu bua kuenza mudimu au dîyi ne: ‘Kababadi nabu argent yakafilabu mu bianza biabu, bualu bua bobu badi beyemenyibue.’ (2 Bak. 22:3-7) Dianyisha divua nadi bantu aba bua bintu bia tshijila divua dimueke patoke mu mushindu uvuabu bakuata mudimu ne bintu bia mushinga mukole bivuabu babapeshe. Lelu’eu, bu mutudi tuenza mudimu munsantu wa lumu luimpe lua Nzambi, nanku tudi ne bua kuleja lulamatu mu dienza mudimu ne bintu bia mushinga mukole ebi bidibu batupeshe.

² Mu mudimu wa buambi: Dianyisha mukenji wa mushinga mukole udi mu mikanda yetu ne dimanya dia se: mfranga bungiyi itu ituka bua kuyipatula didi ditusaka bua kuangata mikanda eyi ne mushinga wa bungi. Katuena ne bua kufila mikanda yetu tshifilafila nansha mu mpukapuka kudi aba badi kabayi menemene banyisha mukenji wa mu Bible to. Bikala muntu muleje dianyisha dikese bua lumu luimpe, nanku tudi mua kumupesha trakte pamutu pa mukanda mukuabu.

³ Mbimpe tufile mikanda yetu mu mushindu udi uleja ne: tudi bamanye mushinga wayi. Katuyilekedi pa miaba idi bantu ba bungi bapitshila bafuane kuyitangalaja tshianana. Bua tuetu kubenga kuyinyanga, bidi bimpe tuetu kuanji kubala bungi bua mikanda itudi nayi kumbelu kumpala kua kukeba mikuabu. Biwikala ushala pa tshibidilu ne bibejibeji bia pa mutu, wele meji bua kukepesha dilomba diebe.

⁴ Mikanda yetu nkayetu: Tudi mua kulombesha anu mikanda itudi nayi dijinga menemene. Tuikale ne nkatshinkatshi nangananga patudi tulombesha Bible ya deluxe, Bible ya referanse ne mikanda minene mikuabu bu mudi Concordance, Index, bibungu bia Étude perspicace ne mukanda wa Prédicateurs, mikanda yonso idi ilomba makuta a bungi bua kuyipatula.

⁵ Utuku uvuluka bua kufunda dîna diebe ne adrese webe pa mikanda yebe anyi? Bitu bikepeshisha dilomba dia mikanda mikuabu ya kupingaja pa mutu pa eyi idi mijimine. Wewe mujimije mukanda wa misambu, Bible anyi mukanda wa dilonga, udi mua kuusangana pamuapa mu bintu bijimine bidibu mua kuikala basangishe ku Nzubu wa Bukalenge peshi ku muaba wa mpuilu.​—Luka 15:8, 9.

⁶ Tudienzejayi bua kuikala ne meji mu dienza mudimu ne mikanda yetu. Ke mushindu wa kuleja lulamatu luetu mu dikuata mudimu bimpe ne bintu bia mushinga mukole bia Bukalenge bidi Yehowa mutupeshe.​—Luka 16:10.