Mushindu udi Batangidi ba Dilonga dia Mukanda dia Tshisumbu baleja mudibu batabalela muntu ne muntu

¹ Dilonga dia Mukanda dia Tshisumbu ndilongolola bua kuikale “mushindu wa kutamba kutabalela pa didiunda dia mu nyuma dia muntu yonso. . . . Abi bidi bileja buimpe bua Yehowa ne dinanga diende kudi bantu bende.” (om dib. 75; Yesh. 40:11) Mutangidi wa dilonga dia mukanda udi ne mudimu munene wa nunku wa ditabalela muntu ne muntu yonso.

² Mu dilonga dia mukanda: Bu mutu tusumbu tua dilonga dia mukanda tuikale ne bantu bakese, mutangidi wa kasumbu ka dilonga dia mukanda udi mua kumanya bimpe bena mu kasumbu kende bonso. (Nsu. 27:23) Misangu ya bungi kutu kumueneka bikondo bia kuanji kuyukilaku lumingu luonso kumpala anyi panyima pa dilonga dia mukanda. Mu ngondo mujima, mutangidi udi mua kufika ku diyikila ne muntu yonso wa mu kasumbu. Yeye muikale wenza nanku bidi biambuluisha bena mu kasumbu ka dilonga dia mukanda bua kuikalabu bamukuatshila malu kabayi belakana padibu mu lutatu anyi bakeba bua kubakankamijabu.​—Yesh. 32:2.

³ Mutangidi wa dilonga dia mukanda utu ukankamija bantu bonso ba mu kasumbu bua kuikalabu bandamuna mu dilonga. Utu wenza mushindu eu pa kulombola dilonga mu mushindu muimpe wa dinanga. (1 Tes. 2:7, 8) Udi wenza bua bantu bonso bikala bakula, too ne bana batekete. Bikala bamue bumvua bundu bua kuandamuna, udi mua kubambuluisha dîba dikuabu pa nkayabu, udianjila kubapesha mvese ya kubalabu anyi tshitupa kampanda tshia kuandamunabu mu tshikoso kansanga mu dilonga. Peshi udi mua kubaleja mushindu wa kuandamuna mu mêyi abu nkayabu.

⁴ Bikala tshindondi tshia mutangidi wa dilonga dia mukanda muikale musadidi wa mudimu, mutangidi nealongolole bua yeye pende ikalaku ulombola dilonga dia mukanda musangu umue ku ngondo ibidi yonso. Dienza nunku nediambuluishe mutangidi bua kumonaye mushindu udi musadidi ulombola ne kumupesha mibelu mimpe ya kumuambuluisha nayi. Eu ndongoluelu mulenga bushuwa muenza bua kuambuluisha bana betu bua kuakajabu ndongeshilu wabu!​—Tito 1:9.

⁵ Mu mudimu wa buambi: Bumue bua ku majitu manene adi nawu mutangidi wa dilonga dia mukanda mbua kuikala ntunga-mulongo mu mudimu wa buambi. (Nom. 27:16, 17) Udi ulongolola malu mu mushindu muakanyine bua buambi bua mu kasumbu ne udienzeja bua kuambuluisha bonso ba mu kasumbu kende bua kuikalabu ne disanka mu mudimu wabu wa buambi. (Ef. 4:11, 12) Bua kukumbaja bualu ebu, utu udifundila tshipatshila tshia kupatuka ne muntu yonso wa mu kasumbu kabu mu buambi. Utu kabidi ulongolola malu pamue ne mutangidi wa mudimu bua aba badi bajinga kuakaja bimue bitupa bia mudimu wabu babambuluishe kudi mumanyishi kampanda udi mumanyi wa mudimu.

⁶ Udi ne bua kuikala mulami wa dinanga: Mutangidi wa dilonga dia mukanda udi utabalela aba badi ne mushindu wa kuyisha anu kakese bua ntatu kampanda. Udi ukeba mushindu wa se: aba bonso badi ne mateketa a mubidi makole bua bukulakaje ta badi batshibukile panshi anyi aba badi basama bikole peshi bapetakane ne njiwu kansanga bikala bamanye ne: mbabanyishile bua kufila luapolo lua mudimu wa buambi nansha lua minite 15 bikalabu kabayi ne mushindu wa kuenza dîba dijima mu ngondo umue. (Komite wa Mudimu wa Tshisumbu ke udi ujadika bikala muntu kampanda muakanyine bua kumuanyishilabu bualu ebu anyi to.) Udi kabidi utabalela bantu ba mu kasumbu kabu badi mua kuikala kabatshiyi bayisha, udienzeja bua kubambuluisha bua batuadijulule mudimu wabu mu tshisumbu.​—Luka 15:4-7.

⁷ Bushuwa, tudi ne dianyisha dikole bua diditatshisha ne muoyo wa dinanga didi batangidi ba dilonga dia mukanda batuleja! Ditabalela didibu batabalela muntu ne muntu ne muoyo mujima didi diambuluisha bua ‘kupeta buonso buetu buobumue bua ditabuja, too ne ku luidi lua dikola didi mu tshiuwidi tshia Kristo.’​—Ef. 4:13.