Mêyi malenga mamba bua kuleja dianyisha
1 Bena mu mêku a bena Kristo ba miaba yonso mbaleje dianyisha ne disanka bua bande wa video wa Les jeunes s’interrogent . . . Comment me faire de vrais amis? Tatu mukuabu wa mu États-Unis wakamba ne: pavua bana bende batangile bande eu bakashala bapuwe tshimuma; bavua bumvue ne banyishe mua kutumikila malu onso a mu bande! Luapolo lukuabu lufumine ku Malawi ludi luamba ne: bansongalume ne bansongakaji Bantemu ba mu ditunga adi mbanyishe pabu mua kutumikila malu a mu bande eu bualu batu pabu bapeta ntatu ya muomumue ya kudi bansonga nabu mu tulasa. Tatu mukuabu wa mu ditunga dia Allemagne wakamba bua bande eu ne: “Ndi mmumone anu bu diandamuna ku masambila anyi.” Nsonga mukuabu wakamba pende ne: “Tuasakidilayi bua munudi numvuluija ne: Yehowa udi umvuluka.” Mukulu mukuabu wa mu ditunga dia Nouvelle Zélande wakalonda ne: “Mbiambuluishe umue wa ku bansongakaji ba mu tshisumbu tshietu bua kupinganaye mu njila wa muoyo.” Munga mukaji musela wakatangila bande au ne kuambaye ne: “Ndi njinga bua bansonga bonso badi mu bulelela batangile bande eu bua abambuluishe balamate njila wa bulelela!” Bena mu mêku wetu, bua tshinyi kubenga kutangila bande au tshiakabidi? Pashishe, nuyikidilangane bonso pamue pa nkonko idi ilonda eyi.
2 Mbangilu: Mulunda mulelela mmumue ne: ntshinyi?—Nsu. 18:24.
3 Bipumbishi bia bulunda: Mmushindu kayi uudi mua kumusha mu mutu muebe lungenyi lua didimona se: mbakulengulule kudi bakuebe? (Filip. 2:4) Bua tshinyi udi ne bua kuakaja ne muoyo mujima ngikadilu yebe ne nnganyi udi mua kukuambuluisha bua kuyakaja? Ntshinyi tshiakupetesha mushindu wa kudia bulunda ne bantu ba bungi ne nkuepi kuudi mua kubapeta?—2 Kol. 6:13.
4 Bulunda ne Nzambi: Mmunyi muudi mua kufika ku didia malanda ne Yehowa ne bua tshinyi bidi bikengela kuenza nanku? (Mus. 34:8) Nnganyi udi mua kutamba kukuambuluisha bimpe bia menemene mu bulunda buebe ne Nzambi?
5 Malunda mabi: Mbanganyi badi balunda babi? (1 Kol. 15:33) Mmunyi mudi balunda babi mua kufikisha muntu ku difua mu nyuma? Bualu bulonda mu Bible budi butangila Dina budi bukulongesha tshinyi?—Gen. 34:1, 2, 7, 19.
6 Drama wa mu tshikondo tshietu: Mmunyi muvua didishadila nkaya ditatshishe Tara? Mmunyi muvuaye ubingisha bulunda buvuaye mudie ne bansonga bena panu? Balunda abu bakamuteka mu njiwu kayi? Bua tshinyi baledi bende bakapangila mua kumona njiwu ayi, kadi nngikadilu kayi uvuabu nende pakamuambuluishabu bua kupetululaye makanda ende a mu nyuma? Mmushindu kayi uvua muanetu wa bakaji kampanda mpanda-njila mufike ku didienza mulunda mulelela wa Tara? Bua tshinyi bena Kristo badi ne bua kuteleja tshidi Nsumuinu 13:20 ne Yelemiya 17:9 yamba? Tara wakalonga bualu kayi bua mushinga mukole?
7 Nkomenu: Mmalu kayi audi mulonge mu bande eu? Mmunyi muudi mua kuambuluisha nende bantu bakuabu?—Mus. 71:17.