Ikalayi ne meji makane bu mukadi nshikidilu musemene pabuipi

¹ Dîyi dia Nzambi ndiambulule misangu ne misangu mudi dituku dia Yehowa dilua ‘bu muivi’; mmumue ne: mu tshimpitshimpi, mu tshintuluntulu, mu tshimumamuma. (1 Tes. 5:2; Mat. 24:43; 2 Pet. 3:10; Buak. 3:3; 16:15) Yezu wakamba ne: ‘Nunku nuenu kabidi nudilongolole, bualu bua Muana wa muntu nealue pa dîba dinudi kanuyi belangane meji.’ (Mat. 24:44) Mmunyi mutudi mua kushala batabale mu nyuma padi nshikidilu wenda usemena pabuipi apa? Mushindu wa kuenza nanku ng’udi mu mubelu udi mufundisha ku nyuma wa Nzambi eu: ‘Nuikale ne meji majalame.’​—1 Pet. 4:7.

² Kuikala bantu ba meji majalame anyi makane kudi kumvuija kumona malu mushindu udi Yehowa uamona. (Ef. 5:17) Meji makane adi atuambuluisha bua kudimona tuetu bine bu “benyi ne bena luendu” munkatshi mua bena mu ndongoluelu wa malu eu. (1 Pet. 2:11) Adi kabidi atuambuluisha bua kujingulula malu adi ne mushinga menemene, bua kumanya malu a kuteka pa muaba wa kumpala, ne bua kuangata mapangadika a meji.​—Filip. 1:10.

³ Difundila bipatshila bia mu nyuma: Kudifundila bipatshila bia mu nyuma ne kubikumbaja kudi kutuambuluisha bua kuikala bantu ba meji makane. Udiku ne bipatshila bia mu nyuma biudi udienzeja mpindieu bua kukumbaja anyi? Utuku udienzeja bua kubala Bible dituku dionso, kubuela mu bisangilu bionso, kubala nimero yonso wa Tshibumba tshia Nsentedi ne wa Réveillez-vous!, nansha pamu’apa kuvudija mudimu webe wa buambi anyi? Biwikala mudifundile bipatshila bidi bikukumbanyine, munanukile ne kudienzeja bua kubikumbaja, ne usambile Yehowa bua abeneshe bukole buudi wenza, newikale pamu’apa mua kukema pawamona bipeta biwapeta.

⁴ Mukulu mukuabu wakakonka mulume kampanda ne mukajende bua bidi bitangila bipatshila biabu bia mu nyuma. Lukonko alu luakabafikisha ku dimona ne: buobu bakepeshe amue malu a mu nsombelu wabu pa kulekela dibuelabuela mabanza avua abanemenena bujitu, bavua mua kukokesha bua kuenza bumpanda-njila. Bakapangadika bua kudifundila tshipatshila atshi. Bakafuta mabanza avuabu nawu onso ne kupetabu mushindu wa kukepesha malu avua kaayi ne mushinga, avua abadia dîba ne makanda patupu. Anu tshidimu tshijima tshikumbana nunku, buobu e kukumbaja tshipatshila tshiabu. Mbipeta kayi biakapatulabu? Mulume udi ulonda ne: “Bu tuetu katuyi badifundile bipatshila kampanda, katuvua kufika kutukadi mpindieu eku to. Tudi ne disanka dipite bungi. Nsombelu wetu udi mpindieu polaa, mulenga be! Udi mpindieu ne mushinga wende mulelela ne tshipatshila.”

⁵ Bu mutudi bindile dituku dia Yehowa mpindieu, tudilamayi batabale mu nyuma pa kuikala ne nsombelu wa bantu ba meji makane, bashindamene pa dienza dia disua dia Nzambi.​—Tito 2:11-13.